Gálatas 5
5
Cristo iwetacanipena faa waufacarrowa wamaudaca
1Yemena taimi lrinaco ljiaji Cristo iwatacashupa faa, njite mapietenatsa yufacau, caiji napapinipeshu.
2Jimi nursu. Njua, Pablo, nucaite irsu icadacada nakjenanata idaquinaco caiji yufacapishupiawa, macuadadalricautsa ljiaji Cristo inaitjalri waikjaute. 3Nupieta nucaiteca, pjiumi aachia ikjenanatacacada lridaquinaco, lrirsutsa lrinaitjaca pjiumi caiji lricaitecapishu ljiaji yacuti Moisés idanandapia. 4Nini shaa yumacape nacapaca irsu caiji machiaperrishu Dios icapao inaitjacapua caiji lricaiteca pishupia ljiaji yacuti Moisés idanandapia, icamipjatsa shenitacacau Cristo yuya; icabucocapua lriuya ljiaji Dios imachiaca macadalri. 5Mitsa faa, lrinakjuite ljiaji Espíritu warsuwatsa wauquetacarro machiaperricarrufaa Dios ipjeyalre lrinakjuite ljiaji wacadacapua wacaolreu Jesucristo naco. 6Nini waaca machiadalri Cristo Jesús irsu, ima macuadadalriquetsa ljiaji pakjenanataca padaki o currica pakjenanatacao, mitsa cacuadalrica ljiaji pacadaca pacaolreu, lrimautsa ljiaji caidalri icatsa lrinakjuite lricañjatashupaca lripeyuca faa.
7Shaa matsiapiena shepaca ljiaji yacuti ajadalri. ¿Cocau ljiaji jienitalri iwaupiakje wade inaitjaca caiji lricaitecapishu ljiaji yacuti ajadalri? 8Ljiaji caidalri curritsa Dios njitedalrica. 9Nini icapaca yuyao: "Ima ninicada tsutsa muljui lricamataca pjiumi ljiaji idaitanpeti", 10njite njua nucadjentsa nucaolreu lrinaco ljiaji Waminalri curricaotsa iwaupiacarruca tecolje; mitsa Dios jirrapitetacautsa ljiaji yanjicada itecoljeta iwaupikje, curritsa cuadaca cuajidalricatsa.
11Njite njua, nuquitsiñape, nucanantacada-minitsantja lrinaco ljiaji pakjenanatacapan padaquinaco caiji yufacapishupiawa, njantja njaji judionai currintja njepundataca njua, ima caicadantja, ljiaji yacuti Cristo i-cruzan nacudalri currintja lrimashica nawaupiakje. 12Mitsa njaji yanjicape iteculjeta iwaupiakje, ¡matsiapjantja nayuamican pjiumin nauyaawan papiatsa!
wapeyuacacadau, wacañjata wanaitjaca caiji lricaitecapishu ljiaji yacuti upidalrin icaitecapishu
13Shaa, nuquitsiñape, lriniwananipepiena shaa yufacarru imaudaca. Lriwetacanjicapuena shaa currin itaita icadaca lriaji inaco ljiaji iwaupikje caupitjadalri. Machiapja iquichindacacau inaiwaca ipeyuacacapuawa. 14Ima pjiumi ljiaji Dios idanandami lriwacacau apadatsa yacutinacu: "Pipeyu pjiumi njaji piajinipe cayuji peyuacacapishu pjiwacatsa".#Lv 19:18 15Icapa yuyawa, wadee imjuacacau wadee iñjacacau inaiwaca, ima caicadaa inaitjaca iwayaquetacacau jiwacatsa.
Lrinaiquica ljiaji yufacada cayuji Dios i-Espíritun yumacapishu
16Nini, nucaite: yufawa caiji Espíritu yumacapi shu, njite manaitjatsa caiji iwaupiakje yumacapishu. 17Ima njaji iwaupiakjeti mashiperri nacuemaca ljiaji Espíritu, njite ljiaji Espiritu lricuemaca njaji iwaupiakjeti mashiperri. Ima icuemacacapecauna, nini shaa currin itaita inaitjaca cocaca yumalri. 18Mitsa icadacadena Espíritu Santo yanji inacu, curritsa yufacau cayuji lricaitecapishu ljiaji yacuti upidalrin.
19Mjerrapitinacatsa pacapaca njaji inaitjacape cayuji nawaupiakje upidalrin yumacapishu: Nanaitjaca pjiumi ivilreti macadadalritsa, nanaitjatsakja pjiumi caupitjadalri njite pjiumi macadadalritsa, 20natatjaca idolo inai njite nanaitjatsakja malrirricalri. Njite mashi nacapacacau, currim njepacacau njite naquerriacacau. Mjerrapitinacatsa kerruacana, nanaitjacau nemacarru nakjuetewaca, njenitacacau nauyawaca njite nanaitja nayarrupucua apapuco nauyawaca. 21Cakemakjeperricana, idewanacape, camuniperri njite aapaana caiperritsa nacaishu njaji. Nucaite irsu, caitsaji nucaitecapishupiena, pjiumi njaji inaitjacape cayu currimwatsa Dios itaita idejica nacaolrerrico.
22Mitsadekja, lriinaca ljiaji Espíritu icatsa njaji: Ipeyucada apeshida, icatimatacada apeshida, icadaca pamaodaca, itarrawatacada cocacatsa ikjuete, yufacada machia apeshida yapiya, icuadatacada machia apeshida, pacadanda pacaolreu inaco, 23kjenadalri iwaupiakje apaana ikjuete njite currin wacada wawaupiakje macadadalritsa yaji wanaco. Currin pacapa apada yacutipja nakjuete njaji nucaiterri.#Ef 5:9; Col 3:12-15 24Njite njaji Jesucristo iyarrupe, upina neña lrirua cruzanaco ljiaji nanaiquica upidalrin pjiumitsakja napeyunda macadadalritsa njite pjiumitsakja napeyunda mashidalri. 25Mitsa panaya waufacadena Espíritu nacu, warsutsa wacadaca lriaji wanaco ljiaji Espiritu.
26Currim padalreperrica faa, currim waapanaca wacuemacacarruwa njite currim wakemica apeshida iyarru.
© 2025 CLAN
© 2025 Seed Company