Ose 8
8
Wukunaa kiteembu sa katolo kiteembu kibvuriri makwa
1Fulee mvumvuri,
mpasi dziisiri bunu beembe
ku yulu nzo Yaave,
« bukuri basininyee lulelusunu lwaami,
na batungukiryee mangisi maami.
2Bo sa bafula misaakulu kuri me :
Nzaambi yeetu, beetu tukuyaari,
beetu Iselili.
3Iselili loosirye mamabwe,
mutaatu sa kamulaanda.
4Bo basooriryee bambyaasi
kwahele ntumunu dza me ;
basooriryee bamfumu kuri bampele kunyaabisa.
Bo bayirikiryee biteki mu palata dyaaku na woolo dyaaku, nzila yaaku badziimbisa.
5Samariya,
baloosiryee mwaana ngoombo waaku,
nkesi dza me dzibwiirye ha yulu bo.
Natee nkya ntaangu bo babangisina
kuba kwahele dyaambu ?
6Bukuri kyo kyafumuna ku Iselili, kyayirima mu myooko mya muutu,
kyahele kuba nzaambi.
Mwaana ngoombo wa Samariya,
sa basa yo bikuuku-bikuuku.
7Bukuri bo bakuninyee kiteembu,
bo sa batolo kiteembu kibvuriri makwa.
“Kuri muti saangu ti mosi wumene ko”, ti hayuku menini, Kuba fufu ko.
Ti hayuku menini, banzeense badidya. »
8Iselili bamumina.
Mu lu, bo beki ha kakati dya makaanda,
bunu kitotolo kyabuunu.
9Bukuri bo batoombokiri ku Asiri.
Mpuunda ya musitu
yiri mu bunsaana.
Efarayimi wuri mu kweefuta
ntalu yantiilu.
10Ti hayuku bafutiri ntalu ha kakati dya makaanda,
Mu lu me sa nyabakutukisa,
mwa kidzika, bo sa batekete mu
kilemu kya mbyaasi ya bamfumu#8.10 Mbyaasi ya bamfumu : Nteelulu yakaka ya mbyaasi ya Asiri..
11Efarayimi funusinyee madziku
mu kutobolo masumu.
Madziku mamo meki mpwaanyi, kuri bo
mu kutobolo masumu.
12Me sa nyatina mu ntoono nde, nyikusulu yaami yalaka,
na bo sa bahololo yo bunu kitotolo kyanzeense.
13Bari mu kuyokolo me bikabu,
na bari mu kwedya miswinyi.
Yaave wahele kubitaambula.
Mu lu nde baambukiri mwooyo
mu lumvuki lwa bo,
me nyiri mu kutambikisa masumu maaku.
Bo sa babvutuka ku Ngipiti.
14« Iselili wadzimbikina wunde wamuyirika.
Nde tuungirye manzo ma bamfumu.
Yuuda funisinee mabvula mamakwa.
Ngo me sa nyaheeke mbaawu ku mabvula ma bo,
yo sa yayoko manzo ma bo. »
Alliance Biblique du Congo 2024