Levitiki 2
2
Kikabu kyabikunu
1Mbuti muutu tiiri kunata kikabu kyabikunu kuri Yaave, lo yelemini kuholo fufu dya masaangu, sa kayitila maasi na kuteeteke mananaasi. 2Nde sa kanata byo kuri bangaanga-Nzaambi, baala ba Aroni. Sa kaholo kikaayi kya fufu dya masaangu, kyabvuuta na maasi na mananaasi momanso. Ngaanga-Nzaambi mosi sa kayoko ndaambu kikabu kikyo bunu mbambukulu mwooyo. Kikyo kikabu kyayoko, kituumbula mfuku yayibwete kuri Yaave. 3Ndaambu yisaala mu kikabu sa yaba ya Aaroni na baala baandi ; kikyo kibari kibvuri bungisi mu bikabu byayoko bya Yaave.
4Mbuti ye weki ha kikabu, mu bikabu bya bikunu, lo kunata bini bindaatini byasaanga na maasi mahele lufunusu bunu pele mbaanda yahele lufunusu yibari bayitila maasi. 5Mbuti kikabu kya kukaanga ha yulu kibeke, lo kiyelemini kuba mu fufu dya masaangu dyahele na lufunusu, na dibari babvuuta na maasi ; 6sa ba sa dyo mu binzekiri, na kubweese kuyitila maasi. Kikyo kikabu kya bikunu. 7Mbuti kikabu kya kukaanga ha kibeke, lo kiyelemini kuba mu fufu dya masaangu na maasi. 8Sa banata se kikabu kyabikunu kyayirika bubwo kuri Yaave, na kuha kyo kuri ngaanga-Nzaambi, wukinata ku mpele dziku. 9Nde sa kaholo kikuuku kibateelaa ti "mbambukulu mwooyo" na kukiyoko ku dziku. Kikyo kikabu kyayoko, mfuku yayibwete kuri Yaave. 10Ndaambu kikabu yisaala ya Aaroni na baala baandi ; kikyo kibari kibvuri bungisi mu bikabu byayoko bya Yaave.
11Kuri kikabu ti kimosi ki luha kuri Yaave kiba na lufunusu ko : Kalutsiitsa kusalila lufunusu bunu pele maasi ma nyosi munsa nyirikulu kikabu kiba yokolo Yaave ko. 12Bikabu bya mintekesele, luyelemini kunata byo kuri Yaave, na kubiyoko pe ku dziku, ka biri mpalisila mwiisi wamfuku yayibwe ko.
13Bayelemini kusa mungwa ha yulu mpisi kikabu kya bikunu. Kabatsiitsa kunyaafuna mungwa ko, bukuri mungwa wuri kifwaani kya lulelusunu lwasiiri Nzaambi na beenu. Hango nkuumbu kikabu kya mungwa kiba kyabvuuta na bikabu byobinso.
14Ntaangu yi lweki nata kuri Yaave bikabu bya bikunu byatete bya bitotolo bya mansi meenu, luyelimini kubaandika kukaanga minsengele ku mbaawu. Heki tumi lweki nyika nsaangi. Mu ntaangu yi lweki binata, 15beenu sa lwayitila maasi na kusuusa mananaasi ha yulu kyo. Sa kyaba kikabu kya bikunu. 16Ha mambisa haho ngaanga-Nzaambi sa kayoko kikuuku kibateelaa ti "mbambukulu", mu kuyaaba ndaambu ya nsaangi na ya maasi, na mananaasi momanso. Kikyo kikabu kyayoko kya Yaave.
Alliance Biblique du Congo 2024