GAL 3
3
विश्वासता समर्थन — 3:1—4:31
1हे निर्बुद्धी गलतीलोन मंदीलाला, क्रुस मिंदा खिळाशीने येशु ख्रिस्तद स्पष्ट वर्णन मी मुंदार उंडीनाप्पुड, यवार मिमलान भुलाय मतीर? 2नाक मी तीकेल इंते तेल्ची तिस्कुनेद उंडाद की, मिक याद पवित्र आत्मा शिक्कीनाद आदी नियमशास्त्रलोन फनुलाता शिक्कीनाद, का सुवार्ता इनी विश्वास फेटने इचांग शिक्कीनाद? 3मीर इंता निर्बुद्धी उंडार येम? मीर परमेश्वर आत्माता सुरुवात शेशी इप्पुड देहस्वभावता पुर्ण शेशेदेंक सुस्तुनार येम? 4मीर इन्नोट दुखलु उत्तेंगाने सहन शेस्तीर येम? दिन व्यर्थ आनाला येम! 5परमेश्वर यवाड मिक स्वताद आत्मा इस्ताड इंगा मी दिंटल्या सामर्थी फनुल शेस्ताड, वाड इदी आंता मीर नियमशास्त्रद पालन शेस्तार आंका शेस्ताड, का मीर सुवार्ता इनी दान मिंदा विश्वास फेटतीर आंका शेस्ताड?
6इदी आल्ले आय्या यल्ला की पवित्र शास्त्रला राशीनेद उंडाद, अब्राहाम परमेश्वर मिंदा विश्वास फेट्या इंगा परमेश्वर वान नितीमान ठरायमत्या. 7दिन मिंदकेल मीर तेल्ची तिस्कोंडा की, यवार विश्वास फेटतार वारे अब्राहाम बिळ्ळु उंडार. 8पवित्र शास्त्रला इदी पहिलाने राशीनेद उंडाद की, परमेश्वर यहुदी लेने मंदीन विश्वासता नितीमान ठरायमती, इंगा इ माटलाता परमेश्वर अब्राहामकी पहिलाने शुभवर्तमान शप्पीन्या की, “नी तीकेल आन्नी राष्ट्रलाक आशिर्वाद शिक्की.” 9दिनिचांग या मंदी विश्वास फेटतार वारकी परमेश्वर विश्वासी अब्राहाम जताक आशिर्वाद इच्चीनाड.
10येनटीक की नियमशास्त्रलोन फनुला मिंदा यंता मंदी विश्वास फेटतार आंता मंदी श्राप अधिन उंडार येनटीक की पवित्र शास्त्रला इल्ला राशीनेद उंडाद की, “नियमशास्त्र पुस्तकला राशीनेद प्रत्येक माटा यवाड पाळाशी शकायाड वाड शापित उंडाड.” 11नियमशास्त्रता यवारुच परमेश्वर मुंदार नितीमान ठरायार, इदी स्पष्ट उंडाद; येनटीक की पवित्र शास्त्रला इल्ला राशीनेद उंडाद की, “नितीमान मनशी विश्वासता जगाशी.” 12इंगा नियमशास्त्रद संबंध विश्वास जताक लेद, पण उलटा “यवाड दान पाळाशी वाड दानता जगाशी.” 13मना इचांग ख्रिस्त श्रापित आय्या इंगा मनालनी नियमशास्त्र श्रापकेल मुक्त शेशा; पवित्र शास्त्रला इल्ला राशीनेद उंडाद की, “यवाड पण क्रुस मिंदा खिळाशीनोड उंडाड, वाड श्रापित उंडाड.” 14दिनदी उद्देश इल्ला उंडाद की, अब्राहामकी इच्चीनेद आशिर्वाद ख्रिस्त येशुन तीकेल यहुदी लेनोर मंदीक शिक्काला, इंगा मनाक विश्वासता आदी आत्मा शिक्काला या दिनदी अभिवचन इच्चेदेंक वच्चीन्या.
