Lutaangu 32
32
Bitsuumbu bitatu bya dzakiri ku esete dya Yorodaani
1Baala ba Lubeni na ba Ngadi baba na bibulu byafuna kwalaka. Bo bamono ti nsi ya Yadzere na ya Ngaladi#32.1 Nkoonsi ya Yadzere na nsi ya Ngaladi mankoonsi moolo mari ku lubakala lwa Yorodaani, makabula mu mudzuumbu wuri na lukwaaku wuri nkuumbu Yaboke. yaba na bibeendu byabibwe mu kutwiila bibulu. 2Baala ba Ngadi na ba Lubeni bayende kumono Moose na Ngaanga-Nzaambi Elehadzari na bakuutu ba kaanda, baleele ti : 3« Ataroti, Diboni, Yadzere, Nimira, Heseboni, Elehale, Sebvami, Nebo na Behoni, 4mamo mabula mari mu nkoonsi yafuukisiri Yaave ha busu bwa kaanda dya Iselili, ngo nsi yayibwe mu kutwiila bibulu, na bisari byaaku biri na bibulu. » 5Babweese kuleele ti : « Mbuti beetu tu taamburi bweese ha miisu mya ye, lo hemese baha nsi yiyo kuri bisari byaaku. Yaa wutusabula ku simu dya Yorodaani ko. »
6Moose waleele kuri baala ba Lubeni na ba Ngadi ti : « Bampaangi beenu beende ku mudziingu kuri ti beenu lusaala hamaha ? 7Mu nki beenu lutiri kuholoso bito kuri baala ba Iselili mu kweende mu nsi yabaheeri Yaave ? 8Bubwo bwasiiri bataayi beenu mu ntaangu yi nyabaheekiri ku Kadese-Bareneya mu kukengese nsi yiyo. 9Batoomboko natee ku muwiila wa Esekoli, bakengese nsi, na bakubisa mitima mya baala ba Iselili mu kuhele kweende ku nsi yabaheeri Yaave#32.9 Bit.8-9 : Kumono 13.17-33.. 10Yaave wabaka nkesi dzamakwa mu kiluumbu kikyo, na walaba maalu mu kuleele ti : 11"Muutu ti mosi mu banaangukini ku Ngipiti, kubaandika mu wuri na makuumi moolo ma mibvu natee ku yulu kukwo, muutu ti mosi kamono nsi yinyasiiri lusiilulu kuri Abarahami na Isaki na Yakobi ko. Bukuri bahele kubvumina manyileele me. 12Ha yulu wunu Kalebi, mwaana Yefune mu Kenidzi, na Yooswa, mwaana Nuuni. Bukuri baba banamitina mu Yaave." 13Yaave wabaka nkesi dzamakwa mu Iselili na wababvutula ku nsi yankatu, wabadyeengese mu mibvu makuumi mana natee kwawiiri kiseendu kyokinso kyayirikiri bubi ha miisu mya Yaave#32.13 Bit. 10-13 : Kumono 14.26-35.. 14Na lumalu, beenu bangaa-masumu, lutiiriri kuteleme ha kibeendu kya bataayi mu kubweese kubvulumuna nkesi dza Yaave ha yulu Iselili ! 15Bukuri mbuti beenu lubisiri kumunama, lo nde sa kanamitina mu kuyekele Iselili ku nsi yankatu, na sa kafuukisa baatu bobanso bamaba. »
16Baatu babo babweese kukokosolo kuri Moose mu kuleele ti : « Beetu mpaangu dza bibulu byantele tutiiriri kutuunga hamaha, na mabula ma baala beetu. 17Beetu-meene sa twaholo binwaanunu, mu kuwasula mu kweende ha mankula ma baala ba Iselili, natee kubatubuka ku kibeendu kyaaku ki badzakala. Baala beetu sa basaala mu mabula matsyaamuka mu kumakebe kuri baatu bangaa-nsi. 18Beetu sa twabvutuka ku manzo meetu, natee kutaambula mpisi muutu mu baala ba Iselili saala dyaandi. 