Lutaangu 8
8
Nteetukulu miinda ha kibeendu
1Yaave waleele kuri Moose ti : 2Yaabisa Aaroni ti : « Ntaangu yi wusuusa miinda ha yulu kikebulu, miinda myo nsaamu miyelemini kusaalisa ha mankula ma kikebulu. » 3Aaroni wayirika bubwo : Nde wasuusa miinda ha mankula, ha yulu kikebulu, bunu bwaleeriri Yaave kuri Moose. 4Kikebulu kya miinda kyaba kyayirika mu woolo dya tsulu, kubaandika mu kuulu kwaandi natee ku yulu kuri kifwaani kya kifulu. Bayirikiri kitetukulu kikyo bunu buri kifwaani kya soongiri Yaave kuri Moose#8.4 Bit. 1-4 : Kumono Mpa 25.31-40 ; 37.17-24..
Lusakumunu lwa Baleevi
5Yaave waleele kuri Moose ti : 6Holo Baleevi ha kakati dya baala ba Iselili mu kubaseme. 7Bumabu ye wuyirika mu kubatsyeemese : Wu banyaka maampa ma nsyemusunu#8.7 Maampa ma nsyemusunu : Kampe mani maampa ma bari badzoonsolo mu Kik 19, ti bukuri nkuumbu mu Kihebereho yasoboko, bunu pele matinu mu Bal 14., na bo sa batebe mfu dza manyutu maaku na kuswaaka binkutu byaaku, na bo sa batsyeemeke. 8Sa baholo mulumi ngoombo na kikabu kya fufu dyasaanga na maasi. Ye sa holo mulumi ngoombo waboolo mu kikabu kya mpemusunu masumu. 9Sa watwaala Baleevi ha mankula ma nzo yangooto ya mbwanukunu, na sa kutukisa mukaangu ndemunso wa baala ba Iselili. 10Sa kokosolo Baleevi ha busu bwa Yaave, na baala ba Iselili sa bateeteke myooko myaaku ha yulu Baleevi. 11Aaroni sa kasoongo Baleevi ha busu bwa Yaave, bunu kikabu kyaheeri baala ba Iselili, na bo sa baba mu kusala kisalu kya Yaave. 12Baleevi sa bateeteke myooko ha yulu mitu mya balumi ba bangoombo ; mosi yi wuha mu kikabu kya mpemusunu masumu, na mosi mu kikabu kya kuyoko kuri Yaave, mu kuloombo mpemisi ya masumu ma Baleevi. 13Ye sa watelemese Baleevi ha busu bwa Aaroni na baala baandi, na sa wabasoongo bunu kikabu kyaseme kuri Yaave. 14Bubwo ye wusuusa Baleevi ha luteke, ha kakati dya baala ba Iselili, na bo sa baba ba me. 15Ha mambisa haho, Baleevi sa biisa mu kusala mu nzo yangooto ya mbwanukunu.
« Ye yelemini kubatsyeemese na kubaha bunu kikabu. 16Bukuri bo babaheeri buni kikabu kuri me ha kakati dya baala ba Iselili, ha kibeendu kya baala bobanso batete babutuka mu Iselili. Me nyabahoriri mu kuba ba me. 17Bukuri bobanso batete mu kubutuka mu baatu na bibulu mu Iselili, bayeki ba me, kubaandika mu kiluumbu ki nyadzusiri me baala bobanso batete ba nsi ya Ngipiti, bobanso batete mu kubutuka mu Iselili bayeki ba me#8.17 Kumono Mpa 13.2.. 18Me nyahoriri Baleevi ha kibeendu kya baala bobanso batete ba Iselili. 19Me nyaheeri Baleevi, ha kakati dya baala ba Iselili, kuri Aaroni na baala baandi, mu kuri basa kisalu kunsa nzo yangooto ya mbwanukunu mu baala ba Iselili, na kubaloombolo mpemisi mu masumu, mu kuri biteesu bya mpasi yaa bi bwiila mu bo ko, mu ntaangu yi bakokosolo ha kibeendu kyangisi#8.19 Kufwanikisa 1.53.. »
20Moose, Aaroni na mukaangu ndemunso wa Iselili, bayirika momanso mu Baleevi, bunu bwa loombiri Yaave kuri Moose. 21Baleevi batsyeemeke na baswaaka binkutu byaaku, na Aaroni wabayakisa bunu kikabu kuri Yaave, na kubaloombolo mpemisi mu masumu maaku, mu kuri batsyeemeke. 22Ha mambisa haho, Baleevi babaandika kusala munsa nzo yangooto ya mbwanukunu, ha busu bwa Aaroni na baala baandi. Bo bayirika momanso mu Baleevi, bunu bwatumini Yaave kuri Moose.
23Yaave waleele kuri Moose ti : 24« Baleevi bari na mibvu makuumi moolo na mitaanu, bayelemini kwiisa mu kusala kisalu munsa nzo yangooto ya mbwanukunu. 25Bu bakukisa mibvu makuumi mataanu, lo bo kubweese pe kusala. 26Bo lo babakisiri bambaasi bakiri mu kisalu mu nzo yangooto ya mbwanukunu, ngo kari mu kusala kisalu kya bo-meene ko. Bubwo wuyirika mu kisalu kya Baleevi. »
Alliance Biblique du Congo 2024