Lutaangu 20
20
Maampa ma Meriba
(Mpa 17.1-7)
1Baala ba Iselili, kaanda dyodinso, bayisa ku nsi yankatu ya Tsini, mu ngoondo yatete, na baatu badzakala ha Kadese#20.1 Nsi yankatu ya Tsini, Kadese : Kumono mu 13.21, 26 na matina.. Haho Miryami kafwa na bamudziika.
2Kwaba kwahele maampa ma kunwa kuri kaanda ; bo bakutukuna mu kunwaanisa Moose na Aroni. 3Baatu basaka kuyumusa Moose, baleele ti : « Mbuti twafwiiri kweetu bwafwiiri bambaasi beetu ha busu bwa Yaave ! 4Bukuri nki beenu lwatweesi kaanda dya Yaave ku nsi yankatu yimayi ? Mu kuri ti beetu na bibulu byeetu tufwa kumaku ? 5Mu nki beenu lwapalisiri beetu ku Ngipiti, mu kutunata ku kibeendu kyakibi kimaki ? Kyahele kibeendu kya kukuna mingenge, bviinya, maloombo na kyahele na maampa ma kunwa. »
6Moose na Aaroni bayende ha mankula ma kaanda, ha nkotolo nzo yangooto ya mbwanukunu. Batsukuma na bakiindila bidziri ha nsi, na nkeembu ya Yaave yamonoko kuri bo. 7Yaave waleele kuri Moose ti : 8« Holo luboto, na kutukisa kaanda, ye na mwayaya dyaaku Aroni. Beenu sa lwa dzoonso kuri tari ha miisu mya bobanso, na dyo sa dyapalisa maampa ma wuha kuri Iselili mpisi banwa na bibulu byaaku. » 9Moose waholo luboto ha busu bwa Yaave, bunu bu kamutumini. 10Moose na Aaroni bakutukisa kaanda ha mankula ma tari, baleele kuri bo ti : « Beenu bangaa-tungu yukeenu ! Mu tari dimadi, beetu sa twabangisina kulupalisila maampa ? »
11Moose wanaanguna kooko kwaandi na walata luboto mu tari ndata dzoolo, na maampa mabuukula. Kaanda dyanwa na bibulu byaaku. 12Yaave waleele kuri Moose na Aaroni ti : « Bukuri beenu lwahele kusiila kiminu mu me, mu kusoongo bungisi bwaami ha miisu mya baala ba Iselili, mu didyo beenu lukotoso ko kaanda dimadi ku nsi yi nyabaheeri#20.12 Lumvuku lwa Moose na Aaroni lwahele kumonoko kwa bukyensyekelee ; musamu wabakebisiri Nzaambi, kampe wu baleti tari (kit.11) ha kibeendu kya kudzoonso kuri dyo (Kit.8).. » 13Mamo ngo maampa ma Meriba (Yumu) kukwo kwa sakiri baala ba Iselili mayumu kuri Yaave, wasoongiri bungisi bwaandi ha kakati dya bo.
Mbyaasi ya Edomi bisiri kuyookoso Iselili
14Moose waheeke bantumu, kubaandika ha Kadese kuri mbyaasi ya Edomi : « Bumabu buleeriri mwaana nguri waaku Iselili : Ye yaari mpasi dzodzinso dzitumwiini beetu. 15Bataayi beetu basundukiri ku Ngipiti ku twadzakiri biluumbu byalaka. Bari Ngipiti bayirika mamabi kuri beetu na bataayi beetu. 16Beetu twasaambila Yaave, na nde wayuka ndoombolo dzeetu mu kutuheeke ntumu watupalisiri mu Ngipiti. Lumalu turi ha Kadese, bvula diri mu ndilu na nsi yaaku. 17Wutuha kweetu miswa mya kulutila mu nsi ye. Beetu tukoto kunsa manseke ko bunu pele munsa bviinya, na tunwa maampa mari mu mabulu ko. Beetu sa tweende mu nzila yi kweendaa mbyaasi#20.17 Nzila yayinene bunu pele nzila ya mbyaasi, dileele ti nzila ya mufunu., kwahele kusyeeteke ku lubakala na ku lumoso, natee kutumana kuyooko nsi ye. » 18Ngo Edomi wabvutula kuri nde ti : « Ye wuri ndutila kuri me ko, mbuti pele lo me nyiisiri mu kulunwaanisa. »
19Baala ba Iselili babweese kuleele kuri nde ti : « Beetu sa twatoomboko mu nzila. Mbuti beetu na bibulu byeetu tu nwiini maampa ma ye, lo sa twa kufuta. Kitotolo kimosi nyikuloombiri, ha yulu kunu kutaba nsi yaaku. » 20Kasi nde wabaleele ti : « Luri ndutila ko ! » Edomi wapala mu kubabwaana na mpuumbu baatu na binwaanunu. 21Edomi wabisa kuha miswa kuri Iselili mu kutaba nsi nde. Bari Iselili batatuka la na nde.
Lufwa lwa Aaroni
22Kaanda dya baala ba Iselili dyodinso dya naanguka ku Kadese mu kweende ku mulaandu wa Hori#20.22 Kibeendu kyahele kuyabikina.. 23Yaave waleele kuri Moose na Aaroni, ha mulaandu wa Hori, wuri mu ndilu na nsi Edomi, ti : 24« Aaroni sa kabvuutuna na baatu baandi, bukuri nde kari nkotolo mu nsi yinyaheeri baala ba Iselili ko, mu ntoono tungu mu lutumu lwa me ha maampa ma Meriba. 25Holo Aaroni na mwaana waandi Elehadzari, wubatoombolo ku mulaandu wa Hori. 26Yusula binkutu bya Aaroni mu kulwiika Elehadzari mwaana waandi. Haho Aaroni kafwa. » 27Moose wayirika mamo matumini Yaave. Bo batoomboko ku mulaandu wa Hori ha miisu mya kaanda dyodinso. 28Moose wasyoonono binkutu bya Aaroni mu kulwiika mwaana waandi Elehadzari. Aaroni wafwa ha nkoto#20.28 Kumono 33.38-39 ; Ngi 10.6. haho. Moose na Elehadzari bakulumuna mulaandu. 29Kaanda dyodinso bu bamono ti Aaroni fwiiri, bo badila Aaroni mu biluumbu makuumi matatu.
Alliance Biblique du Congo 2024