Gálatas 6
6
Yacuti paquichindatacashupawa
1Nuquitsiñape, icapacadaa apee inaitjca imashicanawa, shaa icadacapena Dios-iEspíritu yaji inaco irsutsa iquindatacani imayacantacarruni. Inaitjacani icaolre matsiadalri shu; njite icapatsakja yuyawa, wadecatsa imatadaca caiji lricaishu. 2Iquichindatacacau inaiwaca idecarro ljiaji jamiñadalri jirrapitalri icuanatsa, cayuwatsa itaita inaitjaca caiji Cristo icaitecapishupia.
3Ninicada apee yajiacacada ipecolrico napjeyaljedalripjacani, mitsa curricadanatsa cocacani, lricashatacacau ljiwacatsa. 4Jiwacatsa icapatja cuajica ljiaji inaikica yufacawa, matsiadalricadani ninidekjautsa itaita icatimatacacau lrishu ljiaji inaitjalri currin icapacapuaca apada nakjuite. 5Ima icuanamtsa irsutsa ideeca lrijamiñaca ljiaji inaitjalri.
6Ljiaji icuadatacada icanantakjeti Dios yaculrikjuite, lrirsutsa lrikichindata ljiaji icanantacadani matsiadalrishu pjiuminaco.
7Macashatacatsau jiwacatsa: Ima currin coca itaita icaaca Dios icau. Ima cocacada ljia paapana ljiatsautsa paniwalri. 8Nini ljiaji yapanacada mashidalri, lriniwacautsa lrirsuwao mayamicalri. Mitsa ljiaji yapanacada Espíritu naco Espíritu nakjuiteutsa lriniwaca jalredauca mawayacacadalri. 9Nini currin mapjicafaa wanaitjaca ljiaji matsiadalri; ima curricadawatsa mapjica faa lriucawatsau ljinaana waniwaca lrinakjuite ljiaji wapanapialri. 10Nini, caidalritsa wataitacadanaco, wanaitjaca machia pjiumi irsu, matsiapjantja narsu njaji wakichiñape icadacapena icaolreu Waminalrinaco
Icapa yuyawa njite nocaite nuacunawa
11¡Nini icapa cuajica macadalripeca njaji yacuti nudananipe irsu nucapishucaatsa!#1 Co 16:21 12Njaji yumacape imenacaca jidatirrico ikjenanatacarro idakinaco caiji yufacapishupiawa, nanaitjacani naufacarrutsa matsia nanai njaji inaiqui wadee njerrapitaca napinietacadanacuna Cristo i-cruzan ikjaute. 13Mitsa currin njamiquetsa njaji ikjenanatacacapewa nadaquinaco. Nanaitjaca caiji lricaitecapi shu ljiaji yacuti upidalrin. Mitsa naumacadekja ikjenanatacacau idaquinaco najiacacarruwa njapjacana, nanaacapua inaitjacani cayu njite idecapua ljiaji jinaana idaquinaco. 14Njite njua, curritsa cuada nucatimatacacau mitsa lrinakjuitedekja ljiaji Waminalri Jesucristo i-cruzanaco. Ima lrinakjuite ljiaji Cristo i-cruzan ljiaji jalredauca mayandalrincani nursu, ima mayamidalrinquena njua lrirsu ljiaji jalredauca. 15Ima macuadadalritsa pakjenanatacacau o currica pakjenanatacacau; micatsa ljiaji cacuadalri icatsa ljiaji pamotucawa walridalri shu Dios nakjuite. 16Jipa irsuwawa ljiaji imaudacakjeti njite kjenacapan lricapaca, pjiumi shaa yufacape lrinaco, njite pjiumitsakja shaa Irsraelnai Dios iyarrupe.
17Nini panayautsa jaitedalriji curriitsa numaca apee inaitjaca nursu jirrapitinadalri; ima nudjentsa nudadanaco njenaana njaji njurrapjitalri ikjaute apadacapuatsa njua Cristo inai.
18Nuquitsiñape ljiaji Waminalri Jesucristo lricadaawatsa lrimatsiaca macadalri inaco pjiumi. Cayuwatsa.
© 2025 CLAN
© 2025 Seed Company