Gálatas 4
4
Curritsa waufacau caiji idenjicaperrishu apada irsu ima panaya Dios ienipequena faa
1Ljiaji numalri nocaiteca icatsa ljiaji: Nini ljiaji yufaacadautsa ljinirrincuirri iyarruaji yapiya, yempeticadanacotuani, currim pacau lriuyawaca lriuya ljiaji idejicada apada irsu apee ipanalrico ljiacadanatsa mashanadalri lriminalri pjiumi ljiaji inaniti. 2Lirsuca njaji iwapacapen njite icanantacapeni atee cuancauljeca ljinirri icadena lrirsuni. 3Caitsakja faa, lripjeyatua lrinuca ljiaji Cristo napapipia faa njaji jiidati jalredaucalricuperri. 4Mitsa ljinaana yucacadanacuenao caiji lricaitecapishu, Dios imenaca Lirri, ljiaji imutulri apama iinarru nakjuite, njite lrinaitja caiji Moisés idananda icaitecapishu. 5Lriyumjetacarru njaji yufacapepiawa lrinacu ljiaji yacuti Moisés idanandapia njite lricadacarru warsuca itimati nanaco njaji wayarruaji fanirri Dios yenipecapuafaa. 6Nini lrienipequena faa, Dios imeenaca Lirri i-Espírituni wacaolrerriculje; njite ljiaji Espíritu Santo lricaite kjaidaalricu: ¡"Nopeyunda Njunirri"!. 7Nini pjia, currinatsa idejicaitaca ape irsu, mitsa Dios yeenipeca pjia; nini lrienipecapuena pjia, Dios icadatsakjautsa pirsu njaji lricaiterrina.
8Lipjeyatua, shaa curricadanacopiatua yaajica ljiaji Dios, yufaapiacau caiji idejicaperrishu narsu njaji curriperritsa pataitaca paca irsu matsiadalri. 9Mitsa panaya shaa yajinina Dios naco, o matsiapja pacaiteca, panaya Dios yanjinipequena shaa, ¿Nini Cuadantja ipieta yaca narsu machiadalri njaji jiidati yufacarrutsenakja cayuji idejicapeshu apee irsu? 10Shaa icatimatacape apepenaa jalredauca, querri, njite uniatsakja. 11¡Aima njutaca nuaulreu lrinaco ljiaji nodejicalre ipeculrico wadetsantja mikjapandalrishucatsani!
Pawaupiauda nunaiquicanacu
12Nuquitsiñape, nutatja inai caiwirricutsa: Irsutsa caica shaaji nucaishu, ima nunaitjacacau caiji icaishu. Curritsantja inaitjacapuaca nursu mashi. 13Caiji yanicapeshuena, nucaitecaulje nuinita shaa, ljiaji yacuti iyumjetacaita faa nunaitjani lrikjaute ljiaji ipuati njurrapjitapialri. 14Njite ljiaji ipuati icapiatsa iviacashupawa, njite currim imenataca njua currim tsakja shenitacanjua yuyawa lrikjaute ljiaji ipuati, mitsa, icuadatapia njua caiji nacuadatacapishu apada Dios i-angelen, ¡caiji Jesucristo-capishunta njua! 15¿Akjerrenau ljiaji itimati irsupialri? Nutaita nucaiteca inaco irsuquena ljiaji matsiadalri ima wadepentja itaitaca jitaca njaji itji yacarro nursuna. 16Njite panaya, ¿capja caica nunaitjacapiacao caiji jipundashu, nucaitecapuatsa irsu ljiaji yacuti ajadalri?
17Njaji inaiqui nacaite njetaca nacaolreu inaco, mitsa currin matsia nawaupiakje ikjuete. Ima ljiaji naumalri njenitacarru shaa wauya, njite shaa jitacarru icaolreu nanaco. 18Aaja matsiadalritsa ljiaji pjetaca pacaolreo apaana naco, mitsa panaitjacadani pawaupiakje matsiadalri yapiya; njite inaitjatsacani caidalritsa, currim acadanacucatsantja njuaji inai. 19Shaa nuenipe, nupietatsenakja njurrapjitaca icaiyati caiji apama inarru jirrapjitacadaco icaiyati quenipecadanacono atee yufacauljeutsau caiji Cristo icaishu. 20¡Nuumatja acantjanjuaji inai panaya nucaitepenjicarru yapiya yacuti tacaatsa, ima currim nuaji cocantja nuwaupia inaco!
Nacapacana njaji Agar njite Sara tsakja
21Icaite nursu apada, shaa, yumacape inaitjaca cayuji lriumacapishu ljiaji Moisés idanandapia: ¿Capja currica jimi cuajica lriaco ljiaji Moisés idanandapia? 22Ima lricaiteca Abraham irsupiaca yamada lrienipe: apada ruenipe rsuaji idejicaita lrirsu njite ljaji apada lriinu iyadacaatsa, rsuaji curritsa idejicadaca lrirsu. 23Ljiaji ruenipe rsuaji idejicaita lrirsu jicocani inaiqui inakjuitedalri catsa, mitsa ruenipe rsuaji lriinocatsa, jicocani lrimutocarrua caiji Dios icaitecapishupia. 24Ljiaji nucaiterri irsu panayatsa lrirsu apada panjinda cuamishupaka; njaji yaamamade inaitjepe nacañjata yamada yacuti lriuyawaca taimiperri: Apada nanakjuite njaji icatsa ljiaji jiipana Sinaí, njite rsuaca lritjinaa rsuaji Agar, ima icapiatsa rsuaji ljiduaca ljiaji idejicaita aape irsu. 25Ima rsuaji Agar icatsa lritjiinaaca ljiaji jipana Sinaí aaji jipai Arabia lrico njite panayenakja Jerusalenca, nini lrirricuda jiaji yacalre nanaitjacatua caiji idejicape shu apaana irsu nenipe yapiya ima pjiumi narsutsa nanaitjaca cayuji Moises idananda icaitecapishu. 26Mitsa ljiaji Jerusalén enolriculjedalri curritsa idenjicadaca apada irsu, nini faa icatsa faa lrienipeca. 27Ima cai lriaco ljiaji yacuti nadananda:
"Picatimatacacau pjia inarru menipedarrutsa;
pjiematjaca itimati shu pjia curridarrutsa yaji ljiaji icaiyati quenipecadanacu apama inarru.
Ima rsuaji inarru namacandan aimapjawatsa ruenipe
ruya rsuaji inarru irsucada ruinirri."#Is 54:1
28Nini shaa nuquitsiñape, icatsa caiperrica Isaac shu: Icatsa shaa lrienipeca ljaji yacuti Dios icaiterripiena. 29Mitsa ljiaji jicucalri ljiawaljipia inaiquinakjuite, lripinietaca ljiaji jicudalri Espíritu shu, caitsakja panashete. 30Mitsa ¿Cuaji lricaiteca ljiaji nadananda?: "Pipeco piuyawa rsuaji idejicada pirsu ruenipe yapiya ima curriwatsa lrirsu lrinaniwa pacuacatsa lriapiya ljiaji ruenipe rsuaji curridarrutsa idejica pirsu".#Gn 21:10 31Nini nuquitsiñape faa curritsa ruenipeca rsuaji idejicaita apee irsu, mitsa ruenipeca faa rsuaji curridarrutsa ideji apee irsu.
© 2025 CLAN
© 2025 Seed Company