Lutaangu 34
34
Mandilu ma Kanaana
1Yaave wadzoonso kuri Moose na waleele ti : 2Tuma baala ba Iselili na baleele ti : Bu lukoto mu nsi ya Kanaana, nsi yi lutaambula bunu Saala, nsi ya Kanaana bunu buri mandilu :
3Ndilu nsi beenu ku suude, yabaandika ku nsi yankatu ya ku Tsini natee ku teke nsi ya Edomi. Ku esete ndilu ya beenu ku suude sa yayusuka ku teke mubu wa mungwa. 4Sa ya koondoko natee ku suude ku mulaandu wa Akarabimi, na sa yayookolo ku Tsini mu kubwa ku suude dya Kadese-Bareneya, na sa yipalila ku Hasari-Adari mu kutubuka ku Atsemoni. 5Kubaandika ku Atsemoni, ndilu sa yeende ku muwiila wa Ngipiti#34.5 Mudzuumbu wa lukwaaku wuri ku Ngipiti : Kampe mu lumalu wa wadi Ariki, mudzuumbu wayende kubwa mu mubu wa Mediterane, mu lutatu lwa makuumi mpoomo ma bitaki, mu mpele ya ku baanda dya Ngadza., na kutubuka ku mubu.
6Ndilu ya ku wesete sa yaba mubu wamunene kuri beenu, yiyo yiba ndilu beenu ya ku wesete.
7Yimayi yiba ndilu beenu ku noode, kuholosono ku mubu wamunene, natee ku mulaandu wa Hori#34.7 Mulaandu wahele kuyabikina, ngo wuri nsobokoso na wubadzoonsolo mu 20.22-29 na mu 33.37-41.. 8Kubaandika ku mulaandu wa Hori, beenu sa lwasa ndilu natee ku Lebo-Hamati, na sa yatubuka ku Sedadi. 9Ndilu sa yayooko ku Dziferoni mu kupala ku Hasari-Enani. Yiyo yiba ndilu ya beenu ya ku noode.
10Beenu sa lwasa ndilu yeenu ku mpele ya ku esete dya Hasari-Enani natee ku Sefami. 11Kubaandika ha Sefami, ndilu sa yasunduka ku Libila, ku esete dya Ayini, na sa yasunduka mu kutuula ku beenge diri ku esete dya dyaanga dya Kinerete, 12ndilu sa yisunduka ku Yorodaani mu kupala ku mubu wa mungwa.
« Yiyo sa yaba nsi yeenu, bunu buri mandilu madyengekele kwokunso. »
13Moose watuma baala ba Iselili, waleele ti : « Yiyo ngo nsi yi lwataambiri beenu bunu saala, mu kukabula mu wari, bunu bwatumini Yaave, kuri makaanda wa na ndaambu kaanda#34.13 Kumono 26.52-56 ; 33.54 ; Yos 14.1-2.. 14Bukuri baala ba kaanda dya Lubeni na Ngadi, na baala ba ndaambu ya kaanda dya Manase, bahoriri saala dya bo, bunu buri makaanda ma bataayi baaku. 15Makaanda moolo na ndaambu kaanda yimosi bahoriri saala dya bo mu simu dyamosi dya Yorodaani ku lubakala lwa Yeriko, kupalilaa ntaangu#34.15 Kumono 32.33.. »
Muloongo mankuumbu ma baatu bakabula
16Yaave waleele kuri Moose ti : 17« Mamama ngo mankuumbu ma baatu bakabula nsi : Ngaanga-Nzaambi Elehadzari na Yooswa, mwaana Nuuni. 18Mu mpisi kaanda sa lwaholo mukuutu mosi mu kukabula nsi. 19Mamama ngo mankuumbu ma bakuutu :
Mu kaanda dya baala ba Yuuda : Kalebi, mwaana Yefune ;
20mu kaanda dya baala ba Simehoni : Semweli, mwaana Amihude ;
21mu kaanda dya baala ba Benyami : Eledadi, mwaana Kiseloni ;
22mu kaanda dya baala ba Daani : Buki, mwaana Yongeli ;
23mu kaanda dya baala ba Manase, mwaana Yoosefi : Hanyeli, mwaana Efodi ;
24mu kaanda dya baala ba Efarayimi : Kemweele, mwaana Sifetani ;
25mu kaanda dya baala ba Dzabuloni : Elisafani, mwaana Parenaki ;
26mu kaanda dya baala ba Isakari : Paletyele, mwaana Adzani ;
27mu kaanda dya baala ba Aseere : Ahihudi, mwaana Selomi ;
28mu kaanda dya baala ba Nefetali : Pedaheli, mwaana Amihude. »
29Bamaba batumini Yaave mu kukabila saala kuri baala ba Iselili ku nsi ya Kanaana.
Alliance Biblique du Congo 2024