Levitiki 3
3
Kikabu kya kintwaari
1Mbuti muutu tiiri kuha kikabu kya kintwaari kya mu bibulu byabinene, lo yelemini kunata ngoombo mosi yamulumi bunu pele yamukasi yahele na kipfuumi ha busu bwa Yaave. 2Nde sa kateeteke kooko kwaandi ha yulu mutu kibulu na kukeke ha mweelu nzo yangooto ya mbwanukunu. Bangaanga-Nzaambi, baala ba Aaroni sa bayitila makila mu mateteke ma dziku. 3Mu kikabu kikyo kya kintwaari sa kaha bunu kikabu kyayoko kuri Yaave : Maasi momanso mafuka bya mu mwooyo, 4mamfi momoolo masaanga na maasi manamitina mu mateteke, na ma mfwaafu sa bayusula mo ha kimosi na mamfi. 5Bangaanga-Nzaambi sa bayoko biitu byobinso ku dziku, ha kimosi na bikabu byakuka byasuusa ha yulu bisisi bya mbaawu. Kikyo kikabu kyayoko mfuku yayibwete kuri Yaave.
6Mbuti kikabu kyaandi kiyusukiri mu bibulu byantele, lo yelemini kuha kibulu kyamulumi bunu pele kyamukasi kyahele na kipfuumi mu kikabu kya kintwaari kuri Yaave. 7Mbuti kimeeme kaha mu kikabu, lo yelemini kukinata ha busu bwa Yaave. 8Nde sa kateeteke kooko ha yulu mutu kibulu kya kikabu kyaandi na kukeke kyo ha lunkula lwa nzo yangooto ya mbwanukunu, na baala ba Aaroni sa bakele makila na kumayitila mu mateteke ma dziku. 9Mu kikabu kikyo kya kintwaari, sa kaha bunu kikabu kyayoko kuri Yaave : Mukila ndemunso wubahaambula na mungongo, na maasi momanso mafuka midya, 10mamfi momoolo masaanga na maasi manamitina mu mbaansi na mamfi, sa bayusula byo ha kimosi na mamfi. 11Ngaanga-Nzaambi sa kayoko biitu byobinso bibyo ku dziku, biba byandya bi bayoko kuri Yaave.
12Mbuti muutu neti ntaba yamulumi bunu pele yamukasi, lo yelemini kunata kibulu kikyo ku kibeendu kyangisi. 13Nde sa kateeteke kooko ha yulu mutu kibulu ; nde sa kakikeke ha lunkula lwa nzo yangooto ya mbwanukunu, na baala ba Aaroni sa bayitila makila ma kyo mu mateteke ma dziku. 14Mu kimbwanga kikyo nde sa kasoongo, mu kikabu kyanyeengusu mu mbaawu mu ntoono Yaave : Maasi mafuka midya, maasi momanso mari ha yulu midya, 15mamfi momoolo na maasi ma madyengekele, mafuka mu mbaansi, na lunzala, lukayusula ha teke mamfi. 16Ngaanga-Nzaambi sa kayanga bibyo ha dziku. Bibyo byandya byanyeengusu mu mbaawu, mfuku yayibwe. Maasi momanso ma Yaave. 17Yimayi ngo ngisi ya mantaangu momanso kuri biseendu byeenu na mu bibeendu byeenu byobinso bi ludzakala : Kalutsiitsa kudya maasi na makila ma kibulu ko.
Alliance Biblique du Congo 2024