Lutaangu 14
14
Baatu babisiri kukoto ku Kanaana
1Kimvuka kyokinso kyafula misaakulu ; kaanda dyadila butsuku bwobunso. 2Baala ba Iselili bobanso bamunguta kuri Moose na Aaroni, Kimvuka kyokinso kyaleele kuri bo ti : « Ah ! Mbuti beetu bobanso twafwiiri kweetu ku Ngipiti, bunu pele ku nsi yankatu yiyo. 3Bukuri nki Yaave katutweesi ku nsi yimayi ? Mbuti ti beetu tufwa mu midziingu, na bakasi na baala beetu baba bankwari. Bubwe bu tubvutukiri kweetu ku Ngipiti. » 4Babweese kudzoonso bo na bo ti : « Tusoolee mukuutu na tubvutukee ku Ngipiti. »
5Moose na Aaroni batsukuma na bakiindila bidziri byaaku ha nsi, ha busu bwa mukaangu kya baala ba Iselili. 6Yooswa, mwaana Nuuni, bo na Kalebi, mwaana Yefune, baba mu kweetala nsi, bakaakala binkutu byaaku. 7Bo baleele kuri mukaangu ndemunso wa baala ba Iselili ti : « Nsi yiyo yitumwiinyee beetu, nsi yibvuri bubwete. 8Mbuti Yaave wutusiiriri mpemisi, lo nde sa katunata na kutuha nsi yiyo yiri mu kukuumba mabeene ma ngoombo na maasi ma nyosi. 9Ngo yaa lutungukila Yaave ko, na yaa lumono boomo ko mu baatu bari mu nsi yiyo, sa twababwiisa. Bukuri kidziimunu kya banzaambi baaku bampya kyabeeri kwebakebe kya sasikiri na bo. Yaave wuri kintwaari na beetu, yaa lubayitika ko. »
10Kimvuka kyokinso kyaŋanikisa kubadzusa mu matari. Mu kilookolo kikyo, nkeembu Yaave yamonokono munsa nzo yangooto ya mbwanukunu kuri baala ba Iselili bobanso.
Moose wuloombo mpemisi mu baatu
11Yaave waleele kuri Moose ti : « Natee kya ntaangu baatu ba banyaafuna me ? Natee kya ntaangu bo bahele kusiila kanyi mu me, koomisoko bimaangu binyayirikiri ha kakati dya bo ? 12Me nyibaseembe mu kiyoolo na kubadika saala, na mu ye, me sa nyirika kaanda dibvuri bunene na mpiinu na bo. » 13Moose wabvutula kuri Yaave ti : « Bari ku Ngipiti bayukiri ti mpiinu dza ye dza palisiri baatu bamaba, 14bo bayaabisiri kuri baatu bari mu nsi yiyo, ti ye Yaave wuri ha kakati dya kaanda didyo, wuri mu kutalisina na bo diisu mu diisu. Tuti dya ye Yaave dyateleme ha yulu bo, na kunsa tuti dya mubuungi ye wuri mu kweende ha mankula ma bo mu kiluumbu, na tuti dya mbaawu mu butsuku. 15Mbuti ye dzusiri mpuumbu yoyinso yi bunu muutu mosi, baatu bayukiryee mvuumfu sa baleele ti : 16"Yaave beeri wahele na mpiinu mu kukotoso kaanda dimadi ku nsi ya lusiilulu. Mu bubwo kabadzusiri mu nsi yankatu." 17Lumalu, hemese mpiinu dza Mfumu dzimonoko, bunu bu wadzoonsiri, mu kuleele ti : 18"Yaave wuri na malemu mu kubaka nkesi, na waluula mu bubwe, wuri na nkindusulu mutima mu bubi na nko. Ngo kakalilaa bayirikaa bubi ko. Kasi wutsuundisaa baala mu bubi bwa bataayi natee mu kiseendu kyabitatu na kyabina#14.18 Kumono Mpa 20.5-6 ; 34.6-7 ; Ngi 5.9-10 ; 7.9-10 ; kufwanikisa Edz 18.. 19Siila mpemisi mu bubi bwa mpuumbu yimayi, bunu buri bunene bwabubwe bwaaku, bunu bu wabahemisini, kubaandika ku Ngipiti natee mu ntaangu yi#14.19 Bit. 13-19 : Kumono Mpa 32.11-14.. »
20Yaave waleele : Me nyibahemisini bunu buri ndoombolo dzaaku. 21Ngo me nyiri mwooyo, na nkeembu Nzaambi yaluulisa nsi yansiina. 22Baatu bobanso bamwiinee nkeembu me na bimaangu byaami binyasiiri ku Ngipiti na ku nsi yankatu, na banseengiri mbala kuumi mu kuhele kuyuka ndiinga yaami, 23bo bamono nsi yinyasiiri nsiilulu kuri bataayi baaku ko. Bobanso banyaafunee me bayimono ko. 24Ngo kisari kyaami Kalebi, bukuri beeri watwaalisa mu Mpeeve na kunamitina mu me, sa nyimukotoso mu nsi yi kakengisiri, na kaanda dyaandi#14.24 Kumono Yos 14.9-12. sa bataambula yo bunu saala. 25Bari Amaleke na bari Kanaana badzakalaa ku duuru. Bweekipari, bvutukee ku nsi yankatu, mu kisusungu kya mubu wa madyaari.
