Filipenses 2
2
Yufawa imaudacatsa njite kjenaperrishutsa
1Nini, Cristo yaacadena irsu ljiaji itaitakjeti ijuivitacada, lripialjetacadena shaa ljiaji ipeyukjeti icatimatacarru njaji apana, apacadena sha lrinacu ljiaji Espíritu, irsucadena icaolrerricu ljiaji kjenacapam pacacapa apana, 2ipacamitena njua lrishu ljiaji itimati yufacapua imaudacatsa kjenaperrishu, apadatsa lrinacu ljiaji ipeyukjeti, apadatsa lricapacana ljiaji pawaupiakje njite apadatsa ljiaji iwaopiakjeti panaitjauda. 3Manaitjatsani yumacapua shapjaca napjeyalre o ipadalretacashupatsa, mitsadekja inaitjani mapadalrecatsa, njite curricarru pacapa apada yajiacacadapjawa napjeyaljedalripjacani nauya njaji apana. 4Curricarru pacapa yumacada lrirsuwawa minitsa, mitsa lrirsutsa lriomaca narsuwalreutsakja njaji apana.
Cristo lricadacapiawa kjenadalrishu njite Dios icadacarru cacunaitecarrupjani pjiumi yuya
5Yuma inaikicau caiji Cristo inaitjacapishupia, 6ima lriaji:
Ninpiatsa pacuacacan Dios icaishu,
currim cuadao lirsu pacuacadalrican Dios icaishu,
7mitsadekja ljiwacatsa ljienitapia lriuyao ljiaji Dios-cani
njite lrinaitjacau idejicadashu narsu.
Lrinaitjacapiawa cayuji nacayushu pjiumi njaji achianai
lricañjatacapia nacapau caiji apada aachia shu midalrintsa,
8ljiwacatsa icadaacau kjenadalrinshu,
lrinaitjaca cayu Dios yumacapishu atee mayamicani,
mayamicarrun cruzanacu.
9Caishupa Dios yaaca lrirsu ljiaji cacunadalricarrun pjiumi yuya
njite lria lrirsu ljiaji ipitanati machiadalripja nauya pjiumi njaji ipitanati,
10lrinacucarruatsa, ljiaji Jesús ipitana,
natudautsa naursipadau lrirsu pjiumi
enolriculje, jipainaculje njite jipai yapjite tsakja,
11najicaruatsa pjiumi iminalritica ljiaji Jesucristo,
lrimatsiacao ljiaji Fanirri Dios.
Icañjata nacapa ajaperricaquena irsuca ljiaji yumjecai
12Lrikjaute ljiaji, nuquichiñape nupeyunipe, caiji shepacapishupiena njua caidalritsa, curritsantja acadanacucatsa nuaji inai, shepenanua njua panaya tecucadacunacu njua yuya. Ikjaidataquenau icañjatacarru ljiaji yumjecai irsulrina inaitjacapua caiji Dios yumacapishu ifiucapua lriwana; 13Nini Dios, caiji lricadacadacapishuena matsiacapua lricapaca, ljiaji icadalri irsucarru njaji iwaupiakje matsiaperri njite ljiatsa iquichindata inaitjacarruna.
14Inaitjani pjiumi macupenatsa wade shametacajicau, 15curricarru nauqueta inacu apada inaitjanda machi naikjaulrenatacarru shaa, njite Dios yenipecarruatsa shaa maupjitaperritsa napeculricu njaji inaiqui matsiperritsa iwaupiakje. Icanacarruatsa napeculricu caiji jivirjida icanacapishu aji jalredaucalricu, 16wemacarrua taimi lrinacu ljiaji yacuti icadacada caafipja. Cayuatsa, lrinucadanacuatsa ljiaji Cristo, catimautsa nuajiacacau inacu, nuajicapua ljiaji nudejicalre njite ljiatsakja ljiaji njueculri irricuda curritsautsa macuadacarrucana. 17Njite ninitsanta nucadaca pjiumi ljiaji nucafica nainucarrutja njua nuwayacacarru nupakjanta ljiaji idejicalre Dios irsu icadacapua icaolreu lrinacu njite idejicarru lirsu, catimautsa njua njite numa nujuivitacacau pjiumi yapiya. 18shaa icatimataquenau, pacuacatsa nuinai.
Timoteo nacu
19Waminalri Jesús yumacada, numenacautsa kjeyapesha icaolre ljiaji Timoteo, lridietacadanacuatsa nuikjaolre yaacuna lricatimatautsa njua. 20Currin nuketa apadapja irsucada ljiaji nuwaupiakje njite jitacada icaolreo ajadalri lrinacu ljiaji imaudacacarru yufacau; 21Ima njaji apaana naumaca narsuwawatsa, njite currin umami nacu lrinacu ljiaji Jesucristo. 22Mitsa shaa yajinina cuajica lrinaiquica ljiaji Timoteo njite cuajicatsakja lridejica nuinai lrinacu ljiaji pacaiteca ljiaji yacuti walridalri, lrikichindataca njua caiji nuenipe shu. 23Caishupa numecacautsa ikjaulreni nuajikenautsa cuajicautsa njuyapacao; 24Njite nucada nucaolreo Waminalri nacu nuacatsenakjautsa nucapa ikjaolre kjeyetsa.
Epafrodito nacu
25Caitsakja nowaupiaca canacaica numenacaca ikjaulre ljiaji wakitsinda Epafrodito, ljiaji idejicada nuinai njite yemacada taimi nuinai lricuetje ljiaji mashidalri, ljiaji imenacanda inu jiwa nursu naji canacaiperripia nursu.
26Kjapudan shaa jurre lrirsu, njite lritjaca lricaolreo lrima ljiaji yajiquena lriyamipiaca. 27Ajadalripiatsa lriyamica, njite wadepepjapia mayamican; mitsa kjena Dios icapaca lrirsu, njite currin ljiaminicatsantja mitsa kjenatsakja lricapaca nursu, wadetsanta inunapjaca njua jurrepja lriuya ljiaji nursulrina. 28Caishupa numenaca ikjaulren kjeyacalrinni, catimacarruatsa shaa icapacadanacushenacani njite curricarrupetsacautsa inunaca njua. 29Icuadatautsani catimalricu, caiji ikitsindashu Waminalri nacu njite icacuadatautsa caidalritsa pjuimi naji caiperriji lricaishu, 30ima yumjepia mayamin lrikjaute ljiaji lridejicapua Cristo irsu, njite lricadacapiawa lrinucarru lrinaitjaca nursu njaji idejiketji curriperri itaita inuca inaitja nursu.
© 2025 CLAN
© 2025 Seed Company