Lutaangu 24
24
1Balahami bu kamono ti dyadibwe ha miisu mya Yaave mu kusakumuna Iselili, nde wabisa kweende mwa lutatu bunu bu kabasa hatete mu kubwanikina na Nzaambi. Ngo nde wasyeetele kidziri ku mpele yiri nsi yankatu. 2Balahami waseengele miisu myaandi na wamono bari Iselili batuunga manzo mangooto mu mpisi makaanda. Mpeeve Nzaambi yasunduka ha yulu nde. 3Wabaandika mu kudzoonso na waleele ti :
Bu leeriri Balahami, mwaana Behori,
bu leeriri muutu wuri na miisu mi monaa mansweeki#24.3 Wuri na miisu mi monaa mansweeki : Mbangukulu ntoono mu Kihebereho yahele kutswiikisa ; mbangukulu yamosi wuyaari kukaanga miisu (mu kuyirika kufyongokono nyabusulu kukati). - Maampu ma mu Kihebereho ma nkuma yi yoyinso mahele kukyensikile. ;
4Bu leeriri wunde wuyukaa mayaabisaana Nzaambi,
wumonaa masoongo Ngaa-makwa mu kimono-miisu,
na wudzuukilaa mu miisu myomyoolo.
5Mari mamabwe, manzo mangooto meenu, Yakobi,
bibeendu byeenu biluri mu kudzakala, Iselili !
6Buni miwiila miri mu kukuumba,
buni minyaka miri mu teke nyari ;
Buni miti mya alowese mya kunini Yaave,
buni mambuyu mari mu teke maampa ;
7maampa ma luulusiri bipaanyi byoolo,
na bikunu, kintwaari na maampa malaka.
Mbyaasi yaaku yidumini ha yulu Angangi#24.7 Angangi : Kumono 1 Sa 15.
na kimfumu kyaandi kyeki na mpinu.
8Nzaambi wubapalisiri mu Ngipiti
buni mampoko ma mpakasa mu nde.
Bo bari mu kudzusa baatu
bari mu kubanwaanisa,
na kukosono miyisi,
bari mu kubatobolo madyoongi.
9Babutuma na baneŋene buni bankosi.
Na wukwee babvulumuna ?
Babo ba kasakumuna baba basakumuna,
na ba kubulula mpopi baba kunsa mpopi#24.9 Buni bankosi : Kumono Mba 49.9. - Babo ba kasakumuna baba basakumuna : Kumono Mba 12.3. !
10Balaki wabaka nkesi dzalaka mu Balahami. Nde wamuŋaŋana na waleele kuri Balahami ti : « Mu kubulula mpopi mu bataatu me nyikuteerirye, ngo ye wubasakumuni nsakumunu tatu. 11Mu lumalu, bvutuka ku nsi yaaku. Me mbeeri ntiiri kukubvumina, ngo Yaave katiiri ko. »
Balahami yaabisiri mikwiisa mya mvuumfu mu Iselili
12Balahami waleele kuri Balaki ti : « Me nyatekisiri kuyaabisa kuri bantumu baaku ba wampeekiri ti : 13"Ti hayuku Balaki mpeeri bi kaluulusa mu nzo nde, mboongo na woolo, lo nyiri ndutila lutumu lwa Yaave ko, mu kuyirika mamabwete bunu pele mamabi. Maleele Yaave, manamo me nyelemini kuyaabisa." 14Lumalu me mvutukiri kuri kaanda dyaami. Ngo wasa me nyikulubula mu mayirika kaanda di kuri kaanda dya ye, mu biluumbu bikwiisa. » 15Nde wadzoonso maampu mamama :
Bumabu buleeriri Balahami, mwaana Behori,
bu leeriri muutu wuri na miisu mi monaana mansweeki#24.15 Kumono kit.3 na matina. ;
16Bu leeriri wunde wuyuka mayaabisaana Nzaambi,
wuyaabaa mansweeki ma Mwa-Mbete
wumonaa masoongo ngaa-mikaangu mu kimono-miisu,
na wudzuukilaa mu miisu myomyoolo.
17Me nyiri mu kumono, ngo kari mu ntaangu yi ko,
nyiri mu kutalila, ngo kari bebele ko :
Mbwetete yiri mu kupala mu Yakobi
muti wamunene telemini mu Iselili ;
na nde kosini mitu mya bari Mohabi
dzusiri baala ba Seti bobanso#24.17 Mbwetete : Kumono Mat 2.2. - Bakweyiima ba nsi : Maampu ma mu Kihebereho madzoonso mu bari mu mwooyo wa Seti ntoono yisoongo kampe ngwaana mu binkutu bya bakweyiima. - Ha yulu mutu : Mu maampu ma kisamari ; Kihebereho ha yulu butoto..
18Edomi sa yaba nsi yibari badzika,
Sehire sa yaba nsi yi badzika kuri bataatu baandi,
Iselili wuri mu kusa makwa.
19Wupala mu Yakobi wuri mu kutuma,
nde wuri mu kudzusa bakiri bamwooyo mu bvula.
Balahami wayaabisa mbwiilu bataatu ba Iselili
20Nde wamono Amaleke na wayaabisa maampu mamama :
« Baatu bari Amaleke batete, ngo manunu bo kufuukila. »
21Nde wamono bari Kaayini. Nde waleele maampu maandi :
Nsi yeenu yakuma,
dzaansa dyaaku dyasuusa ha yulu tari.
22Ngo sa bayoko Kaayini
ntaangu yikunata Asuri#24.22 Bari Asiri : Ntoono mu Kihebereho yisoongo se kikuutu kya bari Asuri, kyatina mu Mba 25.3. ku bunkutu.
23Nde waleele maampu maandi :
Nkya mpasi ! Na wuba mwooyo ntaangu yidiyirika Nzaambi ?#24.23 Maampu ma mu Kihebereho ma kitsuri kimaki mahele kukyensikile na mbangukulu yahele kutswiikisa. Mbangukulu yamosi : Na sa wubvuuka mu ntaangu yiyirika Nzaambi musamu waandi ?
24Ngo mabwaatu sa mafumina ku Kitimi,
sa banyoongoso Asuri, sa banyoongoso Heberi ;
nde se sa kadziimbila kwakinkulu !
25Balahami sa kabvutuka ku nzo yaandi, na Balaki se wayende ku kibari kyaandi.
Alliance Biblique du Congo 2024