Lutaangu 28
28
Mangisi mu ntoono bikabu
1Yaave waleele kuri Moose ti : 2Ha lutumu kuri baala ba Iselili : Beenu sa lwampa mu ntaangu yadzeenge, bimbwanga, mpa yaami, bikabu bya kuyoko bi tuumbulu mfuku yayibwe.
3« Baleele ti bikabu bya kuyoko mu kuha kuri Yaave bimabi : Baala ba bimeeme boolo ba mubvu mosi, bahele na kipfuumi, mu mpisi kiluumbu, mu kikabu kya kuyoko mu mpisi ntaangu. 4Mwaana kimeeme mosi wa kuyoko mu kipari, na waboolo mu nsinsika, 5ha kimosi na makilo matatu ma fufu dyasaanga na ndaambu litiri dya maasi mamoono. 6Kikyo kikabu kya kuyoko mu mantaangu momanso, bunu ki babahaanaa ku mulaandu wa Sinayi, kikabu kyayoko, kituumbulaa mfuku yayibwete kuri Yaave. 7Kimeeme kyatete sa kyaba kyabvuuta na malu ma batsyaamuna mu ndaambu mukuri, sa batsyaamina malu makolo munsa nzo ya lusaambulu bunu kikabu kuri Yaave. 8Kikabu kya kimeeme kyabyoolo kya kuyoko mu nsinsika, kintwaari na bikabu bya bikunu, munu mu kipari. Tumi tsyaamina malu na kuyoko kikabu kituumbula mfuku yayibwe kuri Yaave. »
b. Kiluumbu kya saba
9« Mu kiluumbu kya saba, baala ba bimeeme boolo ba mubvu mosi, bahele na bipfuumbu, ha kimosi na kikabu kya makilo masaamunu ma fufu dyasaanga na maasi, na kikabu kyabikunu, na malu ma kutsyaamina. 10Kikyo kikabu kya kuyoko mu mpisi kiluumbu kya saba, kikyo kibabweese ha yulu bikabu bya mpisi kiluumbu na nsyamununu malu. »
c. Kiluumbu kyatete kya ngoondo
11« Ha mbandukulu mpisi ngoondo, sa lwa yokolo Yaave bangoombo boolo babalumi, kimeeme kimosi kyamulumi, na baala ba bimeeme nsaamu ba mubvu mosi, bahele na bipfuumbu. 12Mu mpisi ngoombo sa babvuuta bikuuku bitatu mu kuumi bya fufu mu bikabu bya bikunu, na maasi. Mu kimeeme, bikuuku byoolo mu kuumi bya fufu dyasobo, na maasi, 13na mu mpisi mwaana kimeeme, kikuuku kyakuumi kya fufu, na maasi. Kikyo kikabu kya kuyoko, kituumbula mfuku yayibwe kuri Yaave. 14Mu kikabu kya malu, mpisi ngoombo mikuru mitatu, kimeeme mikuru myoolo, na ndaambu mu kuri mu mpisi mwaana kimeeme. Bibyo bikabu bya kuha ha mbandukulu mpisi ngoondo mu mubvu. 15Luyelemini se kuha ntaba yamulumi kuri Yaave, mu kikabu kya mpemusunu masumu, ha yulu kikabu kya biluumbu byobinso na kya malu. »
d. Munkeembu Paaka
16Mu ngoondo yatete, mu kiluumbu kyakuumi na bina mu ngoondo, sa lwakeembele Paaka mu ntoono Yaave#28.16 Kumono Mpa 12.1-13 na matina.. 17Mu kiluumbu kyakuumi na bitaanu kya ngoondo yiyo, kiluumbu kya munkeembu : Sa lwadya mampa mahele lufunusu mu biluumbu nsaamu. 18Kiluumbu kyatete, sa kwaba lukutukunu lwangisi : Beenu lo lwahele kusa kisalu ti kimosi. 19Sa lwaha kikabu kya kuyoko kuri Yaave, bangoombo boolo babalumi, kimeeme kimosi kyamulumi, baala ba bimeeme nsaamu ba mubvu mosi na bahele na bipfuumbu. 20Mu mpisi ngoombo sa babvuuta bikuuku bitatu mu kuumi bya fufu mu bikabu bya bikunu, na maasi. Mu kimeeme, bikuuku byoolo mu kuumi bya fufu, na maasi, 21na kikuuku kyakuumi mu mwaana kimeeme kimosi mu bo nsaamu. 22Ntaba mosi mu kikabu kya mpemusunu masumu, mu kusa nsyemusunu yeenu. 23Sa lwaha byobinso ha yulu kikabu kya kuyoko mu minkya, mambangukulu ti kikabu kya mpisi ntaangu. 24Mu mpisi kiluumbu, mu biluumbu nsaamu bya munkeembu wa mampa mahele lufunusu, sa lwaha kikabu kya kuyoko kituumbula mfuku yayibwe kuri Yaave. Sa bakiha ha yulu kikabu kya biluumbu byobinso na kya malu. 25Mu kiluumbu kyansaamu, sa kwaba kuri beenu mbila yangisi : Beenu luri nsiila kisalu ti kimosi ko.
e. Munkeembu nsundukulu Mpeeve
26« Kiluumbu kya bimbutu byatete#28.26 Paaka : Bateelaa se ti munkeembu wa nkutukusu bikunu, kumono Mpa 23.16 ; 34.22 ; Bal 23.15-21 ; Ngi 16.9-12., mu ntaangu yiluha bikabu byamoono bya bikunu kuri Yaave, mu munkeembu wa miingu, beenu sa lwabvuutuna mu kusaambila Yaave, kwahele kusala. 27Sa lwaha kikabu kya kuyoko kituumbula mfuku yayibwe kuri Yaave : Bangoombo boolo babalumi, kimeeme kimosi, baala ba bimeeme nsaamu ba mubvu mosi. 28Mu mpisi ngoombo sa bateeteke bikuuku bitatu mu kuumi bya nkwaasa fufu mu kikabu kyabikunu, na maasi. Mu kimeeme sa bateeteke bikuuku mu kuumi byoolo, 29mu mpisi mwaana kimeeme, kikuuku kimosi kyakuumi, mu byo nsaamu ; 30na ntaba mosi, mu kikabu kya mpemusunu masumu mu ntoono beenu. 31Beenu sa lwaha bikabu bibyo ha yulu kikabu kya biluumbu byobinso, kyabvuuta na kikabu kya bikunu. Kuha bibulu byahele na bipfuumbu na malu ma kutsyaamina. »
Alliance Biblique du Congo 2024