Lutaangu 10
10
Mamvumvuri mapalata
1Yaave waleele kuri Moose ti : 2Yirika mamvumvuri moolo mu palata dyatsula. Sa bamasalila mu kukutukisaa kimvuka, na mu kutsendeke ha nzo yangooto mu kweende. 3Sa bafula mo, na mukaangu ndemunso sa kakutukina ha teke ye, ha nkotulu nzo yangooto ya Mbwanukunu 4Mbuti bafuriri mvumvuri mosi kitsu, lo bamfumu ba makaanda ma Iselili, sa bakutukina ha teke ye. 5Ntaangu yilufula mvumvuri yabvuuta na nsaku, babo badzakala ku mpele ya esete sa beende. 6Ntaangu yilufula lwadzoolo na kusika nsaku, lo bari ku baanda se banemi mu kweende#10.6 Mukaanda wamukulu wa Kingereke watina nguunga yamatatu na yamana hamaha, mu kuyaabisa nyendukulu ku manzo mangooto mari ku wesete, na ku noode.. Sa bafula mamvumvuri na mansaku mu nyendukulu bo. 7Ngo mu ntaangu yilukutukisa mukaangu, beenu sa lwafula mvumvuri kwahele kusika nsaku.
8Ha yulu bani baala ba Aaroni, ngaanga-Nzaambi bari na miswa mu kufula mvumvuri. Wunde musiku wuri beenu na biseendu byeenu luyelemini kubvumina mu mantaangu momanso.
9Mu ntaangu yilukweende ku nsi yeenu ku mudziingu kuri bataatu balunwaanisa, beenu luyelemini kufula manguubi ma mudziingu na mamvumvuri. Mu bubwo, me Yaave Nzaambi yeenu me nyilubaambukila mwooyo na kulukuula kuri bataatu beenu. 10Mu biluumbu bya kiminu na bya minkeembu myeenu, mu mbandukulu ngoondo, beenu sa lwafula mamvumvuri mu ntaangu yakuha bikabu bya kuyoko na bya kiyeengi, mu mbambukulu mwooyo kuri me Yaave Nzaambi yeenu#10.10 Maampu mu Kihebereho mu bisoni bya kisamari mabweese bitsuri bitatu bya maampu hamaha byafwanikina na bya Ngi 1.6-8..
Kubaandika ku Sinayi natee ku ndilu ya Mohabi
10.11–21.35
Ba Iselili banaanguka mu kweende
11Mu mubvu wamyoolo wa ngoondo yamoolo, mu kiluumbu kyamakuumi moolo, tuti dya naanguka ha yulu nzo ya lulelusunu#10.11 Kumono 9.15-23.. 12Baala ba Iselili batsendeke ku nsi yankatu ya Sinayi, mu kweende bunu buri nyendukulu yaaku, na tuti dyabanata natee ku nsi yankatu ya Parani. 13Batete bayende mu lutumu lwaheeri Yaave kuri Moose#10.13 Kumono Kik 2..
14Yatete mu kuyusuka ha kibeendu yaba mpuumbu ya baala ba Yuuda na mukaangu bayongolo baaku. Mpuumbu bayongolo ya baala ba Yuuda yaba mu lutumu lwa Nasoni, mwaana Aminadabe. 15Mukaangu bayongolo wa kaanda dya baala ba Isakari, Natanahele, mwaana wa Tsohari. 16Bayongolo ba kaanda dya baala ba Dzabuloni, Elyabi, mwaana wa Heloni.
17Bu basokolo nzo yangooto yangisi, baala ba Ngeresoni na ba Merari baba kweyinata, batsendeke mu kweende.
18Tumi kabu diri mu kidiimbu kya Lubeni batsendeke mu kunama, bunu buri bayongolo baaku. Elisuri, mwaana Sedehure, wabatumaana mpuumbu yiyo. 19Na ha yulu bayongolo ba kaanda dya baala ba Simehoni, wabatwaalisa Selumyeli, mwaana Surisadayi ; 20Bari mu kaanda dya baala ba Ngadi, mu lutumu lwa Elyasafe, mwaana Leweele.
21Ha mambisa haho, kaanda dya Kehati dyatsendeke mu kweende, bo banata bisalulu byangisi. Babamosi batekisiri mu kutuunga nzo yangisi, tekesele bo batubuka.
22Kabu dya bakutukina mu kidiimbu kya baala ba Efarayimi, batsendeke mu kweende bunu buri bayongolo baaku, mu lutumu lwa Elisama, mwaana Amihude. 23Mukaangu bayongolo wa kaanda dya baala ba Manase batwaalisa kuri Ngamelyeli, mwaana Pedatsure. 24Mukaangu bayongolo wa mu kaanda dya baala ba Benyami, batwaalisa kuri Abidaani, mwaana wa Ngidehoni.
25Na kabu dya bakutukina mu kidiimbu kya baala ba Daani, batsendeke mu kweende, bunu buri bayongolo baaku. Bo baba bebele na bampotulu mu kweende, mu mampuumbu momanso. Ahiyedzeri, mwaana wa Amisadayi, wabatwaalisa. 26Mukaangu bayongolo wa kaanda dya baala ba Aseere batwaalisa kuri Pangyeli, mwaana wa Okerani. 27Bari mu kaanda dya baala ba Nefetali batwaalisa kuri Ahira, mwaana wa Eyinani.
28Bubwo baala ba Iselili balandisina mu kweende, bunu buri bayongolo baaku bo bayende.
Moose wusaka munsoongo-nzila mu ntoono budyeengi
29Moose waleele kuri Hobabi, mwaana Lewuhele#10.29 Kumono Mpa 2.16 na matinu., wuri Madyaani ti : « Beetu tuyelemini kweende ku nsi ya lusiilulu yaleeriri Yaave mu kutuha. Wasa na beetu, na beetu tumi tukuyirikila mamabwe ma tambikila Yaave kuri bari Iselili. » 30« Nde wabvutula kuri Moose ti me nyikweende na beenu ko, me ku nsi yaami na ku kaanda dyaami nyibvutuka. » 31« Moose wamuyingikila ti yaa wutuyekele ko, bukuri ye yaari bibeendu bya kutuunga manzo mangooto ku nsi yankatu. Ye sa waba bunu miisu mya beetu. 32Mbuti ye weensi na beetu, lo mamabwe mayirika Yaave mu beetu, beetu sa twayirika mo mu ye. »
33Bo batsendeke mu kweende, kubaandika ha mulaandu wa Yaave#10.33 Kufwanikisa Mpa 3.1 na matinu., mu budyeengi bwa biluumbu bitatu ; nkobo ya lulelusunu lwa Yaave yaba ha mankula ma bo na basa biluumbu bitatu mu kubasakila kibeendu kya kuwuuma. 34Tuti dya Yaave dyaba ha yulu bo mu mwiini, mu ntaangu ya kutsendeke ha nzo yangooto. 35Kwaba, mu ntaangu yibaba nataana nkobo, Moose waleele ti :
« Yaave, teleme
mpisi bataatu baaku bayitika
na bakubelaa bayitika ha busu bwaaku#10.35 Kumono Mkg 68.1. ! »
36Na mu ntaangu yibasundula nkobo, nde waleele ti :
Yaave, wasa bvutuka,
kuri mafuunda na mafuunda ma bari « Iselili ! »
Alliance Biblique du Congo 2024