Yooswa 5
5
1Bambyaasi bobanso ba ku Amori baba badzakalaana ku simu dya Yorodaani, ku wesete, na bambyaasi bobanso bari Kanaana, babadzakilaana ku mpele mubu, bu bayuka ti Yaave wakanisini maampa ma Yorodaani ha busu bwa baala ba Iselili natee kubawiiri kusabuka, mitima mya bo myatekete na bito bya baholo ha busu bwa baala ba Iselili.
Nyirukulu bubakala bwa baala ba Iselili ku Ngilingali
2Mu ntaangu yiyo, Yaave waleele kuri Yooswa ti : « Yirika mambeesi ma matari, na bweese kuyirika bubakala bwa baala ba Iselili mbala yadzoolo. » 3Yooswa wayirika mambeesi ma matari, na wayirika bari Iselili kuteke mulaandu wa Aralote. 4Yimayi ngo ntoono yibweese kuyirika Yooswa bubakala bwa baala ba Iselili : Makaanda momanso matotokiri ku nsi ya Ngipiti, babakala bobanso baba na mamvula ma kunwaana mudziingu, bafwiiri ku nsi yankatu mu nzila, ha mambisa ma ntotokulu bo ku Ngipiti. 5Baatu bobanso batotokiri baba bayirika bubakala, ngo bobanso babutikiri mu nzila ku nsi yankatu, ha mambisa ma ntotokulu bo ku Ngipiti, baba bahele kubayirika bubakala. 6Baala ba Iselili basiiri mibvu makuumi mana ku nsi yankatu, natee kaanda dyodinso, na bangaa-mudziingu batotikiri ku Ngipiti, babisiri kuyuka mbeembu Yaave bawiiri, Yaave walabiri maalu kuri bo mu kuhele kubasoongo nsi ya taambikiri Yaave kuri bataayi beetu mu kutuha ; nsi yiyo yiri mu kukuumba mabeene ma ngoombo na maasi ma nyosi#5.6 Nsi yaluula mu mabeene ma ngoombo na maasi ma nyosi : Kumono mu Mpa 3.8 na matinu.. 7Watelemese baala ba bo ha kibeendu kya bataayi, na mu bo, Yooswa kayirika bubakala, bukuri basiiri kubayirika bubakala mu nzila ko. 8Bamanaa kuyirika bubakala bwa makaanda momanso, bo badzakala ha kibeendu kya manzo mangooto natee ku batsiinikini. 9Na Yaave waleele kuri Yooswa ti : « Mu kiluumbu ki, me nsasiri nsoni dza ku Ngipiti la na beenu. » Kibeendu kikyo baluka kyo nkuumbu Ngilingali natee mu kiluumbu kimaki#5.9 Me nyaluyusiri mu nsoni dza ku Ngipiti : Mpe nsoni dziri baba bahele kubuka bubakala. Ngilingali : Kumono 4.19 na matinu ; mu Kihebereho nkuumbu yiyo mambangukulu ti kuyisila..
Paaka dyatete ku Kanaana
10Baala ba Iselili bayirika kibeendu kya manzo mangooto ku Ngilingali na basa munkeembu wa Paaka mu kiluumbu kyakuumi na bina mu ngoondo#5.10 kiluumbu kyakuumi na bina kya ngoondo : Kumono 4.19 na matinu ; kikyo kiluumbu ki bakoosaanaa munkeembu wa Paaka, kumono Mpa 12.6., mu nsinsika ku kibiti kya Yeriko. 11Mu kini kiluumbu kikyo, ha mambisa ma Paaka, baala ba Iselili badya byandya bya nsi yiyo, mampa mahele lufunusu na mankono makaanga. 12Maana yawa, ha mambisa ma kiluumbu kibadiiri byandya bya nsi#5.12 Maana : Kumono Mpa 16.13-35. Kanaana : Nkuumbu yaba ya nsi yi batambikiri baala ba Iselili kuri Nzaambi tekesele batubuka. yiyo. Maana bu yaba yeki yo pe, baala ba Iselili badya bimbutu bya nsi ya Kanaana mu mubvu wunde.
Mfumu mukaangu wa Yaave
13Yooswa bu kaba ku Yeriko, waseengele miisu myaandi na wamono muutu mosi waba wateleme ha mankula ma nde na mbeesi yayila ha kooko yahele mu lukutu. Yooswa wayende ku mpele nde na wamuleele ti : « Buri ye wuri wa beetu, ho ti wa bataatu ba beetu ? » - 14Nde wabvutula ti : « Pele, me mfumu mukaangu Yaave, hamaha ngo ha nyiisiri. » Yooswa wabwa ha nsi, wayilimisa busu ha nsi, watsukuma na waleele kuri nde ti : « Nkya dyaambu, mfumu yaami kaleeriri kuri kisari kyaandi ? » 15Mfumu mukaangu Yaave waleele kuri Yooswa ti : « Yusula masapaatu mu miilu myaaku, bukuri kibeendu kiwuri ye kyangisi#5.15 Kuyusula bikoori byaandi kiri kidiimbu kya kibvumi bwa bungisi bwa kibeendu, kumono Mpa 3.5.. » Yooswa wayirika bubwo.
Alliance Biblique du Congo 2024