Lutaangu 33
33
Nyeendukulu mu bibeendu kuholosono mpalulu ku Ngipiti
1Mumamu mwayookiri bari Iselili bapariri ku nsi ya Ngipiti mu lutumu lwa Moose na Aaroni, bunu buri mampuumbu ma bayongolo baaku. 2Moose watina nyeendukulu bo mu bibeendu mu lutumu lwa Yaave. Bimabi ngo bibeendu mu nyendukulu yaaku#33.2 Mankuumbu ma bibeendu byamosi mabaha mu kikabu kimaki mari se mu mukaanda wa Mpalulu bunu pele wa Lutaangu ; mankuumbu mamosi hamaha kitsu mari. Bibeendu byalaka biri mpasi mu kuyaaba ha biri. :
3Bo banaanguka ha Lamesesi, mu ngoondo yatete, mu kiluumbu kyakuumi na bitaanu kya ngoondo yiyo. Ha mambisa ma Paaka baala ba Iselili bapariri mu bunsaalisi ha miisu mya bari Ngipiti. 4Mu ntaangu yiri bari Ngipiti bari mu kudziika, baala baaku bobanso batete badzusiri Yaave. Yaave waseembiri banzaambi ba bo. 5Baala ba Iselili banaanguka ha Lamesesi, bayende kudzakala ku Sukoti. 6Bu banaanguka ha Sukoti bayende kudzakala ku Etami, ku nsukunu nsi yankatu. 7Bu banaanguka ha Etami babweese kubvutuka ku Pi-Hiroti, diri kisusungu na Baali-Tsefoni, na badzakala ha mankula ma Mingedoli. 8Bu banaanguka ha Hahiroti#33.8 Kuyusukila ha Pi-Hiroti : Kusoongo ndaambu mikaanda mya Kihebereho myatina mu myooko na mambangukulu malaka mamakulu mu Kihebereho ; maampu bunu buri bifu bya Kihebereho Kuyusukila ku Pene-Hahiroti. bayooko ha kakati dya mubu ku nsi yankatu, badyaata mu biluumbu bitatu ku nsi yankatu ya Etami, na badzakala ha Mara. 9Bu banaanguka ha Mara batuula ku Elime. Ha Elime kwaba miwiila kuumi na myoolo na maba makuumi nsaamu, haho bo badzakiri. 10Bu banaanguka ha Elime na badzakala ha mubu wa madyaari. 11Bu banaanguka ha mubu wa madyaari, badzakala ku nsi yankatu ya Tsini. 12Bu banaanguka ku nsi yankatu ya Tsini, badzakala ku Dofeka. 13Bu banaanguka ha Dofeka, bo badzakala ku Alusi. 14Bu banaanguka ha Alusi, bo badzakala ku Lefidimi, haho hari kaanda dyasiiri kubaka maampa ma kunwa ko.
15Bu banaanguka ha Lefedimi, bo badzakala ku nsi yankatu ya Sinayi. 16Bu banaanguka ku nsi yankatu ya Sinayi, bo badzakala ku Kibviroti-Tabva. 17Bu banaanguka ha Kibviroti-Tabva, bo badzakala ku Haseroti. 18Bu banaanguka ha Haseroti, bo badzakala ku Litima. 19Bu banaanguka ha Litima, bo badzakala ku Limoni-Perese. 20Bu banaanguka ha Limoni-Perese, bo badzakala ku Libena. 21Bu banaanguka ha Libena, bo badzakala ku Lisa. 22Bu banaanguka ha Lisa, bo badzakala ku Kehelata. 23Bu banaanguka ha Kehelata, bo badzakala ku mulaandu wa Seferi. 24Bu banaanguka ku mulaandu wa Seferi, bo badzakala ku Harada. 25Bu banaanguka ha Harada, bo badzakala ku Makeheloti. 26Bu banaanguka ha Makeheloti, bo badzakala ku Tahati. 27Bu banaanguka ha Tahati, bo badzakala ku Tera. 28Bu banaanguka ha Tera, bo badzakala ku Miteka. 29Bu banaanguka ha Miteka, bo badzakala ku Hasemona. 30Bu banaanguka ha Hasemona, bo badzakala ku Moseroti. 31Bu banaanguka ha Moseroti, bo badzakala ku Bene-Yakani. 32Bu banaanguka ha Bene-Yakani, bo badzakala ku Hori-Ngidengadi. 33Bu banaanguka ha Hori-Ngidengadi, bo badzakala ku Yotebata 34Bu banaanguka ha Yotebata, bo badzakala ku Aberona. 35Bu banaanguka ha Aberona, bo badzakala ku Etsihoni-Ngebere . 36Bu banaanguka ha Etsihoni-Ngebere, bo badzakala ku nsi yankatu ya Tsini, ku Kadese. 37Bu banaanguka ha Kadese, bo badzakala ku mulaandu wa Hori, ku ndilu nsi ya Edomi.