Mfumu wanwaanisa baatu baandi
26Yaave wadzoonso kuri Moose na Aaroni : 27Natee nkya ntaangu mukaangu kyaluula bubi kimaki kinamitina mu kumunguta mu me ? Me nyukiryee kumunguta kwa baala ba Iselili mu me. 28Baleele ti : Mu kidziingu kyaami, bu leeriri Yaave, me sa nyaluyirikila kwahele lumvuki bunu buri malwaleeriri ha busu bwaami. 29Bobanso bataangu sa bafwa ku nsi yankatu yimayi#14.29 Kumono Bah 3.17., kubaandika mu wuri na mibvu makuumi moolo natee ku yulu kukwo, bukuri lumungutinee mu me. 30Me nzeengiri ti beenu lukoto ko mu nsi yinyalusiiriri lusiilulu mu kudzakala. Ha yulu wuni Kalebi, mwaana Yefune, na Yooswa, mwaana Nuuni. 31Na makaanda meenu, malwaleeriri ti : Sa maba mayekele ku kwiibi kwahele nsoni ! Me sa nyamakotoso kukwo, na mo sa mayaaba nsi yilwabisiri beenu. 32Ngo beenu sa lwafwa mu nsi yankatu yimayi. 33Baala beenu sa baba batari ba bibulu ku nsi yankatu mu mibvu makuumi mana#14.33 Mibvu makuumi mana : Kumono Biy 7.36.. Bo sa bamono mpasi mu ntoono bubi bwa beenu, natee ku lufwa beenu bobanso ku nsi yankatu. 34Bunu buri lutaangu lwa biluumbu bi lukengesirye nsi, biluumbu makuumi mana, beenu tumi lumono mpasi mu bubi bweenu mu mibvu makuumi mana, bwobumosi mubvu mosi mu kiluumbu kimosi. Mu kuri beenu luyaaba mpopi me#14.34 Buni pele beenu tumi luyaaba bubaana mu kuba na musamu na me.. 35Me, Yaave, me nzoonsiri ; bubwo me sa nyiyirika, kwahele lumvuki, kuri mukaangu ndemunso wamubi wu wantelemini : Bobanso sa babwa ku nsi yankatu yi, sa bafwa kukwo.
36Babakala baheekiri Moose mu kukengese nsi bari, babvutukaana basindiri kimvuka kyokinso mu kumunguta kuri Moose na kudzoonso kwakubi mu nsi, 37bafwa nasisuu ha busu bwa Yaave, bubadzoonsiri bubi mu nsi. 38Yooswa, mwaana Nuuni, na Kalebi, mwaana Yefune, basaala bamwooyo ha kakati dya bayensi mu kweekengese nsi.
Baatu babweese kusa nko
39Moose wayaabisa momanso mamo kuri baala ba Iselili, na baatu bakoto mu kifwiiri. 40Bo bateleme mu nkati kipari mu kutoomboko ku nkoto mulaandu, na baleele ti : Beetu tutoomboko ku kibeendu kyadzoonsiri Yaave ti : Beetu twatobiri masumu. 41Moose waleele ti : Bukuri nki beenu luri mu kuhaakila lutumu lwa Yaave ? Luluuluka ko mu maluyirika. 42Ya lutoomboko ko ! Yaave wahele ha kakati dya beenu. Yaa lweesaka kuri ti bataatu beenu baludzusa ko. 43Bari Amaleke na bari Kanaana bari ku mankula ma beenu, na beenu sa lwafwa mu mbeesi yayila. Bukuri beenu lutekirye Yaave mbisa, Yaave kaba kintwaari na beenu ko.
44Bo basa mpaaka mu kutoomboko ku nkoto mulaandu ; Ngo nkobo ya lulelusunu ya Yaave na Moose bahele kutembele kunsa kibeendu kya manzo mangooto. 45Bari Amaleke na bari Kanaana babadzakilaa ku mulaandu basunduka ; bababwiisa na bamana kubakosono natee ku Horoma#14.45 Horoma : Bvula dyahele kuyabikina kwayelemine, ngo diri lutatu kampe mu makuumi masaamunu ma bitaki mu mpele ya ku suude dya Yerusalemi, dya ku esete dya Beresabe..
Alliance Biblique du Congo 2024