19Ngo beetu tubaka saala kintwaari na bo mu simu dya Yorodaani dyamosi ko, bukuri saala dya beetu diri mu simu dya ku esete dya Yorodaani. » 20Moose waleele kuri bo ti : « Mbuti beenu lusiiri bubwo, luhoriri binwaanunu ha mankula ma Yaave mu kunwaana, 21na binwaani byobinso basabukiri Yorodaani ha mankula ma Yaave, natee kukabinga bataatu ha busu bwa nde, 22mbuti beenu lubvutukiri natee kuri nsi yeki mu lutumu lwa Yaave, lo beenu sa lwaluuluka ha busu bwa Yaave, na ha busu bwa Iselili. Lo nsi yimayi sa yaba ya beenu ha busu bwa Yaave. 23Ngo mbuti beenu lwahele kusa bubwo, lo lutobiri masumu kuri Yaave. Na yaabee ti sa lutolo masumu mamo. 24Tuungee kweenu mabula ma baala beenu, na mpaangu dza bibulu byeenu byantele. Ngo maludzoonsiri mu minwa myeenu luyelemini kumayirika. » 25« Baala ba Ngadi na ba Lubeni baleele kuri Moose ti : Bisari byaaku sa byayirika matumini mfumu. 26Baala na bakasi beetu, bibulu byeetu byobinso, sa biba hamaha mu mabula ma Ngaladi ; 27na bisari byaaku byobinso sa byaholo binwaanunu ha busu bwa Yaave, mu kweende ku mudziingu, bunu bwadzoonsiri mfumu. »
28Moose waha ntumunu, mu ntoono bo, kuri ngaanga-Nzaambi Elehadzari, kuri Yooswa, mwaana Nuuni, na kuri bakuutu ba makaanda ba kaanda dya baala ba Iselili. 29Moose waleele kuri bo ti : « Mbuti baala ba Ngadi na ba Lubeni, bahoriri binwaanunu na basabukiri Yorodaani mu kweende kintwaari na beenu ku mudziingu ha busu bwa Yaave, na mbuti nsi yeki mu lutumu lwa beenu, lo beenu sa lwabaha nsi ya Ngaladi. 30Ngo mbuti bahele kuholo binwaanunu mu kusabuka Yorodaani kintwaari na beenu, lo bo sa babaka saala ha kakati dya beenu ku nsi ya Kanaana. » 31Baala ba Ngadi na ba Lubeni babvutula na baleele ti : « Bisari byaaku sa byayirika mamo madzoonsiri Yaave. 32Beetu sa twasabuka na binwaanunu ha busu bwa Yaave mu kweende ku nsi ya Kanaana. Ngo butoto bwa saala dya beetu buri mu simu dya Yorodaani dyadimosi#32.32 Bit. 28-32 : Kumono Yos 1.12-15.. »
33Moose waha baala ba Ngadi na ba Lubeni, na ndaambu kaanda dya Manase, mwaana Yoosefi, nsi ya Syooni, mbyaasi ya bari Amori, na nsi ya Onge, mbyaasi ya Basaani, nsi na mabvula maandi, kintwaari na bitsuri bya mabvula mamudyengekele.
34Baala ba Ngadi batuunga Diboni, Ataroti, Arohere, 35Ateroti-Sofani, Yadzere, na Yongeboha, 36Bete-Nimera na Bete-Harani, mabvula mamakwa, na mpaangu mu ntoono bibulu byantele.
37Baala ba Lubeni batuunga Heseboni, Elehale, Kiryatayimi, 38Nebo, Baali-Mehoni di bayiinga nkuumbu, na Sibvima. Bateele mabvula ma batuungiri mu mankuumbu mamoono.
39Baala ba Makiri, mwaana Manase, bayende ku Ngaladi, badzika nsi na babinga bari Amori baba mu yo. 40Moose waha Ngaladi kuri Makiri, mwaana Manase, na wadzakala mu yo. 41Yahiri, mwaana Manase, wayende na wadzika manzo mangooto ma bo, na wamateele ti "manzo mangooto ma Yahiri". 42Nobahi wayende na wadzika Kenati na mabula mari bebele ; waha bvula nkuumbu ya nde-meene, Nobahi.
Alliance Biblique du Congo 2024