Filipenses 1
1
Memoria
1Njua Pablo njite Timoteo tsakja, idejicaperri lrirsu ljiaji Cristo Jesús, nudana ljiaji memoria irsuwalre shaa ljienitampe lrirsuwawa aperriji Filipolricu, shaa apadaperritsa Cristo Jesus nacu, pacuacatsa napiya njaji cacunape idenjicaperri njite diacononai tsakja. 2Fanirri Dios njite Waminalri Jesucristo nacadaawatsa namatsiaca macadalri inacu njite imaudacacarru.
Pablo itatja Dios inai njite lria tsakja matsiadalri nanacu njaji shepacape Filipo lricuperri
3Nuejitsa machiadalri nu Dios-te irsu nowaupiacadanacutsa inacu; 4njite caidalritsa nutatjacadanacu inaco, nunaitjacani catimalrico; 5ima initacayami icadaca icaolreo Jesús inacu panayetje, ikichindataca njua lrinacu ljiaji idejikjeti pacaiteca lrinaco ljiaji yacutji matsiadalri Cristo inacu. 6Nuajintsa ajadalri Dios-ca, ljiaji initalri inaitjaca matsiadalri inacu, lriwayaquetautsani atee lripietacaulje lrinuca ljiaji Cristo Jesús. 7Ljia nowaupiakjeca ljiaji mayacandalrican inacu padenirri, ima nudeca shaa nucaolrerricu njite pjiumi shaa ikitsindatacaperrica njua lrinacu ljiaji Dios imatsiaca macadalri, lricañjatenina nucapa, ninitsa presocadanaco njua o acadanaco njua caconaperri ipjeyalre nudaanatacarru njite nucadacarru naaji lrinacu ljiaji yacuti matsiadalri ajadalrican. 8Ima Dios yajintsa cushuapaca kjaapudamca shaa nursu paderri, nupeyuca shaa caiji Jesucristo ipeyucapishu shaa. 9Nutatja Dios inai lritawiñacarru pjatuawa ljiaji ipeyuacacao jurrepja, njite lricadacarru irsu yajikjeti njite yaajiicarru inaitjaca, 10yajicarruatsa iniwanaca irsuwawa caidalritsa ljiaji matsiadalripja. Caiwatsa itaita yufacau icaolre maupitjadalri yapiya, njite yacarru mayacan wade itudaca jipau atee akjerecautsa Cristo ipieta inuca, 11njiteutsa shaa iñjatautsa jurre ipania inaitjacapua matsia Jesucristo inakjuite, wacaitecarruatsa matsia Dios-nacu.
12Nukitsiñape, numa yajica lrinaco pjiumi ljiaji njuyapapialri, ajadalri lrimutucao matsia lritawiñacarrupjawa ljiaji yacuti matsiadalri. 13Nini lrima ljiaji presoca njua lrimutucawa matsia nucañatarru paderri Cristo-nacu njemiwerico njaji shulrudaunai ivapacape talricanatidapanalricu njite pjatsaca pjuimi naji apaana. 14Nini nacapacadanacu presoca njua, aimapatjua njaji waquitsiñape ifuiwitaacalriwa nacaitecarru ljiaji yacuti, mafiucatsa njite najicapua Waminalri iquinchindatacautsana.
15Ajadalri ninica apadapena icaitecaperri Cristo-nacu nakemicapuatsa njite naumacarrutsa napjeyalreperri pjacana, mitsa njaji apana nanaitani nawaopiakje matsiadalri yapiya, 16apadapena nacaite Cristo-nacu napeyucapuani, najicapjua Dios icadandaca njua aji, nuemacarru taimi nudaanatacarru ljiaji yacuti ajadalri; 17mitsa njaji apana nacaite lrinacu naumacarrutsa cacunaperripjacana, njite curritsa ajadalriperrica, naumakjapantsa nacadaca nurrapitapja aji presodapanalrico. 18Mitsa ¿Curritsa cuadauca? nintsa cuajidalricatsa jiyapawa, ajadalrican o currican, nacananta catsa ljiaji yacuti Cristo naco; njite icatsa icadalri catimaca njua njite lricatimatamini pjautsa njua,
19mitsa nuajintsa pjiumi ljiaji icatsautsa imutuetalrica njua presodapanalrikjuite, nua matsiadalri itatjacapua nunaco njite lrinaco tsaca ljiaji Jesucristo Espíritun kjaidadalri ikitsindatalri njua, 20ima nowapa nocapau taimi curricautsa Dios icada capaimanna njua, mitsadekja panaya njite caidalritsautsa, nucañjata nacapa aimawerrico lrishu ljiaji nunaitjalri nucaiterri tsakja cuanjica ljiaji Cristo imatsiaca macadalri, ninitsautsa mayamdalrica njua o cafidalrica njua. 21Ima nursu njua, caaficadanacutua njua idejicadalricatsautsa njua Cristo irsu, njite mayamicada njua matsiapjatuatsa. 22Njite caaficadatuatsa njua nudaqui yapiya, ljiaji nudejicalre lrirsupjautsa aima lriinaca, nini currim nuaji cuandalrica ljiaji nualri irricuda. 23Jirrapitina njuaji cuajidalricantja njupa nanacuite njaji yamada: Apadatjatsakja numatja mayamica njua nuacarruenantja nufa Cristo inai, ima ljiaji lrimutucantja matsiapja nursu, 24mitsa, apaferrico, ikjautje canacaitua nufacau cafitsa. 25Njite nuajintsa ajadalri, nufapjacatuatsa inai, nukitsindatacarro shaa yacarro ipjeyalre njite irsucarrupjautsa itimati lrinaco ljiaji icadaca icaolreu Cristo Jesús nacu. 26Nini nucadawatsa ikjaidatapja ljiaji itiima icaitecarru matsia Cristo-nacu, nupietacadanacuatsa acanjuaji inai.
Yuufa caiji Jesús yumacapishu
27Icamipjatsa nutjatalrica inai: Inaitja caiji lricaitecapihsu ljiaji yacuti matsiadalri Cristo-nacu. Ninitsantja, nuacada nucapa ikjaolre o curricada nuawa, numa nomica yacuna yemacatsa taimiwa njite apapucutsa, idejica pacuacatsa lrinaco ljiaji yacuti matsiadalri wacadalri wacaolreo inacu, 28macadatsautsa nafietaca shaa njaji jipundatacaperri shaa. Ljiaji icatsa lricañjatashupaca jalrami lriwayakjetacautsana, njite ljiada minitsautsa lricañatautsa icapa yumjeperrikena shaa. Njite ljiaji Dios inakjuitedalrican 29ima Cristo ikjautje, curritsa lricadakjapancatsantja yumje shaa, irsutsakja jirrapjitaca lrikjautje. 30Shaa njite njua pacuacatsa wadejica kjaida lrinacu. Icapjenpiena cuajica nuemaca taimi lrikjuete, njite panaya jiminina nuacuna cuajica nuemacatsa panashete taimi lrikjuete.
© 2025 CLAN
© 2025 Seed Company