Lutaangu 18
18
1Yaave waleele kuri Aaroni ti : « Ye na baala baaku, na nzo taayi dyaaku kintwaari na ye, beenu sa lwakolo bubi bu basa mu nzo yangooto yangisi. Ye na baala baaku luha mvutu mu bubi bu bayirika mu kisalu kya bungaanga-Nzaambi. 2Bumosi mu bampaangi baaku ba mu kaanda dya Leevi, muloongo wa taayi dyaaku, yelemini kubakokosolo mpisi baba kintwaari na ye, bo sa babakisa ye na baala baaku ha mankula ma nzo yangooto ya lulelusunu. 3Bo sa bakusalila na kusa bisalu byobinso bya nzo yangooto. Ngo bahele na miswa mu kukokosolo kuri bisalulu byobinso bya nzo yangisi na dziku dya Nzaambi mu kuri bahele kufwa, kubaandika bo na beenu. 4Bo sa babvuutuna na ye mu kusala bisalu byobinso bya kunsa nzo yangooto ya mbwanukunu. Muutu ti mosi wamunzeense yaa kakokosolo na beenu ko. 5Beenu lusa kisalu kya mu nzo yangisi na kya dziku, mu kuri ti nkesi dzihele kubweese kubwa ha yulu baala ba Iselili. 6Tala, me Yaave nyasoolo bampaangi beenu baala ba Leevi ha kakati dya baala ba Iselili, baha kuri Yaave, bunu kikabu kuri beenu mu kusa bisalu bya nzo yangooto ya mbwanukunu 7Ye na baala baaku kintwaari na ye, luyelemini kusa kisalu kya bungaanga-Nzaambi mu bitotolo byobinso bya dziku dya Nzaambi na ku kibeendu kyangisi na ngisi ku mambisa ma nsaanda yamanika mu kusa ndilu. Beenu lusa kisalu kya bungaanga-Nzaambi ki nyiluheeri bunu kikabu. Muutu wamunzeense wukokosolo lo sa bamudzusa. »
Ndaandu ya bangaanga-Nzaambi
8Yaave wadzoonso kuri Aaroni : « Tala, me nyikuheeri kisalu kya bikabu byobinso byangisi biri mu kumpaana baala ba Iselili. Kuri ye na baala baaku me nyaha bunu kikabu mu mpisi mubvu. 9Mono biba bya ye ha kakati dya bitotolo biri basiiri kubiyoko ko : Bimbwanga bya bo byobinso, bikabu bya bikunu bya bo byobinso, bikabu bya bo byobinso bya masumu na byobinso bya mpemusunu ya masumu bibaha ; bitotolo bibvuriri bungisi bibyo sa byaba bya ye na baala baaku. 10Ye sa wadya byo bunu bitotolo bibvuriri bungisi#18.10 Na byo sa biba byandya bya beenu : Babamosi babaangula ti beenu sa lwadya byo ha kibeendu kyangisi.. Babakala bobanso bari na miswa mu kubidya. Biyelemini kuba byangisi kuri ye. 11Bimabi se bya ye : Ndaambu ya bikabu yi luholo kuri baala ba Iselili bobanso, me nyibiheeri kwakinkulu kuri ye na baala baaku bababakala na babakyeetu. Mpisi wunde watsyeemeke wuri mu kaanda dya ye wuri na miswa mu kudya. 12Maasi momanso mamabwe, malu mamoono na bele, bikabu byobinso byatete bi baha kuri Yaave me mpeeri byo kuri ye. 13Bimbutu byobinso byatete mu nsi bo, bi batwaala kuri Yaave bya ye. Mpisi watsyeemeke wuri mu kaanda dya ye sa kabidya. 14Byobinso bya bulila mpopi mu Iselili sa byaba bya ye#18.14 Kumono Bal 27.28.. 15Baala bobanso batete babatwaala kuri Yaave, ba bibulu na ba baatu, sa baba ba ye. Ngo yelemini kukuula baala batete ba baatu na ba bibulu byasumuka. 