Lutaangu 17
17
Madziku ma baatu ba Kore
1Yaave#17.1 Mambangukulu makaka, Bit. 1-15 mu Kik 17 matina 16.36-50. waleele kuri Moose ti : 2« Yaabisa Elehadzari, mwaana ngaanga-Nzaambi Aaroni, mu kuyusula madziku mari ha kakati dya mbaawu, bukuri mari ma ngisi, na kutsamikisa mbaawu. 3Madziku ma bangaa-masumu mamo, luyelemini kumatuuta mu kusa bitari byakufuka dziku dya Nzaambi#17.3 Kufwanikisa na Mpa 27.2.. Bukuri bamaheeri bunu kikabu kuri Yaave, na meki mangisi. Mo sa maba kidiimbu kuri baala ba Iselili. » 4Ngaanga-Nzaambi Elehadzari waholo madziku ma bitari, maheeri bafwiiri mu mbaawu. Bo bamatsula mu kufuka dziku dya Nzaambi. 5Yayeki mbambukulu mwooyo kuri baala ba Iselili, mu kuri ti munzeense na wahele mu kaanda dya Aaroni kari na miswa ko mu kuyoko libano ha mankula ma Yaave, mu kuri ti kahele kuba bunu Kore na mpuumbu yaandi, bunu bwadzoonsiri Yaave kuri Moose.
Baatu batelemene Moose na Aaroni
6Bukyaanaana kaanda dyodinso dya baala ba Iselili bamunguta mu Moose na Aaroni, baleele ti : « Beenu ludzusiri baatu ba Yaave ! » 7Mu ntaangu yiri kaanda dya telemene Moose na Aaroni, bu basyeeteke ku nzo yangooto ya mbwanukunu, bamono tuti dyafuka nzo yangooto, nkeembu Yaave yamonokono#17.7 Kumono Mpa 13.21 na matina.. 8Moose na Aaroni bayende ha mankula ma nzo yangooto ya mbwanukunu 9Yaave wadzoonso kuri Moose waleele ti : 10« Tatukee la na kaanda didyo, me nyibadzusa mu ntaangu mosi. »
Bo babwa ha nsi na bafulumuka, bidziri byaaku ha nsi. 11Moose waleele kuri Aaroni ti : « Holo dziku, namika mbaawu ya dziku dya Nzaambi na ha yulu dyo teeteke libano. Yende mu mawasu kuri kaanda mu kubaloombolo mpemisi ya masumu. Bukuri Yaave wuri na nkesi dzalaka, na mpasi dzi mwaa baandika. » 12Aaroni wayirika bunu bwaleeriri Moose, wayende mu ntiinu ha kakati dya kaanda, na tala mpasi dzaba dzi mwaa baandika kunsa baatu. Nde wayoko libano na kuloombolo baatu mpemisi. 13Nde watelemini ha kakati dya bafwa na bamwooyo, na mputa yawa. 14Baatu bafwiiri baba mafuundu kuumi na mana na nkama nsaamu, wuungu-wuungu bafwiiri mu mpuumbu ya Kore. 15Aaroni wabvutuka kuri Moose, ha nkotolo nzo yangooto ya mbwanukunu, na mpasi dzawa.
Luboto lwa Aaroni
16Yaave#17.16 Mu mambangukulu makaka, Bit. 16-28 biri byatina 17.1-13. Kumono 17.1 na matina. waleele kuri Moose ti : 17« Yaabisa baala ba Iselili, bakuha luboto lumosi mu mpisi kaanda, mu dzodzinso mboto kuumi na dzoolo dzi kuyakisa bakuutu ba makaanda. Sa watina nkuumbu ya mpisi mukuutu ha yulu luboto lwaandi 18Sa watina nkuumbu ya Aaroni ha yulu luboto lwa kaanda dya Leevi : Sa kwaba luboto lumosi mu mpisi mukuutu kaanda. 19Suusa dzo munsa nzo yangooto ya mbwanukunu, ha mankula ma lulelusunu, ha nkoo bwanikinaa me na beenu. 20Muutu sa wunyisoolo me, luboto lwaandi sa lwapalisa mutwiikila ; bubwo Iselili kahoto mu kumunguta kuri beenu. »
21Moose wayaabisa baala ba Iselili ; bakuutu baaku bobanso, baha luboto lumosi lumosi mu mpisi mukuutu kaanda, mu dzodzinso mboto kuumi na dzoolo. Luboto lwa Aaroni lwaba ha kakati dya mboto dza bo. 22Moose wasuusa mboto ha mankula ma Yaave munsa nzo yangooto ya lulelusunu. 23Mu kiluumbu kyanama, Moose wayende ku nzo yangooto ya lulelusunu. Bamono ti luboto lwa Aaroni, wuri mu kaanda dya Leevi, lwafula. Lwapalisa makaya ma mantontongo, bifulu na lwabeengese bimbutu. 24Moose wapalisa mboto dzodzinso dzaba ha mankula ma Yaave mu kudzisoongo kuri baala ba Iselili bobanso. Bo badzimono, na mpisi muutu waholo luboto lwaandi. 25Yaave waleele kuri Moose ti : Bvutula luboto lwa Aaroni ha mankula ma lulelusunu, na kulukebe bunu kidiimbu kya tungu mu baala ba Iselili. Ye sa wasukisa kumunguta kwa bo mu me, mpisi bahele kufwa#17.25 Bit. 23-25 : Kumono Bah 9.4.. 26Moose wayirika bubwo, nde wayirika bunu bwamutumini Yaave.
Kisalu kya Bangaanga-Nzaambi na Baleevi
27Baala ba Iselili baleele kuri Moose ti : « Tala, beetu tusukiri, tufwiiri beetu bobanso, tufwiiri. 28Mpisi wunde wukokosolo ku nzo ya Yaave manunu lufwa. Buri, beetu tuwiiri kweetu kusuka ? »
Alliance Biblique du Congo 2024