Yooswa 7
7
Lumvuki na nseembulu Akani
1Baala ba Iselili basa lumvuki, bo basinina mangisi, mu ntoono bitotolo bya mpopi bi badikiri kuholo#7.1 Kumono 6.17-19. : Akani, mwaana Karimi, mwaana Dzabidi, mwaana Dzera, mu kaanda dya Yuuda, waholo ndaambu bitotolo byabulula mpopi na Yaave wabaka nkesi dzalaka mu baala ba Iselili.
2Yooswa waheeke baatu bafumuna ku Yeriko, mu kweende ku Ayi bebele na Bete-Abvene ku esete dya Beteli na wabatuma ti beende mu kwetala nsi. Baatu batoomboko mu kuyaaba nsi ya Ayi. 3Baatu babo babvutuka kuri Yooswa, bamuleele ti : « Baatu bobanso yaa batoomboko ko, ngo nkama makuumi moolo bunu pele nkama makuumi matatu ma baatu matoomboko, mu kunwaanisa na kubwiisa bari Ayi. Yaa holoso baatu bobanso bito kukwo ko bukuri bari ku Ayi lutaangu mwaa lwantele. » 4Baatu kampe mafuundu matatu kitsu mu bo banweeti ku mudziingu, ngo bo bayitika ha mankula ma baatu ba Ayi. 5Bamaba badzusa kampe makuumi matatu na basaamunu ma baatu, na babalaanda ha mankula ma mweelu bvula natee ku Sebarimi#7.5 Sebarimi : Kibeendu kikyo kyahele kuyabakana., na mu nkulumusu, bo ba batsyaamuna. Baatu bito byaholo na banyoongo mu mitima.
6Yooswa wakaakala binkutu byaandi watsukuma wayilimisa busu bwaandi ha nsi, ha mankula ma nkobo Yaave natee mu nsinsika, nde na bakuutu ba Iselili. Banyaka fuunda ku yulu mitu. 7Yooswa waleele ti : « Ah, Mfumu Nzaambi ! Mu nki ye wasaburi baatu bamaba Yorodaani, buri mu kutuyekele mu myooko mya bari Amori na mu kutufuukisa ? Beetu nkani twaba dzakala kweetu kunu ku simu dya Yorodaani ! 8Sa mpemisi Mfumu, nkya dyo nyileele mu lumalu bukuri Iselili mwayitika ha busu bwa bataatu baandi ? 9Bari Kanaana na bobanso badzakala mu nsi yi bu bayuka, sa batudyengekele na kuyaala nkuumbu beetu ha butoto. Ngo ye nki wusa mu nkuumbu yaaku yayinene ? »
10Yaave waleele kuri Yooswa ti : « Teleme, mu nki ye wuri watsukuma na wayilimisa busu bwaaku ha nsi ? 11Iselili wasumukini, na nde wasinini mangisi ma lulelusunu lunyasiiri kuri bo, bukuri bo bahoriri bitotolo bya mpopi, bayibiri bitotolo, basii mpya, na basweekiri byo munsa bitotolo byaaku. 12Mu bubwo, baala ba Iselili, bari ntelemene ha mankula ma bataatu baaku ko, bo sa bayitika ha busu bwa bataatu baaku, bukuri bo-meene se beeki bakoto munsa mpopi. Me mbweese kuba kintwaari na beenu ko, mbuti beenu lwahele kulooso bitotolo bya mpopi biri ha kakati dya beenu. 13Teleme na yende welubula baala ba Iselili, wubaleele ti : Beene lwatsyeemeke mu mitima ha kipari, bukuri bumabu Yaave, Nzaambi Iselili kari mu kuleele : Bitotolo bya mpopi biri ha kakati dya beenu, beenu luri ntelemene ha busu bwa bataatu beenu ko, natee luyusiri bitotolo bibyo ha kakati dya beenu. 14Wasee ha kipari mu mpisi kaanda ; kaanda disoongo Yaave, sa diisa dimonokono mu mpisi mwooyo, mwooyo wusoongo Yaave sa kiisa mu mpisi nzo, nzo yisoongo Yaave, baatu baandi sa biisa mosi mosi#7.14 Nsoololo yiyo yaba mpe kusiila mu nteleele wari (kumono 1Sa 14.40-42).. 15Muutu wunde wubasoongo mu ntoono bitotolo bya mpopi, sa bamuyoko ku mbaawu, nde na byobinso bya nde, bukuri nde wasinini mangisi ma lulelusunu lwa Yaave, nde wasiiri buwulu mu Iselili. »
