Lutaangu 30
30
1Moose #30.1 Mu mbangukulu dzamosi, Bit. 1-17 bya Kik 30 byatina mu 29.40-30.16. waleele momanso kuri baala ba Iselili bunu bwamutumini Yaave.
Ngisi mu bitaasi
2Moose wadzoonso kuri bakuutu ba kaanda dya baala ba Iselili, waleele ti : Mamama maampu matumini Yaave : 3Mbuti wamubakala siiri kitaasi kuri Nzaambi, bunu pele labiri maalu mu kuyirika ntoono, lo nde kukoonoso pe makaleeriri, ngo yelemini kuyirika momanso ma katsimini kuyirika#30.3 Kumono Ngi 23.22-24 ; Mat 5.33..
4Mbuti mwaana wamukyeetu siiri kitaasi kuri Yaave, bunu pele labiri maalu kuri wakiri mu nzo taayi mu butuuti bwaandi, 5na taayi dyaandi yukiri bitaasi byaandi na maalu ma kalabiri, ngo wahele kumuleele ntoono, lo bitaasi byaandi na maalu maandi sa biba byatswiika. 6Ngo mbuti taayi dyaandi wumutungukiri mu kiluumbu kikayukiri bitaasi na maalu ma kalabiri, lo nde wahele kukaangama mu kutswiikisa makaleeriri. Yaave sa kamusiila mpemisi, bukuri taayi dyaandi tungukiri mwaana waandi.
7Mbuti ntuumba weki wakweele, na wuri na bitaasi bya maalu ma kalabiri mu munwa waandi, 8na kuri ti bayaabisiri mulumi waandi, mbuti wumawu wahele kumuleele ntoono ti mosi kiluumbu kibamuyaabisiri, bitaasi byaandi sa byaba byatswiikima, manzeengulu makatumumini nde lo mari matswiikima. 9Ngo mbuti mulumi waandi wumutungukiri mu kiluumbu kikayukiri bitaasi na maalu ma kalabiri, lo nde wahele kukaangama mu kutswiikisa makaleeriri. Yaave sa kamusiila mpemisi.
10Bitaasi bya mufwiiri wamukyeetu, bunu pele bya wamukyeetu wafwa makweele biyelemini kuba byatswiikisa bunu bu kadzeengiri.
11Ngo mbuti mu nzo mulumi nde kasiiri bitaasi, bunu pele kalabiri maalu, 12mbuti mulumi waandi wayukiri, ngo wahele kumutungukila ha busu bwa nde, lo bitaasi byaandi na maalu maandi sa byaba byatswiikisa. 13Ngo mbuti mulumi koonisini makapalisiri mu munwa waandi mu kiluumbu kikayukiri, lo nde wahele kukaangama mu kutswiikisa makaleeriri, bukuri mulumi tungukiri mukasi waandi. Yaave sa kamusiila mpemisi. 14Bitaasi na nzeengulu dzodzinso dzi kasiiri mu kukoto loomi, mulumi wuri na miswa mu kudzitswiikisa, bunu pele mu kudzikoonoso. 15Ngo mbuti mulumi wawura natee mu kiluumbu kinama, lo nde tswiikisiri bitaasi bunu pele nzeengulu dzodzinso. Bukuri wawura ha mankula ma nde mu kiluumbu kikayukiri. 16Ngo mbuti mulumi wadzikoonisiri ha mambisa ma kiluumbu kikayukiri, lo nde sa kanata bubi bwaandi.
17Mamo mangisi matumini Yaave kuri Moose, ha kakati dya mulumi na mukasi, dya taayi na mwaana wamukyeetu mu butuuti bwaandi mu nzo taayi.
Alliance Biblique du Congo 2024