Lutaangu 9
9
Ntaangu ya nkeembulu Paaka
1Yaave wadzoonso kuri Moose, ku nsi yankatu ya Sinayi, mu mubvu wamyoolo, ha mambisa ma mpalulu mu nsi ya Ngipiti, mu ngoondo yatete, waleele ti : 2« Baala ba Iselili bayelemini kukeembele Paaka mu ntaangu yasoolo. 3Mu kiluumbu kyakuumi na bina mu ngoondo yimayi, beenu sa lwakeembele Paaka mu nsinsika, mu ntaangu yasoolo, bunu buri mikele na bifu byobinso bya Paaka. » 4Moose wayaabisa baala ba Iselili mu kukeembele Paaka. 5Bo bakeembele Paaka mu kiluumbu kyakuumi na bina, kya ngoondo yatete mu nsinsika, ku nsi yankatu ya Sinayi, bunu bwatumini Yaave kuri Moose, baala ba Iselili bayirika bubwo#9.5 Bit. 1-5 : Kumono Mpa 12.1-13 na matinu..
6Baatu basumukini mu kubelemene mvuumbi, baba bahele kukeembele Paaka mu kiluumbu kikyo. Bo bayende kumonokono kuri Moose na Aaroni kini kiluumbu kikyo. 7Bo baleele kuri Moose ti : « Beetu twasumuka mu kubelemene mvuumbi. Ngo mu nki tuba ha luteke, mu kuhele kuha kikabu kuri Yaave mu ntaangu yasoolo, ha kakati dya baala ba Iselili ? » 8Moose wabvutula kuri bo ti : « Kiingee natee me nyuka buleele Yaave mu beenu. »
9Yaave waleele kuri Moose ti : 10Yaabisa baala ba Iselili ti : « Mbuti muutu mu beenu, na mu biseendu byeenu, sumukini mu kubelemene mvuumbi, bunu pele mu kweende ku nyungulu ya la, lo wuri na miswa mu kukeembele Paaka dya Yaave, 11mu kiluumbu kyakuumi na bina, mu ngoondo yamoolo, mu nsinsika. Nde yelemini kudidya mu mampa mahele lufunusu na binkoolo byankari. 12Kari nsweekulu byandya natee mu kipari, na kubukuta miyisi#9.12 Kumono Mpa 12.46 ; Ywa 19.36. ko. Bayelemini kukeembele Paaka bunu buri mikele. 13Ngo muutu watsyeemeke wubeeri wahele mu nyungulu, mbuti bisiri kukeembele Paaka, lo sa bamuyisila mu lutaangu lwa baatu baandi, bukuri wahele kutwaala kikabu kuri Yaave mu ntaangu yasoolo. Nde sa kataambula mpopi mu masumu maandi. 14Mbuti munzeense wuri ha kakati dya beenu tiiri kukeembele Paaka dya Yaave, lo kayirika bunu buloombo mikele na bifu bya Paaka. Mikele na bifu byobimosi mu baala ba Iselili na banzeense. »
Mwiisi fukiri nzo yangisi
15Mu kiluumbu ki batuungiri nzo yangisi, tuti #9.15 Tuti : Kumono Mpa 13.21 na matinu. dyayisa kufuka nzo yiyo mu mpele ya nzo yangooto ya mbwanukunu. Mu nsinsika, tuti didyo dyaba bunu kifwaani kya mbaawu, natee mu kipari. 16Dyo dyanamitina kufuka nzo yangooto ya mbwanukunu, na dyaba bunu mbaawu mu butsuku. 17Mpisi ntaangu yaba naangukana mwiisi ha yulu nzo yangooto, baala ba Iselili se baba yusukaana mu kweba ha kibeendu kyaba telemaa tuti, haho baba batuunga manzo mangooto. 18Mu lutumu lwa Yaave, baala ba Iselili baba naangukaana mu kweende, na mu lutumu lwa Yaave babatuungaana manzo mangooto, mu kuba biluumbu byobinso byaba telemaana tuti ha yulu nzo yangisi. 19Mbuti tuti dyaba dziingilaana biluumbu byalaka ha yulu nzo yangisi, lo baala ba Iselili babasalaana kisalu kya Yaave na kuhele kunaanguka mu kweende. 20Ngo mbuti tuti disiiri biluumbu byantele ha yulu nzo yangisi, lo bo babatelemaana mu lutumu lwa Yaave, na babakweendaana mu lutumu lwa Yaave. 21Mantaangu makaka mwiisi waba dziingilaana ha kibeendu kimosi, kuholosono mu nsinsika natee kipari. Bunu pele kiluumbu kimosi na butsuku, tuti bu ditsendikiri mu kweende, baala ba Iselili se batsendikiri ha kibeendu. 22Ngo mbuti tuti disiiri biluumbu byoolo, ngoondo mosi bunu pele biluumbu byalaka ha yulu nzo yangisi, lo baala ba Iselili baba bahele na miswa mya kuyusuka ha kibeendu. Ngo mbuti ditsendikiri mu kweende, lo bo se batsendikiri mu kweende. 23Mu lutumu lwa Yaave bo baba kutukinaana mu kutuunga manzo mangooto, na mu lutumu lwa Yaave bo baba tsendikaana mu kweende. Bo basiiri kisalu kya Yaave bunu bwaba lutumu lwaandi kuri Moose.
Alliance Biblique du Congo 2024