Mankuma 14
14
1Mukyeetu wamadyeele wutuungaa nzo yaandi ;
ngo mukyeetu wakilawuku wutsaamuna yo mu myooko myaandi.
2Wunde wudyaatilaa mu bunkete, wubvumunaa Yaave ;
ngo wunde wudyaatilaa mu manzila mateengeme wumunyaafunaa.
3Mu munwa kiwulu muri kimpaala kya masiiku ;
ngo bibori bya bangaa-madyeele bibakebaana.
4Ha baanaa bangoombo bo pe, lo kidiilulu kya byo kyamukangala.
Mbwiisulu byandya yakwelesene na makwa ma bangoombo.
5Mbaangi yakwiikama, yawunaa ko ;
ngo mbaangi yampya wubulumisaana mpya.
6Ngaa-masiiku wusakaa madyeele, ngo kamadzuukilaa ko ;
ngo kuri wubakulaa, nyaabulu yahele na mpasi.
7Ba lutatu na kiwulu, ye wubaka nyaabulu mu bibori bya nde ko.
8Madyeele ma muutu walubuka, maswasikisaa nzila yaandi ;
bulawuki bwa biwulu, mawunu.
9Biwulu biseyelaa mbweyusulu mabuungu ;
ha kakati dya basuunguma kuri bweese.
10Mutima muutu wuyaabaa mpasi dzaandi ;
na kunsa kiminu kyaandi, kuri mukimi ko wukabula kyo na nde.
11Nzo bababi yitsaamuka ;
ngo ya bangaa-nsungumunu yibweeyaa.
12Kuri nzila yasuunguma ha busu bwa muutu ;
ngo ku manunu manzila ma lufwa.
13Ti hayuku kunsa biseyu, mutima lo wubama ;
ku manunu, kiminu kikitukaa ngebe.
14Mutima wadziimbila wuyukutaa mu manzila maandi ;
ha yulu nde kuri muutu wamubwete.
15Muutu wahele kutswiikisa wusaa kanyi mu mpisi maampu ;
ngo muutu walubuka yaari ha kasuusa kitaki kyaandi.
16Ngaa-madyeele wuri na boomo na wutekelaa bubi mbisa ;
ngo kiwulu wukwendikilaa bukuri wasa nsiitu mu nde-meene.
17Ngaa-mutima kinsukulu wuyirika ma buwulu ;
muutu ngaa-bitsimi byabibi bamubelaa.
18Bahele na madyeele, saala dya bo ngo bulawuki ;
ngo dya bari na mutima wamutsiina, lukoongolo lwa nyaabulu.
19Bangaa-bumbalu bayilimisaana mabusu ma bo, ha mankula ma bababwe.
Bababi, bateleme ha myeelu mya basuunguma.
20Muwelu wabelu kuri mbaasi yaandi ;
ngo kisina watya kuri balaka.
21Wunde wubelaa mbaasi yaandi wuyirikaa masumu ;
kiminu kiri na wunde wusiila ngebe kuri bawelu.
22Buri bakwetsimina bambaasi mya mpasi, bahele kudziimbila nzila ?
Nkwikumunu na ngwanwa bya babo bakwetsiminaa mamabwe mu bambaasi.
23Mu mpisi kisalu kuri ndaandu ;
ngo bibori bya lusuku, ngo buwelu.
24Lukoongolo lwa bangaa-madyeele ngo busina ;
lwa biwulu ngo bulawuki.
25Mbaangi yangwanwa yikuula baatu ;
ngo yikwetsyamikisa myampya ngo ngaa-mawunu.
26Kunsa kibvumi kya Yaave, kuri nsiitu dzamakwa,
dziri kisweemunu kya baala baandi.
27Kibvumi kya Yaave ngo mukeri wamwooyo,
mu kusasika la na myeete mya lufwa.
28Fundu-fundu dya baatu, nkeembu mbyaasi ;
kuhele kwa baatu mbwiilu kimfumu.
29Nkindusulu mutima, ngo kufundumuka kwa madyeele ma mbakukulu ;
ngo ngaa-kinsukulu mutima, wumonikisaa bulawuki bwaandi.
30Bumwooyo bwa nyutu ya muswiinyi,
ngo butsiina bwa mutima ; ngo bukwa ngo bolo dya miyisi.
31Wunde wubamisa muutu wahele na kwa,
wusaana Muyiriki muutu wunde ;
ngo wunde wusiila muwelu ngebe, wudzaangisa Muyiriki.
32Biyiriki bya ngaa-bubi bimukwaamisaa ;
ngo wasuunguma wubakaa nsiitu ti hayuku ha busu bwa lufwa.
33Mu mutima wa ngaa-madyeele mwadzakila madyeele ;
sa mayabakana ha kakati dya biwulu.
34Kuhele kwa bubayi kusuungikaa kwa nsi ;
ngo bubayi, masumu ma makaanda.
35Mbyaasi wusiilaa kisari kyaandi kyalubuka ngebe ;
ngo nkesi dzaandi dzibwilikilaa wuyirikaa myansoni.
Alliance Biblique du Congo 2024