Mankuma 13
13
1Mwaana wamadyeele wusalilaa nyikusulu dza taayi dyaandi ;
ngo mwaana ngaa-munsiku kaywiilaa nseembulu ko.
2Mu kimbutu kya munwa, muutu wudyaanaa byabibwete ;
ngo manzala ma bangaa-kintori, kunwaana.
3Wunde wukebaa munwa waandi, wukebaa nyutu yaandi ;
ngo wunde wudzibulaa bibori byaandi wukweenda ku kufuukila.
4Manzala ma mubolo mabuuna ;
ngo ma wunde wusalaa matookisaa.
5Wasuunguma wubeelaa maampu mampya ;
ngo ngaa-bubi wuyirikaa misamu myansaanunu na myansoni.
6Kuhele kwa bubayi kukalaa nzila ya nkwikumunu ;
ngo bubayi bukwekituka masumu.
7Kuri mosi wusoongo ti wuri kisina ngo wahele ti na kyabu ;
mukimi wusoongo ti muwelu ngo wuri na busina bwabuukila.
8Kibvuukisaa muutu, ngo busina bwaandi ;
muwelu kataambulaa maseembu ko.
9Buungi bwa bahele na bubayi bu keembisaa ;
ngo mwiinda bangaa-bumbabu wadzima.
10Kinwa kibvuluminaa mayumu kitsu.
Madyeele mari kuri bataambulaa mandoongi.
11Busina bwakubakila mu mawasu-mawasu budziimbilaa mu mawasu ;
ngo wunde wububakilaa ntentele, wubufunisaa.
12Nsiitu dzibvulilaana kudziingila, mutima beeriri ;
ngo manzala mayukutusu mari bunu muti wa bumwooyo.
13Wunde wunyaafuna maampu, wuhaanaa nsuku mu ntoono yaandi ;
ngo wunde wubvuminaa ntumu, wutaambulaa kimbwanga.
14Nyikusulu ngaa-madyeele ngo mukeri wamwooyo,
wuyebisaana myeete mya lufwa.
15Nyukulu yayibwe yihaanaa bweese.
Ngo nzila bari na kintori yahele na bwakupalila.
16Mpisi walubuka wukwesalaa mu nyaabulu ;
ngo kiwulu wukwetsyamikisa bulawuki.
17Ntumi ya bumbalu yibwaanaa mu mpasi ;
ngo waheeku wakwiikama wunata mpolo.
18Buwelu na lubelu biri bya wunde wunyaafuna nyikusulu ;
ngo wunde wukebaa ndubukulu wubaa wabvumunu.
19Nzala yayukutusu, nzuununu muwuumunu ;
ngo kukabuka na bubi, bubi kuri bilawuku.
20Wunde wukweyende na bangaa-madyeele wuri mu kuba ngaa-madyeele ;
ngo wunama bilawuku wubwiililaa mpopi.
21Mpopi yinamaana bangaa-masumu ;
ngo bayirikilaa mamabwe kuri basuunguma.
22Muutu wamubwe wusisikilaa saala kuri bateekulu baandi ;
busina bwa ngaa-masumu bwataasulu kuri wasuunguma.
23Nseke yahatu kuri muwelu yibwiisaana ;
kuri bafwaanaa lo bukuri bunzoonsi bwahele.
24Wunde wulooso kikoti, wabele mwaana waandi ;
ngo wutiiri mwaana waandi, wumusakilaa nyikusulu.
25Wahele na bubayi wudyaana kuri wuyukutaa ;
ngo ngaa-bumbabu wuhelelaa bya kudya.
Alliance Biblique du Congo 2024