Ose 5
5
Bayikisi bababi
1Beenu bisari bya mu Nzo-Nzaambi, ywiilee dimadi.
Nzo ya Iselili, seenee madyeele.
Nzo ya mbyaasi, tekeenu makutu.
Mutsuundu wa beenu wuri,
bukuri beenu lwabeeri mweete kuri Misipa,
na siinga dyataamba ha yulu Tabore
2Bahakiri bulu dyasa na mansaalisa,
na me nyiri nyikusulu mu bobanso.
3« Me nyaari Efarayimi,
na Iselili wahele kusweeme kuri me.
Mu lu, Efarayimi, ye wasiiri buyala#5.3 Kitsuumbu kya Efarayimi kitsiitsa kusa nsobokoso hamaha na nkoonsi ya Iselili buyala : Kumono 1.2 ; 2.4 na matina. ;
Iselili ye wabviimfukiri. »
4Biyiriki bya bo,
bi baha miswa ko
mu kubvutuka kuri Nzaambi yaaku.
Bukuri bari na mpeeve ya kimpala munsa bo.
Bo bahele kuyaaba Yaave.
5Masiiku ma Iselili mata kimbaangi
ha busu bwa nde.
Iselili na Efarayimi sa babwa
mu ntoono lumvuki lwa bo.
Yuuda se sa kabwa kintwaari na bo.
6Na bibulu byaaku byantele na byabinene,
sa beende mu kwesaka Yaave,
ngo bamudzukula ko,
bukuri nde wasasikiri la na bo.
7Bo bawunini Yaave,
bukuri babutiri baala na bamakaangu.
Mu lumalu, ngoondo yamoono
sa yafuukisa bo na busina bwa bo.
Mudziingu ha kakati dya Efarayimi na Yuuda
8Sikeenu mvumvuri ku Ngibeha,
munsyasi ku Lama,
fulee manguubi ku Bete-Abvene,
ku lumbisa lwa ye, Benyami.
9Efarayimi#5.9 Efarayimi : Kumono 4.17 na matina. sa kaba mu bunsaani,
mu kiluumbu kya nseembulu.
Me nyiri mu kuyaabisa kuri
makaanda ma Iselili,
Ntoono mosi yangwanwa.
10Bamfumu ba Yuuda
bari bunu babo bakwesasila mandilu.
Me sa nsaamuna nkesi dzaami
ha yulu bo bunu maampa.
11« Efarayimi wakwaamusu,
wakosonu mu mutsuundu.
Bukuri nde watiiri kweende
ha mambisa ma ntumunu.
12Me nyiri bunu nsyelisi kuri Efarayimi,
bunu mbolulu kuri nzo ya Yuuda.
13Efarayimi wamono bubeeru bwaandi,
na Yuuda munuungu waandi.
Efarayimi wayensi ku Asiri,
na waheekiri Yarebi
kuri mbyaasi#5.13 Kumono 2 Ba 15.29-30 ; 17.3..
Ngo nde kari nsinikisa beenu ko,
na kari nsinikina mu munuungu waandi kuri beenu ko.
14Bukuri me sa nyaba bunu nkosi mu ntoono Efarayimi,
bunu nkosi ya kituuti mu nzo ya Yuuda.
Me sa nyakaakila, sa nyeende na sa nyanata,
kuri muutu ti mosi ko wubakuula. »
Nzaambi tatikiri
15« Me sa nyeende, sa nyabvutuka ku kibeendu kyaami,
natee ku bataamburi mamabi maaku,
na kubweese kusaka busu bwaami.
Kunsa mpasi dzaaku, bo sa basyeeteke kuri me. »
Alliance Biblique du Congo 2024