GAL 4
4
1इप्पुड निन आंटान की, याड नंताक वारीस शिन्ना बिडा उंडाड, आड नंताक वाड आंदार मालकुड उंडी पण वान दिंटल्या इंगा दासला येमीच फरक लेकुंटाद. 2पण आब्बाड ठरायमतीने वेळ नंताक वाड शिक्षक इंगा कारभारी अधिन उंटाड. 3आल्ले मनाम पण शिन्ना बिळ्ळु उंटीम, मनाम दुन्यामलोन प्राथमिक शिक्षनला दास उंटीम. 4पण यप्पुड वेळ पुर्ण आय्या आप्पुड परमेश्वर वान कोडकुन आंप्या; वाड आंडीदान तीकेल जन्म तिस्कुन्या इंगा नियमशास्त्र अधिन जन्म तिस्कुन्या, 5दिंटल्या उद्देश इल्ला उंड्या की, नियमशास्त्र अधिन उंडीनोरनी वाड मुक्त शेयाला; आंटे मनाक परमेश्वर बिळ्ळु आय्येद अधिकार शिक्काला. 6इंगा येनटीक की मीर बिळ्ळु उंडार आंका, परमेश्वर वान कोडकु आत्मान याद हे अब्बा हे यब्बा इल्ला आनीगास परमेश्वरनी फिलस्ताद, दान मी अंतकरणलोंग आंपीनाड; 7दिनिचांग मीर इप्पुड केल दास लेर तर बिळ्ळु उंडार; इंगा बिळ्ळु उंडार, तर परमेश्वर तीकेल वारीस पण उंडार.
8मीर येशुन मिंदा विश्वास फेटा काना मुंची, यवार खरेम परमेश्वर लेड वार दास उंटीर; 9पण इप्पुड मीर परमेश्वरनी गुरतु फटतार इंगा परमेश्वर मिमलान गुरतु फटताड, तर मीर वापस आ कमजोर इंगा व्यर्थ माटला तीकुड येनटीक वापस फोतार? इंगा आटला दास आय्येद येनटीक इच्छा फेटतार? 10मीर दिनमुल, महिनाल, ऋतुल इंगा यंडलु पाळास्तार. 11मी इचांग शेशीनेय नाय आन्नी कष्टल कदाचित वाया फोयन्याला इल्ला नाक यरपु उंडाद.
12हे आक्का तम्मुळ्ळालाला, निन मिक विनंती शेस्तान की, मीर ना लेका कांडा, येनटीक की निन पण मी लेका उंटीन. मीर नाद येमीच वाईट शेयालेद. 13मिक शुभवर्तमान शप्पेद पहिला संधी नाक ना शारीरिक कमजोरी इचांग शिक्या इदी मिक यरका उंडाद. 14इंगा ना शारीरिक कमजोरीला मिद परीक्षा आय्येताप्पुड, मीर नन्नु तुच्छ समजायालेद, पण नाद परमेश्वर दुतलेका, इंगा ख्रिस्त येशुनलेका स्वीकार शेस्तीर. 15तर आप्पुडदी मिद आदी आशिर्वाद यंदु उंडाद? येनटीक की, निन मी बद्दल साक्ष इस्तान की, शक्य उंटे तर मीर नाक मी कंडलु तिशी इस्तुंटीर. 16इंगा निन मिक खरेम शपतान आंका निन मी शत्रु आयतीन येम? 17वार खोटा शिक्षकलु मी बद्दल आवेशी उंडार, पण शिंगार उद्देशता लेर, तर मीर पण वार बद्दल आवेशी कावाला आंका वार मिमलान मा देगाटेल धुराम शेशेदेंक सुस्तुनार. 18नेहमी शिंगार उद्देश इचांग आवेशी उंडेद शिंगार उंडाद, फक्त आप्पुडे लेद यप्पुड निन मी जताक उंटान. 19हे ना बिळ्ळालाला, मी लोना ख्रिस्तद रूप निर्माण आय्यी नंताक, निन मी इचांग वापस बिडाक जन्म इच्चेद त्रास सहन शेस्तुनान. 20इ वेळला निन मी जताक उंटे इंगा नाक स्वर बदलाशी माटलाडा वच्चीन्टे, तर नाक बागा वाटास्तुन्या, येनटीक की निन मी बद्दल चिंताला उंडान.
रोंड करारलु
21मीर या नियमशास्त्र अधिन आयेदेंक सुस्तुनार, नाक शपना, मीर नियमशास्त्रद इनार येम? 22येनटीक की पवित्र शास्त्रला इल्ला राशीनेद उंडाद की, अब्राहामकी इद्दार कोडकुल उंडीर: वगाड दासीदान कोडकु इंगा वगाड स्वतंत्र आंडीदान तीकेल आयन्या. 23पण यवाड दासीदान तीकेल आयन्या वाड देहस्वभाव लेका फुट्टीन्या; यवाड स्वतंत्र आंडीदान तीकेल आयन्या, वाड परमेश्वर अभिवचनता फुट्टीन्या. 24इ माटलु दृष्टांत लेका उंडाय. इर आंड्योर रोंड करारला लेका उंडार, वगाट सिनाय पर्वत मिंदा शेशीनेद इंगा दास बिळ्ळाक जन्म इच्चेद करार आंटे हागार उंडाद. 25हागारदी अरबस्तानलोन सिनाय पर्वत उंडाद, याद वर्तमान यरुशलेमदी प्रतिक उंडाद. येनटीक की आदी दान बिळ्ळा जताक दासत्वला उंडाद. 26पण स्वर्गीय यरुशलेम स्वतंत्र उंडाद; याद मना आम्मा उंडाद. 27पवित्र शास्त्राला इल्ला राशीनेद उंडाद की,
“हे गोड्डुदाना, निक यवारकी बिळ्ळु कार,
नु आनंद शेय;
निक यवारकी बिडाक जन्म इच्चेद त्रास काद,
नु आनंदता जयजयकार शेय! आनंदता कीरलु!
येनटीक की यादानकी मोगुड उंडाड दान बिळ्ळा काना,
आशा इडशीने आंडीदान बिळ्ळु शेंगेम उंडार.”
28इप्पुड हे आक्का तम्मुळ्ळालाला, इसहाक लेका मीर अभिवचन बिळ्ळु उंडार. 29पण आप्पुड देहस्वभाव लेका यवाड फुट्या, वाड यल्ला आत्माता फुट्टीनोनकी त्रास इच्या, आल्ले इप्पुड पण आयताद. 30पण पवित्र शास्त्र येम आंटाद? “नु आ दासीदान इंगा दान कोडकुन गेदमेसकाड, येनटीक की दासी, दान कोडकु स्वतंत्र आंडीदान कोडकु जताक वारीस काके फोई.” 31तर मंग हे आक्का तम्मुळ्ळालाला, मनाम दासीदान बिळ्ळु लेम, पण स्वतंत्र आंडीदान बिळ्ळु उंडाम.
Valgt i Øjeblikket:
GAL 4: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind