Levitiki 4
4
Kikabu kya mpemusunu masumu
1Yaave wadzoonso kuri Moose na waleele ti : 2Yaabisa kuri baala ba Iselili na baleele ti : Mbuti muutu tobiri masumu kwahele kuŋana mu kuyirika dyadiku mangisi ma Yaave, lo luyelimini kusa bumabu :
3Mbuti ngaanga-Nzaambi ya sakumuna tobiri masumu, na neti baatu balaka ku nsumukunu, lo nde yelemini kunata ngoombo yamulumi yahele na kipfuumi kuri Yaave, mu kubaka mpemusunu masumu. 4Nde sa kanata ngoombo yamulumi yiyo, ha mweelu nzo yangooto ya mbwanukunu, ha busu bwa Yaave ; sa kateeteke kooko ha yulu mutu ngoombo yiyo na kukeke yo ha busu bwa Yaave. 5Ngaanga-Nzaambi yataambula nkusulu sa kaholo makila ma ngoombo na kumanata ku nzo yangooto ya mbwanukunu. 6Sa katsuba muleembu waandi munsa makila na kunyaka nyaka nsaamu ha busu bwa Yaave, ha mankula ma nsaanda yakakisila kibeendu kyangisi. 7Ngaanga-Nzaambi sa kakusa makila mu mampoko mari ha dziku difwiitaa mwiisi wamfuku, wuri ha busu bwa Yaave, kunsa nzo yangooto ya mbwanukunu, sa kayitila makila ma ngoombo momanso masaala ha nsuku dziku dibayokaa bikabu biri ha mweelu nzo yangooto ya mbwanukunu. 8Nde sa kayusula maasi ma ngoombo momanso ma kikabu kya mpemusunu masumu na maasi mafuka midya. 9Mamfi momoolo na maasi mamafuka, maasi mafuka mu mbaansi, na lunzala, sa bibayusula ha teke na mamfi, 10bunu bu bayusilaa mu ngoombo ya kikabu kya kiyeengi ; ngaanga-Nzaambi sa kabiyanga ha dziku dibayokaa bikabu. 11Ha mambisa haho sa banata byobinso bisaala mu kibulu, mukaanda, toongo, mutu, makotiko, byobinso bya mu mwooyo, 12ha mbisa kibeendu kyakibwe ku mbisi bula ku bari basuusa lufutu luri maasi ma dziku, na kubilooso ha yulu bisisi bya mbaawu. Ha yulu mudzuku lufutu bayokolo byo.
Kikabu kya mpuumbu yoyinso
13Mbuti mukaangu ndemunso wa Iselili tobiri masumu kwahele kutsima, mu kuyirika kiyiriki kyadika mangisi ma Yaave, lo Iselili dyodinso di bvuukiri, ti hayuku bahele kuyaaba. 14Mbuti mukaangu ndemunso taambukiri bubi bwaandi, lo bayelemini kunata ngoombo yamulumi mu kubaka mpemisi kuri Nzaambi ; na kunata ngoombo yamulumi ha lunkulu lwa nzo yangooto ya mbwanukunu ; 15bakuutu ba mukaangu sa bateeteke myooko mya bo ha yulu mutu ngoombo, na mosi mu bo sa kayikeke ha mankula ma Yaave. 16Ngaanga-Nzaambi yataambula nkusulu sa yanata makila ma ngoombo yamulumi munsa nzo yangooto ya mbwanukunu ; 17nde sa katsuba muleembu munsa makila, na kunyaka makila nyaka nsaamu, ha mankula ma Yaave ha kisusungu kya nsaanda ya kakisiila kibeendu kyangisi. 18Sa kakwasa makila mu mampoko mari ha dziku diri ha lunkulu lwa Yaave, munsa nzo yangooto ya mbwanukunu, na makila masaala, sa kayitila ha nsuku dziku dibayokaa bikabu, diri ha mweelu nzo yangooto ya mbwanukunu. 19Nde sa kayusula maasi momanso na kumayoko ku dziku, 20bu kayirikiri mu ngoombo yamulumi mu masumu ma nde-meene, bunubwo se kayirika mu Iselili mu mpemusunu masumu ma bo, na bo sa babaka mpemisi kuri Nzaambi. 21Nde sa kanata byasaariri mu ngoombo yamulumi ku mbisa bula na sa kayoko bunu bu kayokiri ngoombo mu masumu ma nde-meene ; kikyo kikabu kya mpemisi mu Iselili dyodinso.
Kikabu mu ntoono masumu ma mfumu
22Mbuti mfumu tobiri masumu kwahele kutya kuyirika madika mangisi ma Yaave, lo nde ngaa lumvuki, 23bunu pele taambukiri masumu maandi makayirikiri, lo yelemini kuha ntaba yamulumi yahele na kipfuumi. 24Nde sa kateeteke kooko kwaandi ha yulu mutu ntaba yamulumi, na kuyikeke ha kibeendu kibayokaa bibulu bi bahaanaa mu kikabu ha mankula ma Yaave, kikabu kya kubaka mpemisi masumu maandi. 25Na ngaanga-Nzaambi sa katsuba muleembu mu makila ma kibulu, na kumakwasa mu mampoko mari ha dziku dibayokaa bikabu, na makila masaala, sa kayitila ha nsuku dziku dibayokaa bikabu. 26Makila momanso sa kayoko ha dziku bunu maasi ma kikabu kya nsyemusunu, na nde sa kayirika mu ngaanga-Nzaambi mani makasiiri mu mfutulu masumu, na nde sa bamuhemesene.
Kikabu kya muutu wabuunu
27Mbuti muutu wabuunu tobiri masumu kwahele kutya, mu kuyirika madika mangisi ma Yaave, lo nde siiri lumvuki. 28Mbuti taambukiri masumu maandi makayirikiri, lo nde sa kanata kikabu kya ntaba yamukasi yahele na kipfuumi mu ntoono masumu maandi. 29Nde sa kateeteke kooko ha yulu mutu kikabu kyaandi, na kukikeke ha kibeendu kibakekaa bibulu bi bahaanaa mu bikabu. 30Ngaanga-Nzaambi sa kaholo makila mu muleembu na kumakwasa mu mampoko mari ha dziku dibayokaa bikabu, nde sa kayitila makila masaala ha nsuku dziku. 31Nde sa kayusula maasi momanso buni bu kayusiri ma kikabu kya nsyemusunu, na ngaanga-Nzaambi sa kamayoko ha dziku mpisi Yaave kasiika mfuku mwiisi, na ngaanga-Nzaambi sa kayirika makayirikiri mu mfutulu masumu, na nde sa bamuhemesene.
32Mbuti nde neti kikabu kya kimeeme mu masumu maandi, lo yelemini kunata kyamukasi kyahele na kipfuumi. 33Nde sa kateeteke kooko kwaandi ha yulu mutu kikabu kya masumu maandi, na sa kakikeke ha kibeendu kibakekaa bibulu bi bahaanaa mu kikabu. 34Ngaanga-nzaambi sa kaholo makila mu muleembu, na kumakila mu mampoko mari ha dziku dibayokaa bikabu, na makila momanso masaala sa kayitila ha nsuku dziku. 35Nde sa kayusula maasi ma kibulu momanso, bunu bu kayusiri maasi ma kikabu kya nsyemukunu kya kimeeme, na ngaanga-Nzaambi sa kayoko mo ha dziku na bikabu byakaka byayoko kuri Yaave. Nde sa kayirika kuri ngaa-masumu mani makayirikiri mu mpemusunu masumu, na masumu maandi sa maba mahemesunu.
Alliance Biblique du Congo 2024