Lutaangu 13
13
Moose heekiri baatu mu kukengese Kanaana
1Yaave waleele kuri Moose ti : 2« Heeke babakala mu kweetala nsi ya Kanaana yi nyiha me kuri baala ba Iselili. Mu mpisi kaanda luyelemini kuheeke mubakala mosi mu bakuutu. » 3Moose wabaheeke, kuholosono ku nsi yankatu ya Parani, bunu bwaba lutumu lwa Yaave. Babakala bobanso baba bakuutu ba baala ba Iselili. 4Mankuumbu ma bo mamama :
Mu kaanda dya Lubeni, Samuwa, mwaana Dzakuri ;
5Mu kaanda dya Simoni, Safati, mwaana Hori ;
6Mu kaanda dya Yuuda, Kalebi, mwaana Yefune ;
7Mu kaanda dya Isakari, Yingehali, mwaana Yoosefi ;
8Mu kaanda dya Efarayimi, Ose, mwaana Nuuni ;
9Mu kaanda dya Benyami, Paliti, mwaana Laafu.
10Mu kaanda dya Dzabuloni, Ngadiyeli, mwaana Sodi ;
11Mu kaanda dya Yoosefi, mu kaanda dya Manase, Ngadi, mwaana Susi ;
12Mu kaanda dya Daani, Amyeli, mwaana Ngemali ;
13Mu kaanda dya Aseere, Seturi, mwaana Mikaheeli ;
14Mu kaanda dya Nefetali, Nabi, mwaana Bvofesi ;
15Mu kaanda dya Ngadi, Ngehuli, mwaana wa Maki.
16Mamo ngo mankuumbu ma babakala baheeke Moose mu kukengese nsi. Moose wateele Ose, mwaana Nuuni, mu nkuumbu ya Yooswa#13.16 Mankuumbu momoolo Ose na Yooswa mayusukila mu nsina yoyimosi mu Kihebereho, na momoolo mbangukulu ti Mfumu wubvuukisaa. – Yooswa weki wadzoonsolo mu maampu mari mu Mpa 17.8-16..
17Moose wabaheeke mu kukengese nsi ya Kanaana, na wabaleele ti : « Toombukee mu nzila ya Nengebve, beenu sa lwatoomboko mulaandu. 18Tumi lukengese nsi, mu kuyaaba kari baatu bari na makwa bunu pele bahele na makwa, kari baatu balaka bunu pele bantele. 19Talee kari nsi yiri baatu babo yayibwe bunu pele yayibi, kari mabvula matuunga mu manzo mangooto bunu pele mu manzo makuma. 20Talee kari butoto bwabubwete bunu pele bwahele bwabubwete, kari buri na miti bunu pele bwahele na miti. Beenee na bukiinda mu kuholo bimbutu bya nsi. » Yaba ntaangu ya bimbutu bya bviinya byatete.
21Bo batoomboko mu kweetala nsi, kuholosono ku nsi yankatu ya Tsini, natee ku Lehobi, bebele na Lebo-Hamati. 22Bo batoomboko mu nzila ya Nengebve, na bayisa natee ku Heberoni. Haho Ahimani, Sesayi na Talamayi, baala ba Anaki, babadzakilaana. Bvula dya Heberoni dyaba dyatuunga mibvu nsaamu tekesele dya Tsohani#13.22 Heberoni : Bvula dyantele diri lutatu mu mafuunda makuumi matatu ma bitaki ku baanda dya lumoso lwa Yerusalemi. - Anaki : Muutu wahele kuyabikina, wuri kifwaani kya baatu ba bakulu ba Palesetine. - Tsohani (nkuumbu ya bvula dya Tsohani mu Kihebereho) : Bvula dya Ngipiti didyo dyaba dyabweese kutuunga mu ndaambu yamoolo ya fuunda dya mibvu na nkama mpoomo tekesele Yisu Kiristo (kumono Esa 19.11 na matinu). ku Ngipiti. 23Bo bayisa natee ku muwiila wa Esekoli, ku batabula kimpaala na kinkangiri kya bviinya#13.23 Mwaa muwiila wa Esekoli kiri ku Heberoni mu mpele ya ku noode Ntoono ya Kihebereho esekoli mbangukulu kinkangiri kya bviinya, kumono kit 24.. Babinata kuri kyakolokoso mu kituungi, kintwaari na malaala na ngenge. 24Kibeendu kikyo baha kyo nkuumbu ya Esekoli, mu ntoono kinkangiri kya tabiri baala ba Iselili.
Baheekiri Moose beki mu kuha mampolo
25Bo bayisa bvutuka ha mambisa ma kukengese nsi, ku nsukulu makuumi mana ma biluumbu. 26Babvutuka kuri Moose na Aaroni, na kimvuka kyokinso kya baala ba Iselili, ku nsi yankatu ya Parani ku Kadese#13.26 Kadese (bunu pele Kadese-Bareneya 32.8 ; lumalu Ayini Kedehisi) mwaa dzuumbu diri ha kati dya nsi yankatu ya Parani (kit. 3) ku baanda, na nsi yankatu ya Tsini (kit. 21) ku noode.. Bo bayalimina mampolo kuri bo na kuri kimvuka kyokinso na babasoongo bimbutu bya nsi yiyo. 27Bo bayaabisa ti : « Beetu twayensi ku watuheekiri. Diri dyangwana ti nsi yikuumba mabeene ma ngoombo na maasi ma nyosi#13.27 Nsi yikuumba mabeene ma ngoombo na maasi ma nyosi : Kumono Mpa 3.8 na matinu., na bimbutu byobi. 28Ngo baatu bari mu nsi yiyo bari na makwa. Mabvula ma bo mamanene na matuunga mu kiteesu kyamakwa. Tumwiinyee na baala ba Anaki kukwo. 29Amaleke wuri mu nsi ya Nengebve, na bari Hiti, bari Yebusi na bari Amori bari ku milaandu, na bari Kanaana bari bebele na mubu wa Yorodaani. »
30Kalebi wa wurusa mpuumbu yaba mungutaa mu Moose na waleele ti : « Tweendee, tu dzikee nsi na sa twaluuluka. » 31Ngo babakala bayensi na nde baleele ti : « Lo tubangisina ko, bukuri bo babvuri makwa na beetu. » 32Bo bapalisa nzoonsulu dzadzibi mu ntoono nsi yiyo yakengesiri baala ba Iselili. Bo baleele ti : Nsi yitumwiinyee beetu yidzusaa bakwee dzakala kukwo#13.32 Mpe bukuri nsi yayibi, mpe bukuri mudziingu wunamitina mantaangu momanso.. Baatu ba tumwiinyee beetu mutele wadzaangama. 33Kukwo tumwiinyee bari Nefilimi#13.33 Kumono Mba 6.4, baala ba Anaki. Ha kakati dya bo na ha busu bwa bo, beetu tubeeri bunu bambambala. Na mu bubwo bo se babee kutumwiinina.
Alliance Biblique du Congo 2024