Filipenses 4
4
1Nini, nukitsiñape nupeyunipe, shaa numaji nucapaca; shaa nupeyuji, icatsa shaa icadacapeca catima njua njite nursunpena icuada, yemenau cayu, taimi Waminalrinacu.
Yacuti nucatimatashupana
2Nutatja caiwirricutsa nainai naji Evodia, njite Síntique tsakja, apadacarrutsa ljiaji iwaupiakje caiji shepacaperrishu Waminalrinacu. 3Njite pjia, nuquichinda matsiadalri idejica, nutatja piinai piquichindatacarru njaji waquichidua naipe, ima njaa pacuacatsa nadejica kjaida nuinai lrinacu ljiaji pacaiteca ljiaji yacuti ajadalri, pacuacatsa lrinai ljiaji Clemente njite tsakja naji apana idejicapepia nuinai. Narsuenina nepitana lrirricuda ljiaji paperra nerrulri irricuda njaji irsucape jalredauca mayacacadalri.
Irsuwalreo watsa pjiumi
4Icatimataquenau caidalritsa Waminalrinacu. Nucaitepjatsenakja: ¡Icatimataquenau! 5Njajicarruatsa inacu pjiumi matsiaperrica inaikica shaa. Iwaupiena tsumiketsa Waminalri inuca.
6Mjetatsa icaolreu cucaidanacuca, mitsadekja icañatjani pjuimi Dios irsu itjatacadanacu lrinai; itatja lrinaini, njite yatsakja matsiadalri lrinacu. 7Njite ljiaji imaudacakjeti Dios inakjuitedalri, macadalripjatjuani, curridalri apada achia itaita yaajica inacu; lriwapautsa naji icaolre njite iwaupiakje tsakja Jesucristo nakjuite.
8Piquetendalrina, nuquitsiñape, iwaupiena pjuimi nanacu njaji ajadalriperri, pjiumitsakja njaji matsiaperri patjaitaji pafiujica iwana, pjiumitsakja nanacu naji mayacamperri, pjiumitsakja nanacu njaji mamashicanaperritsa, pjuimitsakja nanacu njaji catimaperri pacapaca, lrinacutsakja ljiaji matsiadalri yacuna. Iwaupiena pjiumi nanacu njaji matsiaperri, pjuimi naji patjaitaji pacaiteca inacu matsiaca.
9Warrena inaita ljiaji nucanantalri shaa inacu njite naji nuñjatalri icapa cuajica panaitjaca, pjuimi ljiaji jimirripiena nucaiteca njite ljiaji icapalripia nunaitjaca: Inaitjenani cayu njite ljiaji Dios icadacada parsu imaudacaketji lriatsautsa inai.
10Catima njua jurre Waminalrinacu idiacapuatsenakja ipieta iwaupiaca nunacu. Curritsa nucaiteshupacantja curriketsa iwaupia njua, mitsa currikjapampietsa irsu cuajikjeca ikishindata njua. 11Currim nucaiteshupacantja canacaica nursu, ima nuajinina nucatimatacacau nashu njaji nursulrina. 12Nuajii cuanca paufacau kenacadanacu pjaa, njite nuajitsakja cuajica paufacau parsucadacu aima lrinaculjepja. Nuajininatsakja cuanca pemacau lrikjuete ljiaji pjeyapacadanacu cuandalrinacucatsa, cayuji quepinacadanacu pja o mepinacadanacu pja, parsucadanacu aimapja o curricadanacu parsu cucaidaca. 13Cristo-nakjuite nutaita nuemeca lrikjuete ljiaji cuajidalricatsa njuyapalri inacu. 14Micatsa shaa, inaitja matsia iquichindatacapua njua njurrapitacadanacu.
15Numutucadanacupia Macedonia lrikjuite, nuinitacarru nucaiteca ljiaji yacutji ajadalri Cristo-nacu, campjapiatsa shaa, shepacaperri aperriji Filipolricu, icampjapiatsa shaa ikichindatalrica njua canacaidalrinacu. 16Ninicadanacupiatua njua Tesalonicalricu, aimawalriapia imenacapiaca nursu ofrenda ikitsindatashupa njua canacaidalri nacu. 17curritsa nutatjacapuacantja inai lricuadau, ljiaji numalripja inai iwaketarru iyarsuajiwa Dios yaalriwatsa irsu. 18Upina lriuca pjiumi ljiaji canacaidalri nursu, njite jurrecalrenakja nursun. Njite ljiaji imenacanda nursu Epafrodito iinai, jurrecalrenakja nursun. Njaji imenacalri nursu kaicanaji ofrenda pumenianaishu, caiji nandashu matsiadalri catimadalri Dios icapaca. 19Nini, ljiaji nu-Dioste lriawatsa irsu pjuimi njaji canacaiperri irsu, nacualje naji lrimatsiaca mavayacacaperri lrirsulri Cristo Jesus nakjuite. 20¡Wa matsiadalri caidalriwetsa lrirsu ljiaji Fanirri Dios! Cayuwatsa.
Lricaiteca lriacunau
21Memoria narsu pjuimi naji lrinaikite ljienitajina lriyapeu Jesucristo nakjuite. Njaji wakitsiñape aperriji nuinai namenaca irsu memoria. 22Njite tsakja namenaca irsu memoria pjuimi naji lrinaiquite ljienitajina lriyapeu, njite narsuwalrepja naji shulrudaunai italricananai idejicape lriipanalicu ljiaji italricanati Roma lricuda.
23Waminalri Jesucristo lricadawatsa lrimatsiaca macadalri inacu.
© 2025 CLAN
© 2025 Seed Company