Lutaangu 11
11
Bari Iselili ku Tabera
1Kiluumbu kimosi bari Iselili babeke kuyaya kuri Yaave. Yaave bu kayuka, wamono bubi mu nyayulu dzaaku, nde wabaka nkesi, na wabaheeke mbaawu yayoko nto bula. 2Bari Iselili bafula misaakulu kuri Moose. Moose wabadilila mvutu kuri Yaave na mbaawu yadzima. 3Bo baluka kibeendu kikyo nkuumbu Tabera, bukuri haho mbaawu Yaave yaba nyeengisini.
Baatu baloombo toongo
4Banzeense baba kunsa Iselili baba na nzala kudya toongo. Baala ba Iselili bo-meene se babandika mu kudila na kuleele ti : Na wutuha toongo mpisi tudya ! 5Beetu tu bambuka mwooyo ku Ngipiti mu bansu ba kingengi ba twadiiri, maleenge, bibete, ndeembe, poiro, dzoni na laayi. 6Ha heki miwiri myeetu myeki kana ; bukuri kitotolo kya kudya kyope, ha yulu maana kitsu. 7Maana yafwanikina na mankono ma koriyande : Mo maba mafwanikina na bedelyumi#11.7 Ha yulu maana na koryandere, kumono Mpa 16.31 na matinu. - Bedelyumi : Mwaa muti wuri ku Arabi, wupalaa mfuku yayibwe ; kufwanikisa Mba 2.12.. 8Mu butsuku maana yabwa. Baatu bayende, bayitolo na kuyinyika mu tari, bunu pele kuyituuta mu kidu. Bayilaamba mu nzuungu na kusa bindaatina. Luwu lwa maana lwaba buni bindaatina byamaasi. 9Mu butsuku, mbuti munoko#11.9 Kumono Mpa 16.13-15. bwiiri ha kibeendu lo, maana se yibwiiri.
10Moose wayuka baatu babadila mu makaanda maaku, mpisi muutu ha nkotolo nzo yangooto yaandi. Yaave wabaka nkesi dzamakwa, na Moose wamono bubi. 11Moose waleele kuri Yaave ti : Mu nki ye yirikiri bubi kuri kisari kyaaku ? Na mu nki me mperiri kubaka lusakumunu ha busu bwa ye, mu kutswiika ha yulu me kilemu kya baatu bobanso ? 12Buri, me nyabaka baatu bamaba ? Me nyababutiri ? Mu kuri ti ye leele me mu kubanata ha ntulu, bunu bunataa nguri mwaana wuri mu beene, ku nsi yiwasiiri nsiilulu kuri bataayi baaku ? 13Kuri me nyibaka toongo twakuha baatu bobanso ba ? Bukuri bari mu kudila kuri me na kuleele ti : « Wutuha toongo beetu tudya ! » 14Me lo nyahele kubangisina kunata kaanda dyodinso dimadi me mukaka. Bukuri dibvuriri kuleme mu me. 15Mbuti bubwo wuyirika mu me, lo bubwe dzusa me, mbuti me ntaamburi bweese kuri ye, mpisi me mpele kumono manyoongi.
