Yooswa 4
4
Matari kuumi na moolo ma mbambukulu mwooyo
1Makaanda momanso bu mawa kusabuka Yorodaani, Yaave wadzoonso kuri Yooswa, wamuleele ti : 2« Soolee ha kakati dya makaanda baatu kuumi na boolo, muutu mosi mu mpisi kaanda, 3tumee kuri baatu babo na baleele ti : Holeenu ha kibeendu kikyo kyabee bitaambi bya bangaanga-Nzaambi, ha kakati dya Yorodaani, matari kuumi na moolo, na sabukee na mo na yeende lu masuusa ha kibeendu kikyo ki lulutisa butsuku. » 4Yooswa wateele baatu bo kuumi na boolo, babasooriri mu baala ba Iselili, muutu mosi mu mpisi kaanda 5Yooswa waleele kuri bo ti : « Lutee ha mankula ma nkobo ya Yaave Nzaambi yeenu, natee ha kakati dya Yorodaani, mpisi nde kanaanguna tari dyaandi ha yulu heembu bunu buri lutaangu lwa makaanda ma Iselili. 6Matari mamo, maba kidiimbu ha kakati dya beenu ; ha kipari, baala ba beenu sa balufuula ti : Nkya mambangukulu mari mu kidiimbu kya matari ma ? » 7Beenu sa lwababvutula ti : « Bukuri maampa ma Yorodaani matabikiri ha mankula ma nkobo ya lulelusunu ya Yaave Ntaangu yi ya sabukiri Yorodaani, maampa ma Yorodaani matabukiri, matari mamama sa maba kidiimbu kya mbambukulu mwooyo mu baala ba Iselili kwakinkulu. »
8Baala ba Iselili bayirika mamo ma batumini Yooswa. Baholo matari kuumi na moolo ha kakati dya Yorodaani bunu bwadzoonsiri Yaave mu munwa Yooswa, bunu bwaba lutaangu lwa makaanda ma baala ba Iselili. Bamanata na basuusa mo ha kibeendu kikyo kya manzo yangooto. 9Yooswa watelemese matari kuumi na moolo ha kakati dya Yorodaani ha kibeendu kikyo kyaba bitaambi bya bangaanga-Nzaambi babakwenata nkobo ya lulelusunu, na mo makiri natee mu kiluumbu kimaki.
10Bangaanga-Nzaambi babakwenata nkobo bateleme ha kakati dya Yorodaani, natee kwawiiri kuyirima myominso myatumini Yaave kuri Yooswa mu kuleele kuri makaanda ma Iselili, na myominso myatumini Moose kuri Yooswa. Makaanda ma Iselili masa mawasu na basabuka Yorodaani. 11Makaanda momanso bu bamana kusabuka, nkobo Yaave yaluta, na bangaanga-Nzaambi baba ha mankula ma kaanda. 12Baala ba Lubeni, ba Ngadi na ndaambu kaanda dya Manase baluta kuri batakama mu mudziingu ha mankula ma baala ba Iselili, bunu bwa baleeriri#4.12 Kumono 1.12-15. Moose. 13Lutaangu lwa baatu baba na binwaanunu lwaba 40 000 baluta ha mankula ma Yaave, kuri bayirima mu mudziingu, ku kibiti kya Yeriko. 14Kiluumbu kikyo Yaave, wadzaangasa Yooswa ha miisu mya Iselili dyodinso, na bo babata Yooswa bunu bu baba kwebataa Moose mu biluumbu byobinso bya kidziingu kyaandi.
15Yaave waleele kuri Yooswa ti : 16« Tuma kuri bangaanga-Nzaambi bari mu kwenata nkobo ya kimbaangi kya kutoomboko mu Yorodaani. » 17Yooswa watuma bangaanga-Nzaambi mu kutoomboko ku simu dya Yorodaani ! 18Bangaanga-Nzaambi babakwenata nkobo ya lulelusunu ya Yaave bu babeke mu kutoomboko ha kakati dya Yorodaani, bitaambi bya bo bu byabelemene butoto bwakana, maampa ma Yorodaani mabvutuka ha kibeendu kyaandi na mabeke mu kukuumba bunu bwaba bwa ntama mu masimu momanso. 19Makaanda ma Iselili ma sabuka Yorodaani kiluumbu kyakuumi mu ngoondo yatete, na bo basa kibeendu kya manzo mangooto ha Ngilingali, ku mulaandu wa Yeriko#4.19 Kiluumbu kyakuumi kya ngoondo yatete ngo kiluumbu kibakooyirikaa munkeembu wa Paaka, kumono mu Mpa 12.3 ; ngoondo yatete ngo ngoondo ya ndoolo. Ngilingali bahele kuyirika kuyaaba ha diri, mpe diri bebele na Yorodaani ku noode-esete dya Yeriko. Kumono 1.12-15..
20Matari mo kuumi na moolo mamo mabahoriri ha kakati dya Yorodaani, Yooswa watelemese mo ku Ngilingali. 21Nde waleele kuri baala ba Iselili ti : « Baala beenu mbasi tsuku sa bafuula kuri bataayi baaku ti : Nkya mambangukulu matari mamama mari mu kusoongo ? » 22Haho, beenu sa lwayaabisa kuri baala beenu ti : « Iselili dya sabukiri Yorodaani mu miilu. 23Bukuri Yaave Nzaambi yeenu wakanisini maampa ma Yorodaani ha mankula ma bo, natee ku bameeni kutaba, bunu bwasiiri Yaave Nzaambi yeenu ku mubu wa Madyaari#4.23 Kumono Mpa 14.21., wu ka kanisini ha mankula ma beetu natee ku twasabukiri, 24mpisi heki, makaanda momanso ma ha butoto mayaaba ti, kooko kwa Yaave kuri na makwa, na beenu luba na boomo bwa Yaave, Nzaambi yeenu, kwakinkulu. »
Alliance Biblique du Congo 2024