Lutaangu 29
29
f. Kiluumbu kya mamvumvuri
1« Mu ngoondo yansaamu, mu kiluumbu kyatete kya ngoondo#29.1 Kumono Bal 23.24 na matina., sa lwabvuutuna mu kusaambila me Yaave. Luri nsalulu kisalu ti kimosi ko. Sa kyaba kiluumbu kya kufula mamvumvuri. 2Beenu sa lwaha bikabu bya kuyoko bituumbula mfuku yayibwe kuri Yaave : Ngoombo mosi yamulumi, kimeeme kimosi kyamulumi, baala ba bimeeme nsaamu bya mvula mosi, bibulu byobinso byahele na bipfuumbu. 3Mu mpisi kibulu sa lwa teeteke bikabu bya bikunu. Mu mpisi ngoombo sa lwa teeteke bikuuku mu kuumi bitatu bya nkwaasa fufu, na maasi. Mu kimeeme kimosi, bikuuku mu kuumi byoolo, 4mu baala ba bimeeme nsaamu, kikuuku kimosi mu mpisi mwaana kimeeme ; 5na ntaba mosi mu kikabu kya mpemusunu masumu, mu kusa nsyeemusunu mu beenu ; 6ha yulu kikabu kya mpisi ngoondo na kikabu kyaandi kyabikunu, kikabu kya mpisi kiluumbu na kikabu kyaandi kyabikunu na bya malu byaaku, bunu buri mikele. Kikyo kikabu kya kuyoko kituumbula mfuku yayibwe kuri Yaave. »
g. Kiluumbu kyakinene kya mpemusunu masumu
7« Mu kiluumbu kyakuumi, mu ngoondo yansaamu, sa lwabvuutuna mu kusaambila, sa lwakoto loomi, kwahele kusala kisalu ti kimosi. 8Sa lwayoko kikabu kituumbula mfuku yayibwe kuri Yaave, ngoombo mosi yamulumi, kimeeme kimosi kyamulumi, baala ba bimeeme nsaamu bya mvula mosi, bibulu byobinso byahele na bipfuumbu. 9Mpisi kibulu sa kyaba kyabvuuta na kikabu kya fufu dyasaanga na maasi : Bikuuku bitatu mu kuumi bya fufu mu ngoombo, bikuuku byoolo mu kuumi bya fufu mu kimeeme, 10kikuuku kimosi kyakuumi kya fufu, mu mwaana kimeeme mu byo nsaamu ; 11na ntaba mu kikabu kya mpemusunu masumu, ha yulu kikabu kya mpemusunu masumu kyaha mu ntoono nsyemusunu, kikabu kya kuyoko kya mpisi ntaangu, kikabu kyabikunu na byaaku bya malu#29.11 Bit. 7-11 : Kumono Bal 16 ; 23.27-32.. »
h. Munkeembu wa manzo mangooto
12Mu kiluumbu kyakuumi na bitaanu mu ngoondo yansaamu, sa kwaba lukutukunu lwangisi : Yaa lusala mpisi kisalu ko, beenu sa lwa dumusa munkeembu mu ntoono ya Mfumu mu biluumbu nsaamu#29.12 Badzoonso ha mu munkeembu wa manzo mangooto wubateele se ti munkeembu wa kukutukisa bikunu, kumono Mpa 23.16 ; 34.22 ; Bal 23.33-43 ; Ngi 16.13-15.. 13Sa lwaha bikabu bya kuyoko bituumbula mfuku yayibwe kuri Yaave : Bangoombo kuumi na batatu babalumi, bimeeme byoolo, baala ba bimeeme kuumi na bana ba bvula mosi, bibulu byobinso sa byaba lo byahele na bipfuumbu. 14Mpisi kibulu sa kyaba kyabvuuta na kikabu kya fufu dyasaanga na maasi. Bikuuku bitatu mu kuumi bya fufu mu mpisi ngoombo, mu bangoombo kuumi na batatu, bikuuku byoolo mu kuumi bya fufu mu mpisi kimeeme. 15Kikuuku kimosi kyakuumi mu mpisi mwaana kimeeme mu byo kuumi na bina ; 16na ntaba mosi mu kikabu kya mpemusunu masumu, ha yulu kikabu kya mpisi kiluumbu, kikabu kyaandi kyabikunu na kikabu kya malu.
