Filipenses 3
3
Njaa njaji yumacapetja apaana inaitaca caiji nacayushu njaji judionai
1Numatsakja nucaiteca ljiaji, nukitsiñape, icatimatakenau Waminalrinacu, currim lrima nucauca nudanaca irsu ljiaminitsa yacutica, njite canacaidalricautsa irsuni. 2Icapa yuyau njarra inaiki njenitampen nauyau, njaji mashiperritsa idejica, nauya tsakja njaji iyuacape lrinacupe ljiaji nadaki. 3Ima faaca ljiaji ajadalriperri Dios inaikiteca#3:3 Lricaiteshupa: Icatsa faa ajadalripe nayuaca idaki inakjuite, yalranairrikjuite (circunsición), faadekja ya matsiadalri Dios irsu lri-Espíritun shu, wajiacacau catimaperriquena faa lrinacu ljiaji Cristo Jesús, ima currrin wacadaca wacaolreo nanacu njaji achianai itaitajitsa inaitjaca. 4Mitsa njua nutaitantja nucadaca nucaolreu nanacu njaji inaitjaji jidashu. Apada icaitecada lrinaitjaca matsiapja nanacu nuya, njua nunaitapjatua matsia lriuyana: 5Nayuapiatsakja nakjenanatacarru njua ocho jalredauca nacu jicucayami njua, irsraelnai inakjuitedalrica njua, aadalrica njuaji Benjamín inakjuite, hebreoca njua mashanadalri, hebreonai yenipeca njua; lrinacuapana ljiaji pjepacaca yacuti upidalrin, fariseo nai inakjuitjedalripia njua; 6njua nupeyupia nunakja nanaitaca cayu lricaitecapishu ljiaji wanacuapanna faa judionai, nini nupinietapiaca njaji shepacaperri Jesús nacu; njite lrinacu ljiaji panaitjaca machia, lrinaalri panaitjaca ljiaji yacuti upidalrin, currinpia numatadaca apada lrinacuite. 7Mitsa pjiumi ljiaji nunaitanda, cacuadadalripia nursun, panaya, Cristo ikjaute, macuadadalri quetsani. 8Njite pjatsakja pjiumi lriuya, curritsa cacuadaca nursu pjuimi njaca nunaitjampepia, cayuntjaji lriajike macadalritsu ljiaji Cristo Jesús, Numinalri. Lricautje ljiaji Cristo númacani pjiumi, njite pjiumi njaji nucadacana nupecumpena, nutaitacarru nuquetaca nursuwawa ljiaji Cristo, 9njite apadacarruetsa njua lriapiya; currin nunaitjacapuaca matsia lrinakjuite ljiaji yacuti upidalrin, lrikjautedekja ljiaji wacadacapua wacaolreo Cristo-nacu, ljiaji Dios icadalri warsu lrinakjuite ljiaji feepalri. 10Njite nuajiicarru matsia Cristo-nacu, nuajiicarru cuanca ljiaji jiidati macadalri jirretalripiani mayamperrin yuya; njite pacuvacacaruatsa njurrapitaca njaji ljirrapitalripia atee mayamicani. 11Nuwapautsa lriucau ljiaji ljiadaa Cristo jirretacaolre njaji mayamperrin shepacaperri.
Currintua waukjencao atee waumalri waucaca nirse
12Curritsa nucaiteshupaca nuquetakenantja pjumini, curritsakja matsiadalricapuacantja njua; mitsa nuacatsa nupeyaljeu nuajicapjuawatsa nuquetacan, lrikjaute ljiaji, Cristo-piatsa iniwana njua lrinita. 13Nukitsiñape, currin nucaiteshupaca upikenantja nuketani; ljiadekja nunaita ljiaji curricarruetsa nuwaupia ljiaji nunaitjandapia njite nukjaidatacapjawa nuketacarruatsa ljiaji nursulriutsa nupeyalre, 14nucacarruatsau aateji nucalri nirse njite nupacarruatsa lricuadau enulricuitedalri, ljiaji Dios iwanalri yaa warsu Jesucristo nakjuite.
15Pjuimi faa itarrawatacapena matsia lrinacu ljiaji feepalri, warsutsa wawaupiaca cayu, ninicadatjua apadapena inakjuite irsucapetua iwaupiakje teculjedalrisha, Dios tsautsa iñjata icapan jaljamini. 16Micatsa, warsutsa waufacau nanacu njaji wajijina wanaitjaca.
Icatsa faa enolrikjuiteperrica
17Nukitsiñape, icapa icau nunaikica njite icapatsaca icau njaji inaitjacape caiji wacanantacapishu. 18Nucaitjempiena shaa aima walria, njite panaya nupietatsenakja nucaiteca irsun nuiyacayalricu, ninica aima njaji yufacape caiji jipundatapeshu ljiaji mayamica Cristo cruza nacu, 19njite watsa njaji, lriwayaqueta-cautsana. Nja, nadioteca naji napeyuji nanaitaca njite najiacawa catima naikjaute, narsuwerrricutsanta capaimanca najiacacao. Camipatsa nawaupiaca lrinacu ljiaji jalredauca iyada. 20Mitsadekja faa, icasta wayacalreca ljiaji enolriculje, lrinolriutsa njite ljiaji iyumjetacaita, ljiaji Waminalri Jesucristo wawapalri wacapa, 21ljiaji ipadametalriutsa wadaki iwayacacadau caicarruatsaniji lridaquishu melremelredalri. Njite lrinaitautsani ljidashu ljiaji lrirsulri lritalricanatacarru pjuimi-nacu.
© 2025 CLAN
© 2025 Seed Company