Ose 4
4
Nzaambi wutsuundisa baatu baandi
1Yukeenu, Maampu ma Yaave,
beenu baala ba Iselili,
bukuri Yaave wuri mu muyalu na baatu ba nsi,
bukuri
« Ngwanwa yo pe, mutima wamutsiina nde pe,
na nyaabulu Nzaambi yo pe mu nsi.
2Meki mani mampopi, kuwuna,
kudzusa, kuyiba na kuta kimpala.
Bakwetekele baatu myeete,
mu kutsaamuna makila,
ha yulu makila.
3Mu didyo, nsi sa yakoto mu bufwiiri,
na baatu bobanso bari mu nsi,
sa bafwa kintwaari na bibulu bya bibiti, na banoni ba mayulu.
Bambisi bari mu mubu, sa bafwa. »
Bisari bya mu Nzo-Nzaambi bari na ntoono
4« Ngo muutu yaa kafuunda ko,
yaa kaŋaŋina ko, bukuri kaanda dyaaku
bari bunu bafuunda bangaanga-Nzaambi.
5Ye sa bwa mu nkati mwiini,
mubikiri wuri ku nzo sa kabwa, mu butsuku.
Me sa mfuukisa nguri ye.
6Kaanda dyaami difuukiri
bukuri dyahele na nyaabulu.
Bukuri ye waloosiri nyaabulu,
me se sa nyakulooso, mu kisalu kyaami.
Bukuri ye wadzimikini Mangisi ma Nzaambi yaaku#4.6 Bangaanga-Nzaambi baba se na kisalu kya kukebe na kutubula nyikusulu bunu pele mangisi ma Nzaambi kumono Ngi 33.10 ;
me se sa nyadzimikina baala baaku. »
7Bunu bu babvuri kufunina, bunu bu babvuri kutobolo masumu kuri me.
Me sa nyayiingisa nkeembu yaaku
mu nsoni.
8Bo bakwedya bikabu bitwaala kaanda dyaami dyasumuka,
bakwe basinda mu kutobolo masumu#4.8 Kumono Bal 6.19-22..
9Kaanda dyaami sa dyaba, bunu bisari bya mu Nzo-Nzaambi ;
sa nyabafuula bunu buri manzila maaku.
Sa nyabafutisa
bunu buri biyiriki byaaku.
10Bo sa badya,
ngo bayukuta ko ;
sa basa kimpala#4.10 Kusa buyala : Kumono 1.2 na matina buyala : Mu maampu ma mu Kihebereho dyaambu didyo diri mu kit.11.,
ngo ka bafunina ko.
Bukuri bahotiri
mu kukebe mya Yaave.
11« Buyala na malu mamoono,
byakariri mutima.
12Kaanda dyaami diri mu kufuula,
kuri muti waandi,
kitsuri kyaandi kya muti,
kiri mu kumuyaabisa#4.12 Kitsuri kya muti : Mubikiri wuri mu kusa bitsimi mu kuunsi dyahaandisa (kumono Blm 6.25 na matina) bunu pele mwa bitsuri bya miti bi babasalilaa mu kuyaabisa buba muutu mu kidziingu kyaandi.,
bukuri mpeeve ya buyala yabadziimbisiri.
Bo basiiri buyala,
basasikiri la na Nzaambi yaaku.
13Bo bari mu kuyoko bikabu
mu yulu manto ma milaandu.
Na mu mankoto, bakweyoko mananaasi.
Ku nsuku mifuma, mikoondo na mifofo, mamposi maaku mamabwe !
Baala beenu babakyeetu bakweta kimpala,
na bako beenu babakyeetu bakweta kimpala.
14Me nyitsuundisa baala beenu babakyeetu ko,
mu kimpala kyaaku,
bwobumosi kuri bako ba beenu
babakyeetu bateeri kimpala
mu kimpala kibasiiri.
Bukuri bayensi ku lumperi na bakyeetu babiyala.
Kintwaari na bangaa-buyala bwangisi bayokiri bikabu.
“Kaanda dyahele kusa nsobokoso sa dyafwa.” »
15« Mbuti ye Iselili wuri mu kusa buyala,
lo Yuuda yaa kamonoko ngaa-bubi ko,
na yaa lwiisa ku Ngilingali ko,
na yaa lutoomboko ku Bete-Abvene ko,
na yaa lulaba maalu ko :
“Mu Yaave wuri wamwooyo#4.15 Ngilingali, Beteli-lubila : Kumono Amo 5.5 na matina mu Amo 3.14 na 4.4. Kumpotulu kitsuri kya maampu kumono Amo 8.14. !” »
16Iselili siiree tungu bunu ngoombo yamukasi, yiri na tungu. Mu lu Yaave sa kabadiisila bunu mwaana kimeeme kunsa bibiti. 17Efarayimi#4.17 Efarayimi nkuumbu ya kitsuumbu kyakinene kya Iselili dya ku noode, hamaha diyaabisa nkoonsi yoyinso ya Iselili. wakaangama mu biteki na mikisi. Muhemesee ! 18Bu bameeni nwiinu malu yamakwa, bakotiri mu kusa buyala. Bo batiiri nsoni na mpelulu lukiinsu. 19Kimbwongolo kibafuka mu mapaapu maandi. Bo sa bafwa nsoni mu bikabu byaaku bya kuyoko.
Alliance Biblique du Congo 2024