16Yooswa wateleme mu kipari, watumisa baala ba Iselili mu bitsuumbu-bitsuumbu, na basoongo kaanda dya Yuuda. 17Nde watumisa kaanda dya Bayudayo, na basoongo kaanda dya Dzera ; nde watumisa kaanda dya Dzera, na basoongo nzo Dzabidi. 18Yooswa watumisa nzo Dzabidi, muutu mosi mosi. Basoongo Akani, mwaana Karimi, mwaana Dzabidi, mwaana Dzera wa kaanda dya Yuuda. 19Yooswa waleele kuri Akani ti : « Mwaana me, mbuti ye tiiri, dumisa Yaave, Nzaambi ya Iselili, taambula bubi bwaaku ha busu bwa nde na leele me ngwanwa, ye nki wasiiri ? Yaa nsweekele ntoono ti mosi ko. » 20Akani wabvutula kuri Yooswa ti : « Ngwanwa, me nyasumukini kuri Yaave, Nzaambi Iselili. Mono minyasiiri : 21Munsa bitotolo bya mudziingu me nyamwiini, kiyuungu kimosi kya Sinehare kyakibwete, nkama dzoolo dza mipata na muswa woolo wa ndaambu kilo, me nyabakiri nzala byo na nyabihoriri. Byo byasweeke kunsa butoto ha kakati dya nzo yangooto me, na palata dziri ku nsuku. »
22Yooswa waheeke bantumu, bo badzumuna ku nzo yangooto ya Akani, bamono kiyuungu kyaba kyasweeke na palata ku nsuku. 23Bo baholo bitotolo bibyo ha kakati dya nzo yangooto na babinata kuri Yooswa na kuri baala ba Iselili bobanso. Babiyalimina ha busu bwa Yaave#7.23 Ha matu ma Yaave : Mpila-mosi ti ha matu ma sanduku dyangisi di bakoohololaa bunu mboloko Yaave.. 24Yooswa waholo Akani, mwaana Dzera, palata, kiyuungu na muswa woolo, baala baandi bababakala na babakyeetu, bangoombo na bampuunda baandi, bimeeme na bantaba baandi, nzo yangooto yaandi na byobinso byaba bya nde. Iselili dyodinso na Yooswa bamunata ku duuru dya Akori#7.24 Duuru dya Akori : Ku esete dya Yerusalemi. Dyo dyaba saana ti baluta ku duuru dya Yorodaani mu nsi ya milaandu ya Palesetine.. 25Yooswa waleele ti : « Mu nki ye wasakisiri beetu mpasi#7.25 Kitoolo kibabaangula mu (kunata mpasi), kiri bwobumosi na Akori mu mambangukulu. dzimadzi ? Yaave ka kumonoso mpasi mu kiluumbu kimaki. » Iselili dyodinso dya mudzusa mu matari, baala ba Iselili bayoko byobinso bya nde ku mbaawu na badzusa baatu baandi mu matari. 26Bakutukisa mudzuku matari wamunene ha yulu nde, mudzuku matari wunde wakiri tee mu kiluumbu kimaki. Yaave wabvutula mutima mambisa, na nkesi dzaandi dza holoko. Mu ntoono yiyo, baheeri kibeendu kikyo nkuumbu ya duuru dya Akori (mbangukulu ti mpasi), natee mu kiluumbu kimaki.
Alliance Biblique du Congo 2024