38Ngaanga-Nzaambi Aaroni watoomboko ku mulaandu wa Hori, mu lutumu lwa Yaave, na wafwa kukwo, mu mubvu wa makuumi mana, mu ntaangu yapariri baala ba Iselili ku nsi ya Ngipiti, mu ngoondo yamatatu, mu kiluumbu kyatete mu ngoondo. 39Aaroni waba na nkama na makuumi moolo na mitatu mya mibvu (123) mu ntaangu yi kafwiiri ku mulaandu wa Hori#33.39 Kumono 20.22-28 ; Ngi 10.6.. 40Mbyaasi ya Aradi, mu Kanaana, wabadzakalaa ku baanda, mu nsi ya Kanaana, wayuka ti baala ba Iselili bari mu kwiisa#33.40 Kumono 21.1..
41Banaanguka ku mulaandu wa Hori, bo badzakala ku Salemona. 42Bu banaanguka ha Salemona, bo badzakala ku Punoni. 43Bu banaanguka ha Punoni, bo badzakala ku Oboti. 44Bu banaanguka ha Oboti, bo badzakala ku Iye-Abvarimi, ku ndilu ya Mohabi. 45Bu banaanguka ha Iye-Abvarimi, bo badzakala ku Diboni-Ngada. 46Bu banaanguka ha Diboni-Ngada, bo badzakala ku Alemoni-Dibelatayimi. 47Bu banaanguka ha Alemoni-Dibelatayimi, bo badzakala ku milaandu mya Abarime, kisusungu na Nebo. 48Bu banaanguka ha milaandu mya Abarime, bo badzakala ku bibiti bya Mohabi, bebele na Yorodaani ku Yeriko. 49Bo batuunga bebele na Yorodaani, kubaandika ku Bete-Yesimoti natee ku Abele-Sitimi, ku bibiti bya Mohabi.
Ntumunu dza Mfumu mu nkabulu ya Kanaana
50Yaave wadzoonso kuri Moose, ku bibiti bya Mohabi, bebele na Yorodaani ku Yeriko, waleele ti : 51« Yaabisa baala ba Iselili, baleele ti ntaangu yi lusabuka Yorodaani mu kweende ku Kanaana, 52lo sa lwabinga baatu bobanso ba nsi yiyo bari ha mankula ma beenu. Sa lwabula biteki byahala mu miti, na byawoolo di basulumusa, na sa lwabidziimbisa. Tumi lubula bibeendu bya bo byobinso byangisi. 53Beenu sa lwadzika nsi na kudzakala mu yo, bukuri me nyaheeri nsi yiyo kuri beenu mu kuyibaka. 54Tumi lukaba yo mu wari, bunu buri makaanda meenu. Kaanda diri na baatu balaka sa lwaha butoto bwabunene, na kaanda diri na baatu bantele sa lwaha butoto bwantele. Mpisi kaanda diyelemini kutaambula saala ha kibeendu kibwa wari, bunu buri bikuutu bya bataayi beenu#33.54 Kumono 26.52-56 ; 34.13 ; Yos 14.1-2.. 55Mbuti beenu lwahele kubinga baatu bari mu nsi yiyo ha mankula ma beenu, lo balusiisa ha mambisa ma bo sa baba bunu manseende mu miisu myeenu, na mu mbaansi dzeenu. Bo sa balunwaanisa mu nsi yi ludzakala. 56Sa kwaba kuri ma nyatsimini kuyirika mu bo, me sa nyayirika mo mu beenu. »
Alliance Biblique du Congo 2024