Lutaangu 22
22
Iselili kunsa bindende bya Mohabi
22–36
Balahami : Mbila ya mbyaasi Balaki
1Baala ba Iselili bayende na batuunga manzo mangooto ku bidende bya Mohabi, mu simu dya Yorodaani dyamosi, ku Yeriko. 2Balaki, mwaana Sipori, wamono momanso mayirikiri Iselili kuri bari Amori. 3Bari Mohabi bamono boomo ha mankula ma Iselili, bukuri baba balaka. Bo batekete ha mankula ma baala ba Iselili. 4Bari Mohabi baleele kuri bakuutu ba Madyaani ti : « Lumalu kaanda dimadi sa dyadya byobinso bya tudyengekele bunu bu dyaana bangoombo bitiiti biri ku kibiti. » Mu ntaangu yiyo Balaki, mwaana Sipori, waba mbyaasi ya Mohabi.
5Nde waheeke bantumu kuri Balahami, mwaana Behori, ku bula bwa Petori buri kuteke nyari ya mu nsi yiyo. Nde wamuheeke mukeensu mu kumuteele, na kumuleele ti : « Tala, kuri fundu-fundu dya baatu di naangukiri ku Ngipiti, di luulusiri nsi yoyinso na kutuunga manzo mangooto ha mankula ma me. 6Ha heki wasa, me nyikuyingukiri, bulula kaanda di mpopi mu ntoono me, bukuri dyo dibvuri makwa na me, kampe me sa mbangisina mu kudinwaanisa na kudibinga mu nsi. Bukuri me nyaari ti wunde wuwusakumuna ye sa kaba wasakumuna, na wunde wuwubulula ye mpopi sa kaba kunsa mpopi. » 7Bakuutu ba Mohabi na ba Madyaani bayende na bikabu ha myooko myaaku. Bayende kuri Balahami mu kutubula maleeriri Balaki. 8Nde waleele kuri bo ti : « Lutisee butsuku bu haaka, me sa nyaluha mvutu bunu bu dzoonso Yaave kuri me. »
Bakuutu ba Mohabi baneŋene kintwaari na Balahami. 9Nzaambi wayisa kuri Balahami, waleele ti : « Babakala bamaba bari kintwaari na ye bana bari ? » 10Balahami wabvutula kuri Nzaambi ti : « Balaki, mwaana Sipori, mbyaasi ya Mohabi, wabaheekeri mu kundeele ti : 11"Kuri baatu banaangukini ku Ngipiti, baluulusiri nsi ; ha heki, yende, babulula mpopi mu ntoono me, kampe me sa mbangisina kubanwaanisa na kubabinga." » 12Nzaambi waleele kuri Balahami ti : « Ye wuri nyeendekele na bo ko, na ye wuri mbulila mpopi mu baatu babo ko. Bukuri bo basakumuna. »
13Balahami wateleme mu kipari na waleele kuri bakuutu ba Balaki : « Bvutukee ku nsi yeenu, bukuri Yaave bisirye mu kuri ti me nyeende na beenu. »
14Bakuutu ba Mohabi bateleme na bayende kutubula mamo kuri Balaki, ti Balahami bisiri mu kwiisa na beetu. 15Balaki wabweese kuheeke bamfumu, babvuri kufuna na ba babvuri kubvumina ti na batete. 16Bo bayende kuri Balahami na bamuleele ti : Bu leeriri Balaki, mwaana Sipori, me nyikuyingikiri, yaa kuba kikukakisila mu kwiisa kumono me ko ; 17me sa nyakuluulusa mu nkeembu na me sa nyirika momanso mawundeele ; wasa, me nyikuyingikiri, bulila kaanda di mpopi mu ntoono me ! 18Balahami wabvutula, waleele kuri bisari bya Balaki ti : « Ti hayuku Balaki wampa palata na woolo byaluula mu nzo nde, lo me nyiri ntungukulu lutumu lwa Yaave Nzaambi yaami ko, mu kuyirika musamu wantele bunu pele wamunene. 19Ha heki, me nyiluyingukiri, beenu se lutisee butsuku bumabu, me sa nyaaba nki Yaave kabweese kundeele. » 20Mu butsuku Nzaambi wayisa kuri Balahami na wamuleele ti : « Mbuti mu kukuteele baatu bamaba bisiri, lo teleme weende na bo. Ngo ye kuyirika mani manyikuleele me. » 21Balahami wateleme mu minkya, wanwaata ha yulu mpuunda yaandi na wayende kintwaari na bakuutu ba Mohabi.
