Yooswa 8
8
Nkalulu bvula dya Ayi
1Yaave waleele kuri Yooswa ti : « Yaa ba na boomo ko na yaa holo bito ko. Holo baatu ba ye bobanso bangaa-mudziingu, teleme na yende wenwaanisa Ayi. Mono, me mwayekele mu myooko myaaku, mbyaasi Ayi, baatu baandi, bvula dyaandi na nsi yaandi. 2Yende wesa Ayi na mbyaasi yaandi bunu bu wasiiri ku Yeriko na mbyaasi yaandi. Holee kweenu bitotolo bya bo na bibulu byaaku. Ye ngo wuri, yeende we baandikila mudziingu ku mambisa ma bvula#8.2 Mambisa ma bvula, kukwo kwaba kwasiingimina babakebaana bvula. mu mansweemunu. »
3Yooswa wateleme na mukaangu waandi ndemunso mu kwenwaanisa Ayi. Nde wasoolo bankanyi 30 000 na wabasindika mu butsuku, 4wabaha lutumu lumalu : Yendee lusweeme ku mbisa bvula. Yaa lusasika la na bvula ko ; beenee bayirima beenu bobanso mu mudziingu. 5Me na baatu bobanso bari na me sa twakokosolo na bvula, heki, ntaangu yipala baatu ba Ayi mu kutubwaana bunu mu mbala yatete, beetu sa twayitika ha mankula ma bo bunu bwaba hatete. 6Bo sa batulaanda natee kutubasasila la na bvula, bukuri bo sa batsima ti beetu turi mu kuyitika ha mankula ma bo bunu bwaba hatete. 7Haho, beenu luteleme ku luri lwasweeme mu kuholo bvula, Yaave Nzaambi yeenu sa kadiyekele mu myooko myeenu. 8Lumanaa kuholo bvula, yokee dyo mbaawu. Beenu sa lwasalila bunu buri maampu ma Yaave Monee, me nyiluheeri lutumu. 9Yooswa waheeke bankanyi, bayende ku kibeendu kya kusweeme na bakiingila ha kakati dya Beteli na Ayi ku wesete dya Ayi. Yooswa walutisa butsuku ha kakati dya bankanyi bakaka.
10Yooswa wasiimbika mu nkati kipari, wataanga baatu baandi, na watoomboko na bakuutu ba Iselili mu kwenwaanisa baatu ba Ayi. 11Baatu baandi bobanso bangaa-mudziingu baba na nde batoomboko, bakokosolo natee ha mankula ma bvula, na bayirika kibeendu kyaaku kya manzo yangooto ku noode dya Ayi. Duuru dimosi dyaba ha kakati dya bo na bvula. 12Yooswa waholo baatu kampe 5 000 na wabasweeke ha kakati dya Beteli na Ayi, ku wesete dya bvula. 13Ntaangu yasuusiri kaanda baatu bobanso ha kibeendu kya manzo mangooto ku noode dya bvula, na bakebi ku wesete dya bvula, Yooswa wayende butsuku bubwo ku kakati dya duuru. 14Mbyaasi Ayi bu kamono bubwo, nde na baatu baandi bobanso bateleme mu mawasu na bapala mu kweebwaana Iselili mu mudziingu, ha kibeendu kyakikulu, ku kibiti kyakana. Nde waba wahele kuyaaba ti bamulebekele mweete ku mbisa bvula. 15Yooswa na Iselili dyodinso babwoongiri mudziingu ha mankula ma bo na bayitikiri mu nzila ya nsi yankatu#8.15 Mu nzila ya nsi yankatu : Haho lo ti ku bibeendu byahele kudzakala baatu biri mu mpele duuru dya Yorodaani.. 16Bateele baatu bobanso ba bvula mu kubalaanda na bo bayende ku mambisa ma Yooswa, bubwo, bo babanata la na bvula. 17Muutu ti mosi kasii saala kunsa Ayi#8.17 Kunsa Ayi : Mu matinu mantama ma mu Kingereke ; mu Kihebereho kunsa Ayi na Beteli. na ku Beteli ko, kwahele kwenama Iselili, bobanso bapala na bayekele bvula mwaasi mu kulaanda Iselili. 18Yaave waleele kuri Yooswa ti : Talisa dyoongi diwuri na dyo ha kooko ku mpele Ayi, bukuri me nyikuyekekele dyo. Yooswa watalisa dyoongi dikaba na dyo ha kooko ku mpele bvula. 19Nde bu kalaambila kooko, baatu baba basweeme bapala mu mawasu mu kibeendu kibaba, bo badzumuna, bakoto kunsa bvula, badikala na babingikila mu kudiyoko mbaawu.