15हे आक्का तम्मुळ्ळालाला, निन इदी मिक उदाहरण इस्तुनान की, मनशीद करार पण पक्का आयनेंका यवारुच दान रद्द शेशी शकायार इंगा दांटल्या येमीच जोडशी पण शकायार. 16इप्पुड याद अभिवचन अब्राहामकी इंगा वान वंशजकी परमेश्वर इच्चीन्या. वाड “वंशजलाक” इल्ला शेंगेम मंदी बद्दल आनाड, पण “नी वंशजकी” इल्ला वगान बद्दल आंटाड इंगा वाड वगाड ख्रिस्त उंडाड. 17इंगा निन इदी आंटान की, परमेश्वर आदी करार पहिलाने पक्का शेशीनेंका चारशेतीस यंडला नंतर वच्चीनेद नियमशास्त्र अभिवचननी रद्द शेशी शकायाद. 18येनटीक की वतन जर नियमशास्त्र तीकेल शिक्कीनाद, तर अभिवचन जताक दानदी येमीच संबंध लेद; पण परमेश्वर अब्राहामकी आदी वतन कृपाता अभिवचनताने इच्या.
नियमशास्त्रद उद्देश
19मंग इदी नियमशास्त्र येनटीक इच्चेदेंक वच्या? येनटीक की, या वंशजकी अभिवचन इच्चीन्या वाड वच्ची नंताक अपराधलाद जाणीव कावाबेक आंका नियमशास्त्र इच्चेदेंक वच्या; इंगा परमेश्वर स्वर्गदुत शेयता मध्यस्थ रुपला उंडीने मोशेन शेतल्या नियमशास्त्र इच्चेदेंक वच्या. 20सुडना, मध्यस्थ इद्दार नडमा उंटाड; पण परमेश्वर वक्काडे उंडाड.
21तर नियमशास्त्र इदी परमेश्वर वचन विरुद्ध उंडाद येम? अजिबात लेद, येनटीक की जीवन इच्चेदेंक समर्थ उंडीने नियमशास्त्र इच्चेदेंक वच्चीन्टे तर, नितीमत्व खरेमे नियमशास्त्रता शिकतुन्या. 22पण नियमशास्त्र आंदारनी पापला कोंडाशी फेट्या, इ उद्देश इचांग की, विश्वास फेटेतोरकी येशु ख्रिस्तला याद अभिवचन उंडाद आदी इच्चेदेंक दावाला.
23पण ख्रिस्तला विश्वास दावा काना मुंची, मनाम नियमशास्त्र अधिन उंटीम इंगा वच्चेद विश्वास प्रगट आय्यी नंताक दान बंधनलाने उंटीम. 24दिनिचांग मनाम विश्वासता नितीमान ठरायाला आंका नियमशास्त्र मनालनी ख्रिस्तन तीकुड पोहचाय मतेदेंक मना संरक्षक बनाशा. 25पण इप्पुड विश्वास वच्चीनाद, दिनिचांग मनाम दिन मुंदारकी संरक्षक अधिन लेम.
26येनटीक की मीर आंदार ख्रिस्त येशुन मिंदा विश्वास फेटने इचांग परमेश्वर बिळ्ळु उंडार. 27येनटीक की ख्रिस्तला मी दिंटल्योन्केल यंता मंदीद बाप्तीस्मा आयनाद आंता मंदी ख्रिस्तन फेटकुन्नार#3:27 ख्रिस्तन फेटकुन्नार दिनदी अर्थ बट्टाल लेका फयला फेटकुन्नार . 28यहुदी लेकाते ग्रीक, दास लेकाते स्वतंत्र लेद, मनशी लेकाते आंडीद इल्ला भेदभावे लेद येनटीक की ख्रिस्त येशुला मीर आंदार वगाट उंडार. 29इंगा मीर जर ख्रिस्तन उंडार; तर अब्राहाम बिळ्ळु इंगा अभिवचन लेका वारीस पण उंडार.
Valgt i Øjeblikket:
GAL 3: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind