Lutaangu 16
16
Tuungu dya Kore, Datani na Abirami
1Kore#16.1 Kumono Yud 11., mwaana Yitsehari, mwaana Kehati, mwaana Leevi, kintwaari na Datani bo na Abirami, baala ba Elyabi, na Oni, mwaana Peleti, baala ba Lubeni, 2batelemini Moose kitaatu kintwaari na nkama dzoolo na makuumi mataanu (250) ma babakala mu baala ba Iselili, bakuutu ba makaanda basoolo mu kukutukina bamfumu bamvuumfu. 3Bo bakutukina mu kutungukila Moose na Aroni. Babaleele ti : « Beenu luri mu kulutisa kiteesu ! Baatu bobanso ba kaanda bari bangisi na Yaave wuri ha kakati dya bo. Mu nki beenu luri mu kumonikinaa kubvuriri ha yulu kaanda dya Yaave ? »
4Moose bu kayuka mamo, watsukuma na wakiindila kidziri ha nsi. 5Wadzoonso kuri Kore na kabu dyaandi dyodinso waleele : « Mu kipari, Yaave sa kayaabisa, na kwaandi wuri wa nde, na wuri wangisi, mu kukokosolo kuri nde. Mpisi wukasoolo sa kakokosolo ku kari nde. 6Bumabu lusa : Holee madziku ma bitari, ye Kore na mpuumbu yaaku yoyinso. 7Bweekipari, lusa makeengele mambaawu munsa mumwo, na kunamisa nomo ha mankula ma Yaave ; muutu wusoolo Yaave wunde wuba wangisi. Bukukiri mu beenu, baala ba Leevi ! » 8Moose wabweese kuleele ku Kore : « Yukee, beenu baala ba Leevi ! 9Buri, musamu wantele mu beenu, Nzaambi ya Iselili bu kalusoolo ha kakati dya kaanda dya Iselili, mu kukokosolo kuri nde, na kusala kisalu kya nzo yangisi ya Yaave, na kuteleme ha mankula ma kaanda dya bo mu kutwaalisa lukutukunu ? 10Nzaambi waluha miswa, ye na bampaangi baaku bobanso, baala ba Leevi, mu kukokosolo kuri nde, ngo beenu lubweese kusaka kisalu kya bungaanga-Nzaambi. 11Mu didyo, ye na kaanda dyodinso, lukutukini mu kusa tungu kuri Yaave. Aaroni na kari, mu kuri ti beenu lumunguta mu nde ? »
12Moose watumusa Datani na Abirami, baala ba Elyabi Ngo bo baleele ti : « Beetu tukwiisa ko. 13Buri, bwahele kukuka kuri ye mu kutoombolo beetu mu nsi yi kuumbaa mabeene ma ngoombo na maasi ma nyosi#16.13 Kufwanikisa Mpa 3.8 na matina. - Hamaha bataatu ba Moose basalila maampu mamo mu kusoongo Ngipiti, bunu lo maampu mamo masoongo nsi ya lusiilulu., mu kutudzusa ku nsi yankatu ? Buri, tiiri kunamitina kuba mukuutu wutwaalisa beetu mu makwa ? 14Mu ngwanwa ye wahele kutwaala beetu ku nsi yikuumba mabeene ma ngoombo na maasi ma nyosi, kari saala dya manseke na dya bviinya ye wutuheeri ko ! Ye tsimini ti beetu baatu bafwa miisu ? Beetu tukwiisa ko ! » 15Moose wabaka nkesi dzamakwa bu kayuka mamo. Nde waleele kuri Yaave : « Yaa taambula bikabu bya bo ko. Me nyakiri nyahele kuholo ti mpuunda kuri bo, na nyahele kuyirika bubi ti kuri mosi mu bo. »
Nseembulu dza Kore na mpuumbu yaandi
16Moose waleele kuri Kore ti : « Bweepari, ye na mpuumbu yaaku yoyinso, wasee luteleme ha mankula ma Yaave. Aaroni se yelemini kuba kintwaari. 17Mpisi muutu, mu nkama dzoolo na makuumi mataanu, kaholo mwaa dziku dyaandi na kuteeteke nomo, mu kuha kikabu kuri Yaave. Bumosi mu beenu na Aaroni, mpisi nde na dziku dyaandi. » 18Bo baholo mpisi muutu na dziku dyaandi, babvuuta mbaawu na bateeteke mananaasi, bayende kuteleme ha mweelu nzo yangooto ya mbwanukunu, kintwaari na Moose na Aroni. 19Kore wakutukisa mpuumbu yaandi yoyinso ha mankula ma bo, ha nkotolo nzo yangooto ya mbwanukunu.
Nkeembu Yaave yamonokono kuri kaanda dyodinso. 20Yaave wadzoonso kuri Moose na Aaroni ti : 21« Beenee lutatu na mpuumbu yi, bukuri me nyibadzusa mu kilookolo kimosi ! » 22Bo babwa ha nsi, bayilimisa mabusu maaku na baleele ti : « Nzaambi, Nzaambi yihaana mwooyo kuri baatu bobanso, weki ŋanisa kudzusa mpuumbu yoyinso mu muutu mosi wutobiri masumu ? » 23Yaave waleele kuri Moose ti : 24« Yaabisa kuri kaanda mu kutatika ha kibeendu kiri Kore na Datani na Abirami. »
25Moose bu kateleme wayende kuri Datani na Abirami ; bakuutu ba Iselili bayende kintwaari na nde. 26Moose wadzoonso kuri kaanda, waleele ti : « Tatukee la na manzo mangooto ma baatu bababi. Yaa lubelemene ti kimosi kya bo ko, mu kuri ti luhele kufwa mu ntoono masumu ma bo. » 27Bo batatuka la na bibeendu biri baatu ba Kore, na Datani na Abirami.
Datani na Abirami bapala mu manzo mangooto na bateleme ha nkotolo manzo mangooto maaku. Bakasi, na baala, na bateekulu baaku se bebele na bo. 28Moose waleele : « Beenu mu lu, sa lwayaaba ti Yaave waheekiri me mu kuyirika momanso mamama na nyahele kuyirika mo mu lutumu lwa me-meene. 29Mbuti bamaba bafwiiri bu fwiilaa baatu bobanso, buri nzeengulu dza baatu bobanso, lo kari Yaave wampeekiri ko. 30Ngo mbuti Yaave yirikiri kimaangu, na butoto budzibumini mu kubafuka na byaaku byobinso, na kubasundula bamwooyo ku nsi ya bafwa, lo beenu sa lwayaaba ti bo basaanini Yaave. » 31Bu kamana kudzoonso maampu mamo, butoto bwabaarika hansa miilu mya bo, 32butoto bwabafuka na makaanda maaku, na baatu bobanso baba mu Kore, na busina bwaaku bwobunso. 33Bobanso basunduka bamwooyo ku nsi ya bafwa na busina bwaaku, butoto bwabafuka. Badziimbila ha kakati dya kaanda. 34Iselili dyodinso dyaba dya badyengekele dyayitika mu misaakulu mya bo. Bukuri baba kweleele ti : Tuyitikee, butoto bwee bu tufukiri. 35Mbaawu yanangukina kuri Yaave yanyeengese nkama dzoolo na makuumi mataanu ma babakala babayokaa mananaasi.
Alliance Biblique du Congo 2024