Efesios 5
5
1Dios yeenipeca sha, lripeyunipe, irsutsa yumaca caiperrica sha lricaishu. 2Irsutsa ipeyuca pjiumi apeshida, caiji Cristo ipeyucapishu faa njite lricadacao mayamicarrun waikjaute, ima Dios irsu ljiaji mayamica Cristo pumenidalrishucani, icatimatacada lriwaupiakje ljiaji ljirrapitalri caivirricutsa waikjaute.
3Irsutsa yufacau caiji Dios shenitanpeshu lrirsuwawa: Nini currin itaitamiquetsa imotuetaca yacuti ivilretinacu currintsakja nanaitja nadaquishu capaimanadalri o iquemakjeti nacu. 4Macaitetsa yacuti macadadalritsa currintsakja yacuti miperritsa curritsakja yacuti capaimanaperri pjemica, ima currin machia panaitjaca cayo; mitsadekja imotueta inumalrikjuite yacuti yacada machiadalri Dios irsu. 5Ima yajicarruena, njaji inaitjcape macadatsa nadaquishu, o inaitjacada pjiumi capaimannadalri, o iquemicada ima caicaniji yumacadashu apada Dios yuya; ima njaji cayuperri curriutsa Dios itaita italricanataca nacaolrerrico.
Warsutsa wanaitjaca caiji Cristo yumacapishu
6Macadatsa apada icashata shaa yacuti midalrishutsa, ima naikjaute njaji caiperri lrínu ljiaji Dios irrua kjaidadalri nanacu naji curriperri inaitja caiji lriumacapishu. 7Nini currin matsia iquichindataca njaji inaitjacape cayo. 8Ima apapiapia cadaucawerricupepia sha, mitsa panaya, padacapuetsa sha Waminalrinacu; yufacakenao camarrairricu, 9ima ljiaji camarrai warsulri lricanaca wanacu wanaitjacarru machia apaana irsu, wanaitjacarru ljiaji mayacandalri, njite fepacarru ljiaji yacuti ajadalri. 10Icapatja caidalritsa cocaca ljiaji icatimatacada Waminalri. 11Maquichindatatsa njaji yuufacape mainacatsa ima cadaucawerrikjuiteperricana; matsiapja pacaiteca nacona. 12Ima capaimana pacaiteca lrinacu ljiaji nanaitjalri dawacalritsa; 13mitsa paucacadanacu paji lrinaco ljiaji nanaitjalri dawacalritsa pacapautsani pjiumi. Caiji camarrai icanandashu. 14Pjiumi njaji panaitjaji camarrairrico catjinaca pacapacana. Nini lricaite:
«Picafienao, pjia imaacadalrin;
pjinicuwa napeculrikjuite njaji mayanperrin,
njite Cristo icanawatsa pjia».
15Nini, icapatja cuajica yajicao inaiquica lrico. Maufatsau nacayushu njaji majicapetsa, mitsa yufao caiji cajiperrishuena. 16Ima mashiquena jalredauca, nini irsutsa inaitjapjaca caiji Dios yumacapishu jalredauca icuan. 17Manaitjatsa caiji majicaperrishutsa; yuma yajicarru cocaca Waminalri yumalri inaitjaca. 18Madewanatsa, ima lripiquetaca pawaupiakje; mitsadekja, ipakjamitacao Espíritu Santo shu. 19Icatimatacau yapiyawaca salmos shu, njite lrishu ljiaji panda machiadalri Dios irsu, cancion catimaperri njite icantatsakja yacuti Espiritu Santo icadanda icaolrerricu, njite yaa matsiadalri icaolrerrikjuite Waminalri irsu. 20Yaca matsiadalri caidalritsa Fanirri Dios irsu pjiuminacu, Waminalri Jesucristo ipitananacu.
Cuajica narsutsa naufacau njaji shepacape
Njaji caninaiperri
21Irsutsa shepacacau inaiwaca, ifiucapua Cristo iwana.
22Sha canirrinaiperri irsutsa pomenapaerrica sha shepacacarrua inaiwaca, ifiucapua Cristo iwana. 23Ima ljiaji cainuite icatsa rsuvidaca rsuaji cainirridarru, caiji Cristo capishu njevida njaji shepacaperri, ima njaji icatsa lridadaca; njite ljiatsakja Imanacotacaitacana. 24Caiji nacaishu njaji shepacaperri, nanaitjaca cayuji Cristo yuma capishu, caitsakja njaji canirrinaiperri narsutsa nanaitjaca caiji nanirrinai yumacapishu pjiuminaco.
25Caninaiperri, ipeyu ininai caiji Cristo ipeyucapishu njaji shepacaperri njite lricada mayamicani naikjaute. 26Lrinaitja cayu, idejicaupecarru fa lrirsu, ljiatjacarru nauya namashicana, lricushucana lrishu ljiaji uuni icatsa ljiaji lriacoca. 27Lricañjataupe lrirsuwawatsa apapuco inaiqui ljienitanpe matsiaperri melremelreperri, maupitjaperritsa currin mashidalrica icapacana mitsa narsutsa mamashicanaperricatsa, curriperri jiwirri njite curripetsa irsu namashica nanaco. 28Caitsakja njaji cainuperri narsutsa napeyuca naninai caiji napeyucapishu nadaqui njawatsa. Nini ljiaji ipeyucada lrinu, lripeyuacacao ljiwacatsa. 29Ima curri pacapa apada icapacada mashi lridada irsu, mitsa lriqueñjawani njite lriwapani machia, caiji Cristo inaitjacapishu narsu njaji shepacaperri, 30njite faa icatsa lridaqui iquipeca. 31«Nini, ljiaji achia lrirsutsa ljienitacacao ljinirri ljidua yuya lriufacarru rruinai rsuaji lrinu, njite njaji yamadade apadaquetsautsa inaiquicana». 32Macadalri ljiaji yacuti mashanadalri lridawandapia ljiaji Dios. Icatsa ljiaji Cristo njatsakja njaji shepacaperri. 33Nini, nupietatsanakja nocaiteca icuamitsa irsutsa ipeyuca rsuaji inu caiji ipeyuacacapishu jiwacatsa, njite rsuaji cainirridarru rursutsa rucacuadataca matsia ljiaji ruinirri.
© 2025 CLAN
© 2025 Seed Company