16Nkuululu kubaandika mu bari ngoondo mosi. Sa wabakuula mu kiteesu kyapalata dza mikutu mitaanu, bunu buri kiteesu kya mangarame makuumi moolo mu nzo yangisi. 17Ngo baala batete ba bangoombo, na ba bimeeme, na ba bantaba kubakuula pe. Bo bangisi, sa watsyaamina makila ma bo ha yulu dziku dya Nzaambi na kuyoko maasi ma bo bunu kikabu kya mfuku yayibwe kuri Yaave. 18Toongo twa bo sa twaba kuri ye buni ntulu yibasakumuni na buni kito kyalubakala. 19Ndaambu ya byobinso byangisi biyusula baala ba Iselili bya Yaave, me mpeeri bunu kikabu kuri ye na baala baaku bababakala na babakyeetu kwakinkulu. Lulwo lulelusunu lwalubwe lwakinkulu#18.19 Kufwanikisa Bal 2.13 ; 2 Mp 13.5 na matina. ha mankula ma Yaave, kuri ye na kaanda dyaaku. »
20Yaave waleele kuri Aaroni : « Ye wubaka saala mu nsi bo ko, wubaka kikuuku ha kakati dya bo ko. Me nyiri kikuuku na saala dya ye ha kakati dya baala ba Iselili. »
Ndaandu ya Baleevi
21Tala, kuri baala ba Leevi, me mpeeri kitsuri kyakuumi kyokinso mu Iselili #18.21 Kumono Bal 27.30-33 ; Ngi 14.22-29. bunu saala mu kisalu kibari mu kusa munsa nzo yangooto ya mbwanukunu. 22Bubwo baala ba Iselili babweese kukokosolo ku nzo yangooto ya mbwanukunu ko na masumu mabakotoso mu lufwa. 23Baleevi sa basa kisalu kya nzo yangooto ya mbwanukunu. Bo kitsu bakolo bubi bwaaku bubayirikiri ha kibeendu kikyo. Wunde musiku wa mantaangu momanso mu biseendu byeenu byobinso. Bo ka babaka saala ko#18.23 Kufwanikisa 35.1-8. ha kakati dya baala ba Iselili. 24Bukuri kitsuri kyakuumi ki wuungula baala ba Iselili mu kuha kuri Yaave, me mpeeri kuri Baleevi bunu saala. Mu didyo me nyibaleeriri ha kakati dya baala ba Iselili ti bo babaka saala ko.
25Yaave waleele kuri Moose ti : 26Yaabisa kuri Baleevi ti : « Mu ntaangu yi luholo kitsuri kyakuumi ki nyaluheeri kuri baala ba Iselili, mu kitsuri kikyo ki lubakiri, beenu sa lwayusula kitsuri kyakuumi kya Yaave, kitsuri kimosi kyakuumi mu kitsuri kyakuumi. 27Ndaambu yiluyusula yiyo sa yaba yataanga mu beenu bunu kikabu kya masaangu na kya malu mabakamuni. 28Mu bubwo, beenu se sa lwayusula ndaambu ya Yaave mu bikuuku byobinso byakuumi bi luholo kuri baala ba Iselili. Mu kitsuri kikyo, beenu sa lwaha kitsuri kya Yaave kuri ngaanga-Nzaambi Aroni. 29Mu bikabu byobinso, beenu sa lwayusula bitsuri byobinso bya Yaave, byobinso byamaasi, kuyusula bikabu byangisi. 30Sa wabaleele ti : Mu ntaangu yiluyusula ndaambu yibvuri bubwe mu byobinso, sa yaba yataanga mu Baleevi bunu kikabu kyabikunu na kya malu mabakamuni. 31Beenu sa lwadya bibyo mu bibeendu byobinso, beenu na makaanda meenu. Bukuri wunde mufutu weenu mu kisalu kya mu nzo yangooto ya mbwanukunu 32Mu momanso mamo, yaa lutobolo masumu ko mu kilookolo kya kuyusula ndaambu yibvuri bubwe. Yaa lusumuna byangisi bya baala ba Iselili ko, mpisi luhele kufwa. »
Alliance Biblique du Congo 2024