Yooswa 6
6
Baala ba Iselili bakala Yeriko
1Yeriko dyaba dyakaanga na dyakakisila ha mankula ma baala ba Iselili. Kuri muutu ko wabapalaana bunu pele wabakotaana. 2Yaave waleele kuri Yooswa ti : « Mono, Me nyekiri ha myooko mya ye, Yeriko, mbyaasi yaandi na bankanyi baandi. 3Ye na bayongolo baaku bobanso, sa lwadyengekele bvula, seenee bubwo mbala mosi mu kiluumbu mu lutaangu lwa biluumbu bisaamunu. 4Bangaanga-Nzaambi nsaamu sa banata mamvumvuri nsaamu ma mampoko ma bimeeme byabalumi ku mankula ma nkobo. Kiluumbu kyansaamu, beenu sa lwadyengekele bvula mbala nsaamu, na bangaanga-Nzaambi bakwefula mamvumvuri. 5Mu ntaangu yibafula mamvumvuri, ntaangu yiluyuka mbeembu mvumvuri, baatu bobanso sa bafula miloolo mya mudziingu, na kibaka kya nkalulu bvula sa kyabwa. Haho, baala ba Iselili babaandika mudziingu, mpisi nde kusuunguma ha mankula maandi. » 6Yooswa, mwaana Nuni wateele bangaanga-Nzaambi na waleele kuri bo ti : « Holeenu nkobo ya lulelusunu, na bangaanga-Nzaambi nsaamu bari na mamvumvuri nsaamu beyende ha mankula ma nkobo ya Yaave » 7Nde waleele kuri kaanda ti : « Yookee ludyengekele bvula, na bayongolo bari na binwaanunu baba ha mankula ma nkobo Yaave. » 8Misamu myayirima bunu bwaleeriri Yooswa kuri kaanda. Bangaanga-Nzaambi bo nsaamu baba na mamvumvuri nsaamu ma mampoko ma bimeeme bayooko ku mankula ma nkobo Yaave, na bafula mamvumvuri. Nkobo ya lulelusunu ya Yaave yiri mu kwenama ha mambisa ma bo. 9Bayongolo bari na binwaanunu babakweyende ha mankula ma bangaanga-Nzaambi baba kwefulaa mamvumvuri, na bayongolo bakwekebe babakwenama ha mambisa ma nkobo. Baatu babakweyende na bakwefula mamvumvuri. 10Yooswa waha lutumu lumalu kuri baatu nde wabaleele ti : Beenu lusuku kusa pe, mandaka meenu kupalisa pe, mu minwa myeenu ntoono ti mosi kupalisa pe natee mu kiluumbu ki nyiluleele ti fulee miloolo, haho beenu lufula miloolo. 11Nkobo Yaave yadyengekele mu teteke dya bvula mbala mosi na baatu babvutuka ku kibeendu kya manzo mangooto mu kulutisa butsuku.
12Yooswa wasiimbika mu nkati minkya na bangaanga-Nzaambi baholo nkobo Yaave. 13Bangaanga-Nzaambi bo nsaamu babakwenata mamvumvuri nsaamu ma mampoko ma bimeeme, ha busu bwa nkobo Yaave babweese kweende ku mankula, na bafula mamvumvuri. Bayongolo baba na binwaanunu baba kweyeende ku mankula ma bo, na bayongolo bakwekebe bakwenama ku mambisa ma nkobo Yaave, bo baba kweyeende mu munyiingu mamvumvuri. 14Bo badyengekele bvula kiluumbu kyabyoolo mbala mosi, na babvutuka ku kibeendu kya manzo mangooto. Bo basa bubwo mu lutaangu lwa biluumbu bisaamunu. 15Mu kiluumbu kyansaamu, basiimbika mu minkya-minkya, na badyengekele bvula mbala nsaamu, bunu bwaba musiku. Kiluumbu kinikyo, bo badyengikiri bvula mbala nsaamu. 16Mu mbala yansaamu, bangaanga-Nzaambi bafula mamvumvuri na Yooswa waleele kuri baatu ti : « Fulee miloolo, bukuri Yaave mwa kuluha bvula ! 17Bvula dimadi sa dyakoto kunsa mpopi, dyo na byobinso biri kunsa dyo kuri Yaave Ngo wuni Lahabi ngaa-buyala wusaala wamwooyo na bobanso bari mu nzo nde, bukuri nde wasweekiri bantumu ba twahekiri beetu. 18Ngo beenu se, seenee madyeele, yaa luholo kitotolo ti kimosi mu biri kunsa mpopi ko, mu kubata kuri ti beenu se lubwiilikila mpopi, na kuteele mpasi mu kaanda dya Iselili#6.18 Mbuti wuri Iselili horiri bibyo bibatekesele kuwuungula mu Yaave, lo nde sakisiri nkesi dza Nzaambi mu baatu bobanso (kumono 7.1-26).. 19Mboongo dzodzinso, woolo, bitotolo byansoongo na byakitari, byobinso biba byasakumunu kuri Yaave na byeende mu kisweekulu kyapalata kya Yaave. »
20Baatu bafula miloolo na bangaanga-Nzaambi bafula mamvumvuri. Baatu bayukaana mbeembu mvumvuri, bafula miloolo na kibaka kyabwa. Baatu banwaata hanaho ku bvula, mpisi muutu ha mankula maandi, na bo bakala bvula didyo. 21Bo badzusa bobanso baba kunsa bvula, kuholosono babakala, bakyeetu, bilesi na binuni. Badzusa se bangoombo, bimeeme na bampuunda mu mbeesi ya yayila.
Yooswa wakala kidziingu kya Lahabi
22Yooswa waleele kuri baatu boboolo baba kweetala nkoonsi ya Yeriko ti : « Yendee ku nzo mukyeetu ngaa-buyala na kupalisa mukyeetu wunde na bobanso bari mu nzo yaandi, bunu bu lwalabiri maalu kuri nde. » 23Baatu boboolo, baba kwetala nsi, bayende na bapalisa Lahabi, taayi na nguri yaandi, bampaangi baandi na bobanso baba mu kaanda dyaandi. Babapalisa na bayende kubasuusa ku mbasi kibeendu kya manzo mangooto kya Iselili. 24Bo bayoko bvula na byobinso byaba kukwo, ngo bawungula palata, woolo na bitotolo byansoongo na byabitari bi basuusiri ku kisweekulu kya mboongo kya mu Nzo Yaave. 25Yooswa, wahemese Lahabi, ngaa-buyala, kaanda dyaandi dyodinso na byobinso bikaba na byo. Nde wadzakala ha kakati dya baala ba Iselili natee mu kiluumbu kimaki, bukuri nde wasweekiri bantumu, baheekiri Yooswa mu kwetala nkoonsi ya Yeriko.
26Mu ntaangu yiyo, Yooswa walaba maalu mu Yeriko ti :
« Muutu wuteleme mu kutuunga bvula dya Yeriko dimadi, Kaba waloko ha busu bwa Yaave. Nde sa katuungila lufulu lwa bvula mu lufwa lwa mwaana waandi wamukuutu, na sa kayirikila myeelu mya bvula didyo mu lufwa lwa mwaana waandi wa kilesi#6.26 Kumono 1 Ba 16.34.. »
27Yaave waba na Yooswa, na mvuumfu yaandi yayabakana mu nsi yoyinso.
Alliance Biblique du Congo 2024