Mankuma 12
12
1Wunde wutyaanaa nyikusulu, wutyaanaa nyaabulu ;
ngo wubelaa ndubukulu lo kiwulu.
2Yaave wuhaanaa bweese kuri muutu wuyirika mamabwe ;
ngo wudzeengelaa mukanu kuri ngaa-mawunu.
3Muutu kari nkwikumunu mu bubi ko,
ngo mwaansi basuunguma kataabukaa ko.
4Mukyeetu wantalu ngo lukoongolo lwa mutu kuri mulumi waandi ;
ngo wunde wudzusaa nsoni, wuri bunu bolo munsa miyisi myaandi.
5Bitsimi bya bahele na bubayi byasuunguma ;
ngo mandoongi ma baatu bababi mawunu mari.
6Maampu ma bangaa-bubi myeete mya lufwa,
ngo munwa baatu basuunguma wubakuula.
7Batsaminaa bababi, lo kusiiri kitotolo mu bo ko ;
ngo nzo basuunguma bunu bu yibaana yateleme.
8Badumusaa muutu wuri na mutima wamutsiina ;
ngo ngaa-mutima wukwekituka, wanyaafunu.
9Bubvuriri bubwete mu kuba wanyaafunu, bu wuri na kisari kimosi,
ti mu kubula ntulu na kuhelele byandya.
10Muutu wasuunguma yaari manzala ma bibulu byaandi ;
ngo manzala ma bangaa-bubi mamudzusa.
11Wunde wuhataa nseke yaandi, lo sa kayukuta mu byandya ;
ngo wunde wukwenamaa bitotolo byahele mufunu, wahele na madyeele.
12Wamubi wunyiimaa siinga dya bangaa-bumfuna ;
ngo mwaansi bahele na bubayi wubutaa bimbutu.
13Mu nyirukulu masumu, bibori bilebukaa mweete wamubi ;
ngo wahele na bubayi wupalaa mu mbamunu.
14Mu kimbutu kya munwa, muutu wuyukutaa mu byabibwe bya ndaandu ;
mpisi nde wutaambulaa mufutu kisalu kyaandi.
15Nzila kilawuku yiri yasuunguma ha miisu myaandi ;
ngo wunde wuywiila wuri ngaa-madyeele.
16Nkesi dza kilawuku dziyabikinaa mu kiluumbu ;
ngo ngaa-madyeele wusweekaa lubelu.
17Wunde wukwetsamikisa nkwikumunu, wuyaabisa nsungumunu ;
ngo mbaangi ya mampya wusalilaa mawunu.
18Ngaa-lusuku wulemisaa bunu mbeesi yayila ;
ngo ludimu lwa bangaa-madyeele lutsinikisaana.
19Kibori kyangwana kyakumusu kwakinkulu ;
mu mbwatukulu diisu, ludimu lwampya lusiiri ko.
20Mawunu mari mu mitima mya babo bakwetsima kusa bubi ;
babo bakweha mandoongi makiyeengi bataambulaa kiminu.
21Kuri mpopi yitubukila wasuunguma ko ;
bababi bari kunsa mpopi yamakwa.
22Bibori bya mampya byabele kuri Yaave ; ngo basalilaa nkwikumunu bataambula bweese bwaandi.
23Muutu wamadyeele wusweekaa nyaabulu yaandi ;
ngo mutima kilawuku, wukweyaabisa bulawuki bwaandi.
24Myooko mya basalaa, mitwaalisa
myooko mya bilyeebe myakwiikusu mu kinyemu.
25Mutima muutu ngaa-bitsimi wubibasilaa ;
maampu mamabwete mabikitulaa kuri byeki bya kiminu.
26Wahele na bubayi wuri munsoongi-nzila kuri nduku yaandi ;
ngo nzila baatu bababi, yibadziimbisaa.
27Mubolo kari mbakila toongo twa kuyoko ko ;
ngo busina bwantalu kuri muutu ngo mawasu mu kusala.
28Mu nzila yahele bubayi muri bumwooyo, nzila yahele kunata ku lufwa.
Alliance Biblique du Congo 2024