Efesios 6
6
Njanirrinai njite nenipetsakja
1Shaa nenipe, inaitja caiji jinirri yumacapishu ima icatsa cayu pacatimata Waminalri, ima icatsa machiadalri panaitjaca Paminalri irsu. 2«Ifiu naiwana njaji jinirri njite jiduatsakja»#Ex 20:12; Dt 5:16, ima icatsa yacuti lricaiterri cacuadadalripjaca pjiumi yuya lricadalriutsa icuadao irsu, 3catimacarruatsa yufacau, yufacarrutsakjautsao aima camui aji jipainaco.
4Njite shaa, njanirrinai, maumatsa iquerruatacarro njaji yenipe, matsiapja icaitena matsiadalrinaco, imayacalrena njite icanantana cuanca nanaitjacarru matsia Waminalrinacu.
Caminanaiperri
5Sha caminanaiperri aji jalredaucalrico idejicaperri narsu inaitja narsu caiji naumacapishu njaji iminanai jalredaucalricuperritua icacuadatana ifiucapua naiwana, icaolre ajadalri yapiya caiji inatjacapishu Cristo irsu. 6Ideji narsu, currin nacapawerricu-catsantja, yumacapua nacapaca irsu machia, mitsa inaitjacani caiji idajicaperri shu Cristo irsu, inaitjacani icaolrerrikjuite inaitjacapua caiji Dios yumacapi shu. 7Inaitja ljiaji idajicalre ipeyucapuani, caiji idejicaitashu Waminalri irsu curri achianai irsuca. 8Ima irsutsa yajica wacuanaatsa, caminalridalri o corridalritsa irsu lriminalri, ljiaji Waminalri Cristo lricaviñautsa lricuada ljiaji wanaitjanda machia.
9Njite shaa, naminanai, yufa nacaishutsakja njaji idejicape irsu. Wadee ipaulrecana mashidalrishu; iwaupiaca inacuwaca njite nanacutsakja njaji idejicape irsu ima irsuca apadatsa Iminalri yufalri enolriculje, ima currin lricapaca nauyawaca.
Shepacada Dios idanatacashuda ñacain ikjuete
10Njite panaya, nuquichiñape, ikjaidatakenau Waminalrinacu, lrishu ljiaji jidati lrinakjuitedalri curridalritsa coca itaita idanataca. 11Idanatacao lrishu ljiaji Dios idanatakashuda lrialri irsu, itaitacarruatsa itarrawataca taimi nakjuete njaji lricashatashupa ljiaji ñacain. 12Ima currin wainuacacao nakjuete njaji inaiqui irsucape jidati, mitsa wainuacacao nakjuete njaji icaoljetin machiperri enolrikjuiteperri irsucape jidati njite itaitakjeti, njite nakjuetetsakja njaji italricanati jecuapirricupe macapacanapetsa, nakjuetetsakja njaji jidati kjaidaperri imotucape jalredauca cadaucawerrikjuite, njite nakjuetetsakja njaji icaolretin mashiperri yanjicapeo eno yapjite irsucape jidati lrinaco ljiaji jalredauca imashicana. 13Nini, jipa irsuwau ljiaji Dios idanatashuda lricadalri irsu, itaitacarruatsa yemacau taimi ljiada lriucacadanacuatsa ikjaulre ljiaji ñacaim jiida, ljiapodjete imachietacacayaminawa matsia, yemawatsau taimi caidalritsa.
14Nini irsutsa yemaca taimiu caidalritsa, njite ipietapja shetacacao lrishu ljiaji ajadalri njite idanatacacao lrishu ljiaji inaitjalri matsia. 15Iwapacaketsao caidalritsa lrishu ljiaji yacuti yacarru icananta ljiaji yacuti ajadalri icadalri paufacao pamaudaca Dios yapiya. 16Nini pjiumi yuya, idanatacao lrishu ljiaji icadalri icaolreo inaco ima icatsa iyalriketalrica njaji lriyavitashupa ljiaji fepunda ñacaim. 17Nini lrishu ljiaji lriyumjetashuda faa icatsa lrishu lridanata taimi fevida, njite ljiaji Dios yaco icatsa Espíritu Santo imatsetanca. 18Icaiteca Dios caidalritsa itatjacadanaco caiji Espíritu Santo yumacapishu: mamapjicatsa itatja, njite itatjatsakja pjiumi nanaco njaji shepacaperri. 19Itatjatsakja nunaco, Dios icadarro nursu yacuti nucaiteupe, nutaitacarru cacucanjua mafiucatsa njite nucadacarru naji lrinaco ljiaji yacuti Dios idawandapia lrirricuda ljiaji yacuti walridalri. 20Nini ljiaji Dios lrimenacaca njua caiji idecadashu yacuti apada talricanati iyada, ima lrikjaute njurrapitaca nupapirrico panaya. Itatja nunaco cacucarru njua lrinaco mafiucatsa.
Yacuti piquetemdalri
21Tíquico, waquitsinda wapeyunda icatsa ljia iquichindatacaitaca machia faa lrinaco ljiaji Waminalri idejicalre, njite lriatsakja ide yacuti nunaco lricaiterru sha cuajica nuajiacacao. 22Nini numenaca ikjaulreni, lricaitecarru irsu cuamica faa njite lrifuivitacarru iwaupiakje.
23Ljiaji Dios Fanirri, njite ljiatsakja Waminalri Jesucristo, lriawatsa narsu njaji waquitsiñape naufacarru namaodaca, napeyuacacarrua, njite nacadacaru nacaolreu Cristo-nacu; 24Dios-watsa icada lrimatsiaca macadalri nanacu pjiumi njaji ipeyucape Waminalri Jesucristo ipeyukjeti mawayacacadalrishu.
© 2025 CLAN
© 2025 Seed Company