16Yaave waleele kuri Moose ti : Kutukisa me makuumi nsaamu ma babakala mu bakuutu ba Iselili, babo bayaari ye ti bakuutu bunu pele batari ba baatu. Wabaholo na wabanata ku nzo yangooto ya mbwanukunu, mu kubasoongo kintwaari na ye ha mankula ma me. 17Me sa nsunduka mu kudzoonso na ye, na kuholo ndaambu mpeeve yiri mu ye mu kuha kuri bo, mpisi banaanguna kintwaari na ye kilemu kya kaanda, na ye wubweese kuba ye mukaka ko mu kudinata. 18Kuri baatu bobanso, ye yelemini kubaleele ti : Bwee ha kipari, beenee batsyeemeke, na beenu sa ludya toongo. Bukuri Yaave wayukiri nyiimunu dzeenu. Nde yaari ti beenu luri na nzala toongo, mu kuleele ti beetu twabeeri twayuka kweetu ku Ngipiti ; hango nkuumbu nde sa kaluha toongo tu ludya. 19Beenu luri ndiila mu kiluumbu kimosi kitsu ko, bunu pele biluumbu byoolo, ti hayuku bitaanu, kuumi, makuumi moolo kitsu ko. 20Ngo mu ngoondo mosi, natee kubipala mu mamboombo meenu na kubidufuna. Myominso mimyo bukuri beenu lwayekiri Yaave wuri ha kakati dya beenu na kudila ha busu bwa nde mu kuleele ti : « Mu nki beetu twa pariri ku Ngipiti ? »
21Moose wabweese kuleele ti : « Baatu 600 000 badyengekele me. Na ye wuleele ti me nyibaha toongo na badya mu ngoondo mosi ! 22Ti hayuku tudzusiri bibulu byobinso byantele na byabinene, lo tumi bikuka mu bo ? Ti hayuku batoriri bambisi bobanso bari mu mubu, lo tumi bakukula ? » 23Yaave wabvutula kuri Moose ti : « Buri kooko kwa Yaave kuri kwakukufi ? Kilookolo kisiiri kyantele ye sa mono ti ma nyakuleeriri mayirima bunu pele. »
Nzaambi heeri ndaambu Mpeeve yaandi kuri bakuutu makuumi nsaamu
24Moose wapala na waleele kuri baatu maampu ma Yaave. Nde wakutukisa makuumi nsaamu ma bakulu bababakala, na wa batelemese mu teke nzo yangooto. 25Yaave wasunduka kunsa lubuungi#11.25 Kumono Mpa 13.21 na matinu., wadzoonso na Moose, na waholo ndaambu Mpeeve yiri mu nde, na waha kuri makuumi nsaamu ma bakuutu babakala. Mpeeve bu yababwiila, bakuutu babeke mu kubikula, ngo baba bahele kunamitina mu kubikula.
26Kwaba babakala boolo baba basaala ku nzo yangooto. Mosi waba nkuumbu Eledadi, wakaka Medadi. Mpeeve yababwiila, bukuri bo se baba mu lutaangu, ngo basii kweende ku nzo yangooto ya mbwanukunu ko, na babeke mu kubikula bunu babikiri kunsa nzo yangooto. 27Mwaana mosi wamubakala wadzumuna mu kweeyaabisa kuri Moose ti : « Eledadi na Medadi bari mu kubikula kunsa nzo yangooto. » 28Yooswa, mwaana Nuuni, kisari kya Moose, kubaandika mu butuutu bwaandi, waleele ti : « Moose, mfumu yaami, badika mu kubikula. » 29Moose wamubvutula ti : « Buri ye wuri na bukwa mu me ? Heki mbuti Yaave heeri Mpeeve kuri baatu bobanso mu kubikula ? » 30Mu didyo, Moose wabvutuka ku nzo yangooto na makuumi nsaamu ma bakuutu ba Iselili.
Kibiroti-Tahabva : Binkari
31Kiteembu kyaheekiri Yaave ku mubu kyanata binkari ku nzo yangooto. Banoni baba balaka mu teke nzo yangooto, mu ludyaatu lwa kiluumbu kimosi, na mudzuku wa mumbufu wa mankwaanga moolo ha yulu butoto. 32Mpuumbu yateleme mu kiluumbu kyokinso na butsuku bwobunso mu kutolo banoni natee mu kiluumbu kyaba nama. Wunde wutoriri kiteesu kya banoni kibvuri buntele lo bakiri midungulu kuumi. Bo baba kubayanikaa mu teteke dya nzo yangooto. 33Toongo twaba twakiri hansa miinu, nkesi dza Yaave dza babwiila. Yaave wabaseembe mu kiteesu kyansisi. 34Baluka kibeendu kikyo nkuumbu Kibiroti-Tahabva (Mampeembe ma nyiimunu). Bukuri haho badziikiri mpuumbu baatu yaba na nzala kudya.
35Mpuumbu yanaanguka ha Kibiroti-Tahabva mu kweende ku Haseroti, na badzakala ha Haseroti.
Alliance Biblique du Congo 2024