17Kiluumbu kyabyoolo, bangoombo kuumi na boolo, balumi ba bimeeme boolo na baala ba bimeeme kuumi na bana ba mubvu mosi bahele na kipfuumi, 18na kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka bunu buri mikele ; 19na ntaba mosi mu mpemusunu masumu ha yulu kikabu kya mpisi kiluumbu, kikabu kyabikunu na nyitukulu malu.
20Mu kiluumbu kyabitatu bangoombo kuumi na mosi babalumi, bimeeme byoolo byabalumi, baala ba bimeeme kuumi na bana ba mubvu mosi bahele na kipfuumi, 21kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka, bunu buri mikele ; 22na ntaba mosi yamulumi mu mpemusunu masumu, ha yulu kikabu kya mpisi kiluumbu, kikabu kyabikunu na kya malu.
23Mu kiluumbu kyabina, bangoombo kuumi babalumi, bimeeme byoolo byabalumi, baala ba bimeeme kuumi na bana ba mubvu mosi bahele na kipfuumi, 24kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka, bunu buri mikele ; 25na ntaba mosi yamulumi mu mpemusunu masumu, ha yulu kikabu kya mpisi kiluumbu, kikabu kyabikunu na kya malu.
26Mu kiluumbu kyabitaanu, bangoombo wa babalumi, bimeeme byoolo byabalumi, baala ba bimeeme kuumi na bana ba mubvu mosi bahele na kipfuumi, 27kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka, bunu buri mikele ; 28na ntaba mosi yamulumi mu mpemusunu masumu, ha yulu kikabu kya mpisi kiluumbu, kikabu kyabikunu na kya malu.
29Mu kiluumbu kyabisaamunu, bangoombo mpoomo babalumi, bimeeme byoolo byabalumi, baala ba bimeeme kuumi na bana ba mubvu mosi bahele na kipfuumi, 30kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka, bunu buri mikele ; 31na ntaba mosi yamulumi mu mpemusunu masumu, ha yulu kikabu kya mpisi kiluumbu, kikabu kyabikunu na kya malu.
32Mu kiluumbu kyansaamu, bangoombo nsaamu babalumi, bimeeme byoolo byabalumi, baala ba bimeeme kuumi na bana ba mubvu mosi, bahele na kipfuumi, 33kikabu kyabikunu na bya malu mu bangoombo, balumi ba bimeeme na baala ba bimeeme, mu lutaangu lwakuka, bunu buri mikele ; 34na ntaba mosi yamulumi mu mpemusunu masumu, ha yulu kikabu kya mpisi kiluumbu, kyabikunu na kya malu.
35Mu kiluumbu kyampoomo, sa lwabvuutuna, kwahele kusala kisalu ti kimosi. 36Sa lwaha bikabu bya kuyoko bituumbula mfuku yayibwe kuri Yaave : Ngoombo mosi, kimeeme kimosi, baala ba bimeeme nsaamu ba mubvu mosi, byobinso byahele na bipfuumbu. 37Kintwaari na bikabu bya fufu, na bya malu mu ngoombo, mu kimeeme, mu baala ba bimeeme, bunu buri mangisi ; 38na ntaba mosi mu mpemusunu masumu, ha yulu bikabu bya mpisi kiluumbu, bikabu byaandi bya bikunu na bikabu bya malu.
39« Beenu sa lwaha bikabu byobinso bibyo kuri Yaave, mu ntaangu ya minkeembu, bikabu bya kukukisa nsiilulu, bikabu byantiilu-mutima, bikabu bya kuyoko, bikabu bya fufu, bikabu bya malu na bikabu bya kiyeengi. »
Alliance Biblique du Congo 2024