Lutaangu 31
31
Mudziingu kuri ba Madyaani
1Yaave wadzoonso kuri Moose waleele ti : 2« Bvutula kitete kuri ba Madyaani#31.2 Kumono Kik 25, wungu-wungu Kik 25.17-18. ; ha mambisa haho ye sa bvuutuna na baatu baaku batekesele. » 3Moose wadzoonso kuri Iselili, waleele ti : Beenu binwaani, yirimee mu kweenwaanisa Madyaani, mu kubabvutula kitete kya Yaave. 4Sa lwaheeke nkama kuumi dza babakala ku buyongolo mu mpisi kaanda, mu makaanda momanso bya Iselili.
5Mpisi kaanda dyasoolo binwaani 1 000, mu bobanso binwaani byaba 12 000. 6Moose waheeke fuunda dimosi mu mpisi kaanda, dyayende ku mudziingu kintwaari na ngaanga-Nzaambi Pinehasi, mwaana Elehadzari, wanata bitotolo byangisi na mamvumvuri ma kusika#31.6 Bitotolo byangisi : Kampe Urime na Tumimi (kumono Mpa 28.30 na matina) ; mamvumvuri : Kumono 10.9.. 7Bo banwaanaa mudziingu na Madyaani, bunu bwatumini Yaave kuri Moose, badzusa babakala bobanso. 8Badzusa bambyaasi bataanu ba Madyaani ha yulu bamvuumbi bakaka : Ebvi, Lekemi, Suri, Huri na Lebva. Badzusa se Balahami, mwaana Behori, mu mbeesi yayila. 9Baala ba Iselili banata bakyeetu na baala ba Madyaani ku bunkutu, na mampuumbu ma bibulu, na busina bwobunso bu badzikiri. 10Bo bayoko mabvula momanso ma babadzakilaa na bibeendu bya manzo mangooto byaaku byobinso. 11Banata busina bwobunso bwa baatu na bwa bibulu bu badzikiri. 12Bo batwaala bankutu na busina bu badzikiri kuri Moose na ngaanga-Nzaambi Elehadzari, na kaanda dyodinso dya baala ba Iselili ku nzo yangooto yiri ku kibiti kya Mohabi, bebele na Yorodaani ku Yeriko.
13Moose na ngaanga-Nzaambi Elehadzari, na bakuutu bobanso ba kaanda, bapala mu kubabwaana ku mambisa ma kibeendu. 14Moose wabaka nkesi mu binati bya binwaani na bamfumu ba fuunda dimosi, na ba nkama mosi, bafumini ku mudziingu. 15Moose wabaleele ti : Beenu luhemisinyee bakyeetu bobanso baba mwooyo ? 16Bo bari, mu maampu ma Balahami, makukimini baala ba Iselili mu kusumuka kuri Yaave, mu musamu Pehori#31.16 Maampu ma mu Kihebereho ma kitsuri kikyo mahele kukyensikile kwalaka. - Mu mandoongi ma Balahami : Kik 25 (musamu Pehori) kyahele kudzoonsolo mu kisalu kya Balahami kikyo.; mu bubwo kiyoolo kyabwiiriri mukaangu Yaave. 17Lumalu dzusee baala bababakala na babakyeetu bayaari babakala na bakyeetu. 18Ngo hemesee baala bobanso babakyeetu, bahele kuyaaba babakala, baba mwooyo mu beenu. 19Babo badzusirye na ba beleminee mvuumbi, badzakala biluumbu nsaamu ku mambisa ma nzo yangooto. Luyelemini kuba batsyeemeke mu kiluumbu kyabitatu na kyansaamu, beenu na bankutu beenu. 20Tumi lutsyeemese mansaanda meenu se, na bitotolo byobinso bya mikaanda mya bibulu, bya myoosi mya bantaba na bya miti.
21Ngaanga-Nzaambi Elehadzari waleele kuri binwaani bafumini ku mudziingu ti : Yimayi ngo ntumunu yaheeri Yaave kuri Moose : 22Woolo, palata, nsoongo, kitari kisulumuka na yele, 23mpisi kitotolo kihelaa kuya mu mbaawu, sa lwatuba kyo ku mbaawu, na sa kyatsyeeme. Ngo mu maampa matsyeeme luyusula masumu ma byobinso bihele kweende ku mbaawu. Sa lwabituba mu maampa. 24Luyelemini kuswaaka mansaanda meenu mu kiluumbu kyansaamu. Beenu sa lwatsyeemeke na kubweese kukoto ku manzo mangooto.
