Lutaangu 19
19
Lufutu lwa ngoombo yamukasi yabeenge
1Yaave wadzoonso kuri Moose na Aaroni : 2Yimayi ngo ngisi yitumini Yaave : « Yaabisa baala ba Iselili ba kutwalikila ngoombo yamukasi yabeenge yahele na kipfuumi, na yakiri kunata pe kilemu. 3Beenu sa lwaha yo kuri ngaanga-Nzaambi Elehadzari. Nde sa kayinata ku mambisa ma nzo yangooto, na sa bayikeke ha mankula ma nde. 4Ngaanga-Nzaambi Elehadzari sa kaholo makila mu muleembu na kumanyaka mbala nsaamu mu mpele ya nkotolo nzo yangooto ya mbwanukunu 5Sa bayoko ngoombo yamukasi yiyo ha miisu mya nde : Mukaanda, muswiinyi, makila na bya mu mwooyo. 6Ngaanga-Nzaambi sa kaholo bitsootso bya muti wa mbuyu, kimpaala kya Mukuusu na musiinga wabeenge mu kutuba ku kakati dya mbaawu kuri mu kunyeenge ngoombo yamukasi. 7Ngaanga-Nzaambi sa kaswaaka binkutu byaandi na nyutu yaandi mu maampa. Na nde sa kabvutuka ku nzo yangooto, ngo yelemini kuba wasumuka natee mu nsinsika. 8Wunde se wuyiyokiri sa kaswaaka binkutu byaandi na kuyoolo maampa, na sa kaba wasumuka natee mu nsinsika 9Mubakala mosi watsyeemeke sa katolo lufutu lwa ngoombo yamukasi na kulusuusa ku mambisa ma manzo mangooto, ha kibeendu kyatsyeemeke. Kaanda dyodinso dya baala ba Iselili sa dya lukebe na kulusalila mu kuyirika maampa ma kuswaaka mviindu#19.9 Kumono Bah 9.13.. Kikyo kikabu mu ntoono masumu. 10Wunde wutoriri lufutu lwa ngoombo yamukasi sa kaswaaka binkutu byaandi na sa kaba wasumuka natee mu nsinsika Yiyo yiba ngisi ya kinkulu kuri baala ba Iselili na banzeense bari ha kakati dya bo. »
Ngisi mu nsyeemusunu
11Wunde wubelemene muutu wafwa, mvuumbi ngo mvuumbi ya muutu, lo sa kaba wasumuka mu biluumbu nsaamu. 12Nde yelemini kuba watsyeemeke mu kiluumbu kyabitatu na kyansaamu#19.12 Nde yelemini kuba watsyeemeke mu kiluumbu kyabitatu na kyansaamu : Mu mbangukulu yayikulu na buri misamu mya ntaangu yiyo ; Kihebereho kiluumbu kyabitatu nde sa kanyasina mu maampa ma nsyeemukusu, na nde sa kaba watsyeemeke mu kiluumbu kyansaamu.. Mbuti wahele kutsyeeme mu kiluumbu kyabitatu na kyansaamu, lo kaba watsyeemeke mu kiluumbu kyansaamu ko. 13Mpisi wubelemene muutu wafwa, mvuumbi ya muutu wafwa, na wahele kutsyeeme, lo nde sumuni Nzo Yaave ya lusaambulu. Muutu wabubwo sa bamuyusula mu lutaangu lwa baala ba Iselili. Bukuri wahele kuyoolo maampa mu kuyusula mviindu dza masumu. Nsumukunu yaandi sa yanamitina kuba mu nde.
14Ngisi yamosi yimayi : Mbuti muutu fwiiri munsa nzo yangooto, lo bobanso bari munsa nzo yangooto yiyo sa baba basumuka mu biluumbu nsaamu. 15Na manzuungu momanso madzibula, mahele na kipu, lo masumuka se. 16Mpisi wunde wuri ku kibiti, wubelemene walemene mu mbeesi, muutu wafwa, miyisi mya muutu bunu pele mampeembe, lo wasumuka mu biluumbu nsaamu. 17Mu muutu wasumuka, sa baholo lufutu lwa butoto-mpolo bwa kikabu kya masumu, na kusa munsa nsasi, na kubweese maampa madzuuna. 18Muutu watsyeemeke sa kaholo kimpaala kya Mukuusu mu kutsubu mu maampa, na kunyaka ha yulu nzo yangooto, ha yulu nkoombo dzodzinso, ha yulu baatu bobanso bari ha kibeendu kikyo, na ha yulu wabelemini miyisi, mvuumbi bunu pele mampeembe. 19Watsyeemeke sa kanyasina ha yulu wasumuka, mu kiluumbu kyabitatu na mu kiluumbu kyansaamu, na mu kiluumbu kyansaamu nde sa kamutsyeemese mu masumu maandi. Nde sa kaswaaka binkutu byaandi na kuyoolo maampa, mu nsinsika sa kaba watsyeemeke.
20Ngo mbuti muutu wasumuka na wahele kutsyeemeke, sa bamuyusula ha kakati dya kaanda, bukuri sumuni Nzo Yaave yangisi, mu kuhele kutsyeemeke mu maampa mayusulaa mviindu dza masumu, nde wuri wasumuka.
21Yiyo sa yaba ngisi ya kinkulu mu beenu. Wunde wunyaka maampa ma kuyusula mviindu dza masumu sa kaswaaka binkutu byaandi. Na wunde wabelemini maampa ma kuyusula mviindu sa kaba wasumuka natee mu nsinsika. 22Byobinso bi belemini muutu wasumuka sa biba byasumuka. Na muutu wubelemene byo sa kaba se wasumuka natee mu nsinsika.
Alliance Biblique du Congo 2024