Lutaangu 23
23
1Balahami waleele kuri Balaki : Tuungula me madziku nsaamu hamaha, ntwalikila se bangoombo nsaamu babalumi na bimeeme se nsaamu bya balumi. 2Balaki wayirika bwaleeriri Balahami. Balaki na Balahami baha bikabu kya ngoombo mosi na kimeeme kimosi ha yulu mpisi dziku. 3Balahami waleele kuri Balaki ti : « Teleme bebele na bikabu, na me nyeende mwaa lutatu, kampe Yaave sa kiisa mu kubwaana me na kunyaabisa musamu. Mpisi mamo ma kansoongo me sa nyikuyaabisa. » Nde watoomboko ha yulu mulaandu wahele bitiiti#23.3 Mulaandu wahele bitiiti : Mbangukulu ya ntoono mu Kihebereho yahele kutswiikisa.. 4Nzaambi wayisa kubwaana, Balahami wamuleele ti : « Me nyatuungiri madziku nsaamu na kuyoko ngoombo mosi na kimeeme kimosi mu mpisi dziku. » 5Yaave wasuusa maampu mu munwa Balahami na wamuleele ti : Bvutuka kuri Balaki, na dzoonso bubwo.
6Balahami wabvutuka kuri Balaki waba wateleme ha teke kikabu kyaandi na bakuutu bobanso ba Mohabi. 7Balahami wadzoonso maampu mamama :
« Kubaandika ku Arame, Balaki, mbyaasi Mohabi,
wantwaala ku milaandu mya kupalilaa ntaangu
ti nyeende mbulila mpopi, mu ntoono nde,
kuri Yakobi na kunwaanisa Iselili.
8Buri me nyibulula mpopi
kuri muutu wuri Nzaambi wahele kumubulula mpopi ?
Buri me nyinwaanisa baatu
bari Yaave wahele kubanwaanisa ?
9Kubaandika ku yulu matari me nyibamono,
kubaandika ku manto ma milaandu me nyibatalila ;
Tala, baatu babo basoolo mu kuba ha luteke,
bo bahele kuba bataanga
ha kakati dya mansi.
10Na wataangiri fundu-fundu dya Yakobi,
na lutaangu lwa matuti ma Iselili ?
Bubwe bumfwiiri me-meene
mu lufwa lwa basuunguma bakuka,
na nsukulu me yiba bunu ya bo. »
11Balaki waleele kuri Balahami ti : « Nki ye yirikiri me ? Me nyikutumisinye mu kubulula bataatu ba me mpopi, na mono ye wubabulumusi lusakumunu ! » 12Balahami wabvutula ti : « Buri nyihele kukebe mu kuleele mamo masiiri Yaave mu munwa waami ? »
Lusakumunu lwadzoolo lwa Balahami
13Balaki waleele kuri nde ti : « Me nyikuyingukiri, tweende na me ha kibeendu kikimi, ye sa wabamono . Hamaha ndaambu kitsu ye bee monaana#23.13 Mbangukulu yamosi ha kibeendu kikimi sa kiwumono yini ndaambu bari Iselili., kari bobanso ko. Wubabulula mpopi kukwo mu me. » 14Nde wamunata ha kibeendu kitalilaa bakebi#23.14 Ha kibeendu kitalilaa bakebi : Kampe nkuumbu kibeendu mu Kihebereho nseke ya Sofimi. ku nto mulaandu wa Pisenga. Nde watuunga madziku nsaamu na kuyoko ngoombo mosi yamulumi, na kimeeme kimosi kyamulumi mu mpisi dziku. 15Balahami waleele kuri Balaki ti : « Teleme hamaha, bebele na bikabu byaaku, me sa nyeende mwaa lutatu mu kubwaana Nzaambi. » 16Yaave wayisa mu kubwaana Balahami na wasoko maampu mu munwa waandi, waleele ti : Bvutuka kuri Balaki mu kuyaabisa bubwo. 17Balahami wabvutuka kuri Balaki waba wateleme bebele na bikabu byaandi, kintwaari na bakuutu ba Mohabi. Balaki wamufuula ti : « Nki Yaave kayaabisiri ? » 18Balahami waleele maampu mamama :
« Teleme, Balaki, na yuka !
Teke kutu dyaaku kuri me, mwaana Sipori !
19Nzaambi kari muutu ko mu kuwuna,
nde wahele mwaana muutu mu kuyiinga kitsimi.
Buri, makaleeriri lo kamayirika ko ?
Makadzoosiri lo kamatswiikisa ko ?
20Tala, me ntaamburi lutumu mu kusakumuna,
bukuri Mfumu wabasakumuna, me nyiri nyusukila lusakumunu lulwo ko.
21Nde wahele kumono bubi mu Yakobi,
wahele kumono nkwaamusu mu Iselili.
Yaave Nzaambi yaaku wuri kintwaari na bo,
ba mudumusaa bunu mbyaasi.
22Nzaambi wabapalisa mu Ngipiti
bunu mampoko ma mpakasa ma nde#23.22 Maampu mahele kukyensikile kwalaka mu Kihebereho, na mbangukulu yahele kutswiikisa..
23Bukuri mu Yakobi kuri mikisi ko
mu Iselili kuri nyabusulu mansweeki ko ;
mu ntaangu yayelemene sa bayaabisa
kuri Yakobi na kuri Iselili
mamo mayirikiri Nzaambi#23.23 Mu mbangukulu yamosi : Kuri muutu ko wusalila mpaani mu kunwaanisa bisi Iselili ; ha yulu kunu kuyaabisa momanso mayirikiri Nzaambi mu bo..
24Tala, kaanda dyateleme bunu nkosi yamukasi,
bunu nkosi yamulumi yateleme,
kabwaanaa tolo ko, natee kubakaakila mu kudya
na kunwa makila ma kibulu kibabakiri. »
25Balaki waleele kuri Balahami ti : « Ti hayuku ye wahele ku babulula mpopi, lo bubwe yaa wubasakumuna ko ! » 26Balahami wabvutula na waleele kuri Balaki ti : « Me nsiiri kukuleela ko ti momanso mayaabisa me Yaave sa nyimayirika ? »
Lusakumunu lwatatu lwa Balahami
27Balaki waleele kuri Balahami ti : « Dorokoro dyaaku, wasa mpisi tweende ku kibeendu kikimi. Kampe kukwo sa kwaba kwayelemene ha miisu mya Nzaambi, mu kuri ti ye wubabulula mpopi mu me. » 28Balaki wanata Balahami ku yulu mulaandu wa Pehori, wa talisina na nsi yankatu. 29Balahami waleele kuri Balaki mu kumutuungila madziku nsaamu, na kumutwalikila bangoombo nsaamu babalumi, na bimeeme nsaamu bya balumi. 30Balaki wayirika maloombiri Balahami. Nde wayoko ngoombo yamulumi yimosi na kimeeme kyamulumi kimosi mu mpisi dziku.
Alliance Biblique du Congo 2024