Lutaangu 12
12
Miryami wabwiila bwaasi
1Miryami na Aaroni bakele Moose, mu ntoono mukyeetu wa ku Kusi#12.1 Kusi mbangukulu hamaha kampe « wuri mu kikuutu kya Kusani » (kufwanikisa Hbk 3.7). wukahoriri mu makweele. 2Bo baleele ti : « Yaave kuni kuri Moose kitsu ka dzoonsaana ? Buri, wahele mu kudzoonsaana na beetu se ? » Yaave wayuku mamo. 3Moose waba muutu wa bundeembu wubvuri na baatu bobanso bari ha nsi. 4Nasisuu, Yaave waleele kuri Moose, na Aaroni na Miryami ti : « Palee beenu batatu mu kweende ku nzo yangooto ya mbwanukunu. »
Bayende bobatatu. 5Yaave wasunduka kunsa tuti#12.5 Kumono Mpa 13.21 na matinu. ha nkotolo nzo yangooto. Na wateele Aaroni na Miryami, bo bapala boboolo. 6Nde wabaleele ti :
« Yukeenu kwakubwe maampu ma me !
Mbuti mu beenu kuri mubikiri Yaave,
lo mu kimono-miisu na mu ndosi me nyiri nyayabikina kuri nde,
me nyidzoonsaana na nde.
7Ngo kari bumosi ko mu kisari kyaami Moose,
nde wakwiikima mu nzo yaami yoyinso.
8Me na nde tukoodzoonsaa mu minwa na mu mamono-miisu,
ngo kari mu mankuma ko, na nde wumonaa kifwaani kya Yaave.
Mu nki beenu lwahele kumono boomo mu kukele kisari kyaami Moose ? »
9Nkesi dza Yaave dzabwa mu bo, na nde wayende. 10Tuti dya yalumuka ha yulu nzo yangooto. Miryami wabaka bwaasi, nyutu yakituka bunu mufwoofo. Aaroni bu kasyeeteke wamono ti Miryami mwa baka bwaasi. 11Aaroni waleele kuri Moose ti : « Me nyikuloombiri, mfumu yaami, mu kuhele kutuseembe mu masumu meetu. Bukuri kunsa bumpuumbulu beetu tu tobiri masumu. 12Yaa tala ko ti nyutu Miryami yiba bunu mwaana wafwa mu mwooyo nguri tekesele wubutuka, wuri mukaanda nyutu weki wafuuka. »
13Moose wasaambila kuri Yaave, waleele ti : « Oh ! Nzaambi, wamutsinikisa. » 14Yaave waleele kuri Moose ti : « Mbuti taayi dyaandi wamufulula mante ku busu, lo nde kaketi kukaangama mu nsoni mu biluumbu nsaamu ko ? Hemese kaba lutatu na nzo yangooto mu biluumbu nsaamu, ha mambisa haho tumi kabweese kuholo kibeendu kyaandi#12.14 Kufwanikisa na 5.2-3.. » 15Bapalisa Miryami lutatu na nzo yangooto mu biluumbu nsaamu. Mpuumbu yahele kunamitina nzila, natee kwabweese kubvutuka Miryami ha kibeendu kyaandi. 16Ha mambisa haho, mpuumbu yayusuka ku Haseroti mu kweende kutuunga manzo mangooto ku nsi yankatu ya Parani.
Alliance Biblique du Congo 2024