Lutaangu 27
27
Miswa mya saala dya bakyeetu
1Baala babakyeetu bayisa kumono Tselofade, mwaana Heferi, mwaana Ngaladi, mwaana Makiri, mwaana Manase mu kaanda dya Manase, mwaana Yosefi. Mamama ngo mankuumbu maaku : Mahela, Nowa, Hongela, Mileka na Tiretsa. 2Bayende kuteleme ha mankula ma Moose, na ngaanga-Nzaambi Elehadzari, na bakuutu ba kaanda dyodinso ha nkotolo nzo yangooto ya mbwanukunu. Baleele ti : 3« Taayi dya beetu dyafwiiri ku nsi yankatu. Waba wahele mu mpuumbu baatu babvuutini na mpuumbu ya Kore, mu kutungukila Yaave, mu masumu ma nde-meene kafwiiri. Ngo kasiiri buta babakala ko. 4Heki mu nki nkuumbu taayi dya beetu yiba yayusula mu kaanda dyaandi ? Bukuri wahele na mwaana wamubakala ? Wutuha ndaambu saala ha kakati dya bampaangi ba taayi dya beetu ! »
5Moose wanata musamu bo ha mankula ma Yaave, 6Yaave waleele kuri Moose ti : 7« Baala ba Tselofade babakyeetu bari na buungu, sa wubaha butoto bunu saala ha kakati dya bampaangi ba taayi dyaaku, sa waha saala dya taayi dyaaku kuri bo#27.7 Kumono mu 36.2.. 8Kuri baala ba Iselili, ye sa dzoonso mu kuleele ti : "Mbuti muutu fwiiri kwahele kusiisa mwaana wamubakala, lo sa lwaha saala dya nde kuri mwaana waandi wamukyeetu. 9Mbuti wahele na mwaana ti mosi wamukyeetu, lo sa lwaha saala dya nde kuri bampaangi baandi. 10Mbuti wahele na mpaangi ti mosi, lo sa lwaha saala dya nde kuri baala ba taayi dyaandi. 11Mbuti kwahele baala ba taayi, lo sa lwaha saala dya nde kuri mwisi-kaanda wubvuri bebele na nde mu kaanda dyaandi ; wunde yelemini kuholo dyo. Sa yaba bunu ngisi yiha miswa mu baala ba Iselili, bunu bwatumini Yaave kuri Moose. »
Yooswa bamusoolo mu kuyiingisa Moose
12Yaave waleele kuri Moose ti : Toomboko ku yulu mulaandu wumawu wa Abarime#27.12 Mulaandu wa Abarime wayalumuka mu nkoto ya lubakala lwa Yorodaani na ya mubu wa mungwa., na talila nsi yi nyaha me kuri baala ba Iselili. 13Ye sa wuyitalila, na ha mambisa haho ye sa wafwa, mu kuba kintwaari na baatu baaku, buni bwaba Aaroni mpaangi yaaku. 14Bukuri, beenu lwahele kubvumina ntumunu dza me ku nsi yankatu ya Tsini, mu ntaangu yiri mukaangu wa yumisini me : Lwahele kusoongo bungisi bwaami ha miisu myaaku, mu ntoono maampa ma Meriba, ku Kadese, ku nsi yankatu ya Tsini#27.14 Ntoono yabwiiri ku Meriba : Kumono 20.1-13. - Bit. 12-14 : Kumono Ngi 3.23-27 ; 32.48-52..
15Moose wadzoonso kuri Yaave, waleele ti : 16« Hemese Yaave Nzaambi yamwooyo muyiriki byobinso, kasoolo muutu wukasuusa ha mankula ma kaanda, 17wupala na wukwiisa ha mankula ma bo, wubapalisa na wubakotoso, mu kuri ti kaanda dya Yaave dihele kuba bunu bimeeme byahele na mutari#27.17 Kumono mu 1 Ba 22.17 ; Edz 34.5 ; Mat 9.36 ; Mal 6.34.. » 18Yaave waleele kuri Moose ti : « Holo Yooswa#27.18 Kumono Mpa 24.13., mwaana Nuuni, muutu wuri na Mpeeve. Ye sa teeteke myooko ha yulu nde. 19Sa wumutelemese ha mankula ma ngaanga-Nzaambi Elehadzari na ha busu bwa kaanda dyodinso, na sa wamuyakisa lutumu ha miisu mya bo. 20Ye sa wumuha ndaambu mpiinu dzaaku, mu kuri ti kaanda dyodinso dya baala ba Iselili di muywiila. 21Sa kateleme ha busu bwa ngaanga-Nzaambi Elehadzari, wumuloombolo nzeengulu mu Urime#27.21 Kumono Mpa 28.30 na matina. ha busu bwa Yaave. Mu lutumu lwa nde, Yooswa na kaanda dyodinso dya baala ba Iselili kintwaari na nde, bayelemini kupala na kukoto. » 22Moose wayirika momanso bunu bwatumini Yaave kuri nde. Nde waholo Yooswa, wamutelemese ha mankula ma ngaanga-Nzaambi Elehadzari na kaanda dyodinso. 23Nde wateeteke myooko myaandi ha yulu nde na wamuha lutumu, bunu bwadzoonsiri Yaave kuri Moose#27.23 Kumono Ngi 34.9..
Alliance Biblique du Congo 2024