Mpuunda Balahami
22Nzaambi wabaka nkesi mu nyendukulu Balahami. Bu kaba ha yulu mpuunda mu kweende na bisari byoolo, ku mbasi Yaave yayende kuteleme ha nzila mu kumukakisila. 23Mpuunda yamono mbasi Yaave yateleme ha kakati dya nzila, na mbeesi yayila ha kooko yayusula mu lukutu. Mpuunda ya keenge mu simu dya nzila na kukoto kunsa nseke. Balahami walata mpuunda mu kuyibvutula mu nzila. 24Mbasi Yaave yayende kuteleme kimamangu mu nzila yiri ha kakati dya bviinya na bibaka byoolo. 25Mpuunda yamono mbasi Yaave na yabatimina mu teke kibaka, ya bamika se kuulu kwa Balahami na kibaka. Nde wabweese kuyilata. 26Mbasi ya Yaave yabweese kubaandika mu kuyooko na yateleme ha kibeendu kya sweeteme, kwahele nzila ya kuyebe ku lubakala na ku lumoso. 27Mpuunda yamono mbasi Yaave na yabutuma kunsa Balahami. Balahami wabaka nkesi na walata mpuunda luboto.
28Yaave wadzibula munwa mpuunda, na yaleele kuri Balahami ti : « Nki me nyikusiiri mu kulata me ndata tatu ? » 29Balahami waleele kuri mpuunda ti : Bukuri ye wuri mu kusakana na me. Mbuti me mbeeri na mbeesi ha kooko nkani mu kilookolo kimaki me nketi kukudzusa. 30Mpuunda yaleele kuri Balahami ti : « Buri, me nyiri mpuunda ye yi wunwaataa mantaangu momanso natee kiluumbu ki ko ? Buri, me nyiri na kifu kya kuyirikila ye mya bu ? » Balahami wabvutula ti « pele ! »
31Yaave wadzibula miisu mya Balahami, na nde wamono mbasi ya Yaave yateleme ha nzila na mbeesi yayila yayusula mu lukutu. Balahami watsukuma na wayilimisa busu bwaandi ha nsi. 32Mbasi Yaave yaleele kuri nde ti : « Mu nki ye leti mpuunda yaaku yimayi ndata tatu ? Tala, me nyiisiri mu kukukakisila nzila, bukuri me nyimono ti nzila yaaku yikunata mu kweedziimbila#22.32 Me nyimono ti nyungulu yaaku yikunata ku kudziimbila : Maampu ma mu Kihebereho mahele kukyensikile na mbangukulu yahele kutswiikisa.. 33Mpuunda bu yimwiini me ngo yiyebiri ha mankula ma me mbala tatu. Mbuti yisiiri kuyebe ko ha mankula ma me, nkani me nyikudzusiri mu kilookolo kikyo, kasi nketi kusiisa yo yamwooyo. » 34Balahami waleele kuri mbasi ya Yaave ti : « Me ntobiri masumu, bukuri mbeeri nyahele kuyaaba ti ye wateleme ha nzila mu kumbwaana. Ha heki, mbuti nzila yi yayibi ha miisu mya ye, lo me mvutukiri. » 35Mbasi ya Yaave yaleele kuri Balahami ti : « Yende kintwaari na baatu ba. Ngo ye kuyaabisa mani manyidzoonso me kuri ye. » Balahami wayende na bakuutu ba Balaki.
Mbwanukunu Balahami na Balaki
36Balaki bu kayuka ti Balahami wuri mu kwiisa, nde wayende kumubwaana natee ku Are-Mohabi, ku ndilu ya Arenoni#22.36 Ari ku Mohabi bunu pele bvula dya Mohabi (kumono 21.15, 28)., ku nsukulu nsi yiyo. 37Balaki waleele kuri Balahami : « Me nyakuheekiri baatu balaka mu kukuteele. Bukuri nki ye waheri kwiisa kuri me ? Ngwanwa me lo nkoonini kukubvumina ? » 38Balahami waleele kuri Balaki ti : « Me mwaakwiisa kuri ye, sa mbangisina kudzoonso ntoono ? Mani maampu masuusa Nzaambi mu munwa waami nyikuyaabisa. » 39Balahami wayende kintwaari na Balaki, bo batubuka ku Kiryati-Husoti. 40Balaki waha kikabu kya bibulu byabinene na byantele, waheeke ndaambu ya Balahami na ya bakuutu baba na nde.
Balahami wasakumuna kaanda dya Iselili
41Mu kipari, Balaki waholo Balahami, wamutoombolo ku bibeendu byangisi bya Bamote-Baali. Kukwo nde kabangisini kumono ndaambu baatu ba Iselili.
Alliance Biblique du Congo 2024