20Baatu ba Ayi basyeeteke : Bo bamono mwiisi wuri mu kutuumbuka mu bvula natee ku yulu. Bo bahele kubaka kibeendu kya kuyitika mu mpele mosi bunu pele yakaka. 21Yooswa na Iselili dyodinso bu bamono ti baba basweeme ba mwakala bvula na mwiisi wuri mu kutuumbuka kunsa bvula, bo babvutuka na banwaanisa baatu ba Ayi. 22Bari Iselili bakaka bapala kunsa bvula mu kubabwaana, kuri bari Ayi beki ha kakati mpele na mpele, bo babanwaanisa, natee kuri bahele kusiisa ti muutu mosi wamutsiina bunu pele wayitika. 23Baholo mbyaasi bari Ayi wamwooyo na bamunata kuri Yooswa. 24Iselili bu kamana kudzusa baatu ba Ayi bobanso kunsa kibiti na ku nsi yankatu ku baba kwebanama, na bobanso bu bamana kufwa mu mbesi yayila natee wampotolo, bari Iselili bobanso babvutuka ku Ayi. 25Lutaangu lwa bobanso bafwiiri kiluumbu kikyo, bakyeetu na babakala, lwaba baatu 12 000, bobanso baatu ba Ayi. 26Yooswa wakebe kooko kwalaambila na dyoongi dyaandi natee kukameeni kudzusa baatu ba Ayi bobanso. 27Bari Iselili, baholo bini bibulu na bitotolo bi babakiri kunsa bvula didyo, bunu bwaba lutumu lwa Yaave kuri Yooswa. 28Yooswa wayoko bvula dya Ayi na wadikitila kibeendu kyankatu#8.28 Nkuumbu ya Ayi mambangukulu mu Kihebereho lo ti mudzuku matari., natee mu kiluumbu ki. 29Bo baleleke mbyaasi ya Ayi mu muti natee mu nsinsika. Mu dyaamunu ntaangu, Yooswa watuma ti basundula mvuumbi#8.29 Bamvuumbi, babari baleleke haba lo bahele kukyeelele kuri balele mu butsuku (kumono Ngi 21.22-23). . Bo bayilooso ha nkotolo bvula, na ha yulu nde, bateeteke mudzuku matari wamunene, wakiri natee mu kiluumbu ki.
Ntaangulu mukaanda mangisi ha yulu mulaandu wa Ebale
30Haho, Yooswa katuunga dziku kuri Yaave, Nzaambi Iselili, ku mulaandu wa Ebale#8.30 Kumono Ngi 11.29 na matinu.. 31Bunu bwatumini Moose ; kisari kya Yaave kuri baala ba Iselili, bunu bwatina mu mukaanda mangisi ma Moose. Yooswa watuunga dziku dya matari ma nswaasa, mari makiri kuhala pe mu kitari#8.31 Byahele kuhala... kitari : Kumono Mpa 20.24-26 ; Ngi 27.5-6.. Bari Iselili baha bikabu bya kuyoko, na bibulu bya kukeke bya kidzuunu. 32Haho, Yooswa katina#8.32 Matari mari lutumu lwatina : Kumono Ngi 27.2-3. Lwadzoolo ha yulu matari lutumu lwatinini Moose ha busu bwa baala ba Iselili. 33Iselili dyodinso, bakuutu baandi, batini na balarimi baba kibari na kibari kya nkobo ya lulelusunu ya Yaave, ha mankula ma bangaanga-Nzaambi Baleevi babakwenata nkobo ya lulelusunu ya Yaave, banzeense na bangaa-nsi baba ndaambu ku kibari kya mulaandu wa Ngaridzimi, heki ndaambu yakaka ku kibari kya mulaandu wa Ebale, bunu bwatumini Moose kisari kya Yaave, lwatete, mu kusakumuna kaanda dya Iselili#8.33 Mu bangaanga-Nzaambi Baleevi, kumono Ngi 17.9 na matinu. Ku mpele ya mulaandu wa Ngaridzimi : Kumono Ngi 11.29 na matinu. - Moose watumini mu kusa bubwo : Kumono Ngi 27.11-13.. 34Ha mambisa haho, Yooswa wataanga misamu myominso mya mukaanda mangisi, mya lusakumunu na mya mampopi, bunu bu miri myatina mu mukaanda mangisi. 35Kwasiiri kuba musamu ti mosi mu myominso myatumini Moose, wuri Yooswa kasiiri kutaanga ha lukutukunu lwa baala ba Iselili ko, bakyeetu, bilesi na banzeense baba badzakala ha kakati dya bo.
Alliance Biblique du Congo 2024