Nkabulu busina
25Yaave waleele kuri Moose : 26« Ye-meene na ngaanga-Nzaambi Elehadzari, na bakuutu ba kaanda dya Iselili, taangee baatu babatweesi mu bunkutu na bibulu. 27Ye sa kabula bi badzikiri mu bikuuku byoolo, kimosi kya binwaani babeeri ku mudziingu, kyakaka kuri kaanda dyodinso. 28Ye sa yusula ndaambu ya Yaave mu kikuuku kya binwaani babeeri ku mudziingu. Muutu mosi mu nkama taanu dza baatu, kibulu kimosi mu nkama taanu dza bibulu, mu bibulu byabinene, bampuunda na bibulu byantele. 29Ye sa waholo ndaambu yiyo na sa waha yo kuri ngaanga-Nzaambi Elehadzari, bunu kikuuku kibayusiri kya Yaave. 30Mu ndaambu ya baala ba Iselili, ye sa waholo muutu mosi mu makuumi mataanu ma baatu, kibulu kimosi mu makuumi mataanu ma bibulu, mu bibulu byabinene, bampuunda, na bibulu byantele. Sa waha byo kuri Baleevi bari mu kusala mu Nzo Yaave. »
31Moose na ngaanga-Nzaambi Elehadzari bayirika bunu bwatumini Yaave kuri Moose. 32Mu bibahoriri ku mudziingu, byasaala mu byadzikiri bayongolo byaba 675 000 ma bibulu byantele, 3372 000 ma bibulu byabinene, 3461 000 ma bampuunda, 35na bakyeetu 32 000 bakiri kuyaaba pe wamubakala. 36Ndaambu mu kikuuku kya binwaani baba ku mudziingu kyaba 337 500 dza bibulu byantele, 37kikuuku ki bayusukiri Yaave kyaba 675 byantele ; 38bibulu byabinene 36 000, na bibayusikiri Yaave byaba 72 ; 39bampuunda baba 30 500, ba bayusukiri Yaave 61 ; 40baatu 16 000, babawuungikiri Yaave baba 32. 41Moose waha kikuuku ki bayusikiri Yaave kuri ngaanga-Nzaambi Elehadzari, bunu bwamutumini Yaave. 42Ndaambu ya baala ba Iselili ya wuungiri Moose mu bya binwaani, 43yaba 337 500 dza bibulu byantele, 4436 000 ma bibulu byabinene, 45bampuunda 30 500, 46na baatu 16 000. 47Mu ndaambu ya baala ba Iselili, Moose wayusula muutu mosi mu makuumi mataanu ma baatu, kibulu kimosi mu makuumi mataanu ma bibulu, na waha busina bubwo kuri kaanda dya Baleevi disalaa mu Nzo Yaave, bunu bwamutumini Yaave.
Kikabu kya ntiilu-mutima kuri Nzaambi
48Binati bya mafuunda ma binwaani, bakuutu ba binwaani ba mpuumbu ya fuunda na ya nkama, bakokosolo kuri Moose. 49Bamuleele ti : « Beetu twasiiri lutaangu lwa binwaani babeeri mu lutumu lwa beetu, kuri ti mosi ko wayusuka. 50Beetu twaheeri bikabu bya Yaave bibakiri mpisi muutu mu bitotolo byawoolo : Misaangu, miluungu, ngele, binzembele na misaangu mya mu nkiingu, mu kuswaaka bubi bweetu ha busu bwa Yaave. »
51Moose na ngaanga-Nzaambi Elehadzari bataambula bitotolo byobinso bibyo byayirika mu woolo kuri bo. 52Woolo dyodinso dya yusiri bamfumu ba mafuunda na bamfumu ba mankama kuri Yaave dyaba kiteesu kya 16 750. 53Bayongolo basiiri kwiibi kwahele nsoni mpisi nde mu ntoono nde-meene. 54Moose na ngaanga-Nzaambi, Elehadzari, baholo woolo dya bamfumu ba nkama kuumi na ba nkama na badinata ku nzo yangooto ya mbwanukunu, mu mbambukulu mwooyo mu ntoono bari Iselili ha busu bwa Yaave.
Alliance Biblique du Congo 2024