Efesios 4
4
Yemenau apapucutsa
1Nini, presocadanaco njua Waminalri ikjaute, nutatja inai caivirricutsa yufacarrua cayuji naufacapishua njaji Dios iniwananipe. 2Nini icadacacau kjenaperrishutsa njite matsiaperri inaiquica; itarrawatena njite iquitsindatacau yapiyawaca ipeyukjeti shu; 3ikjaidatacau yufacarru papucutsa cayuji Espíritu Santo icadacapi shu, yufacarruwa imaodaca yapiyawaca. 4Ima apadatsa idaquiti njite apadatsa Espíritu, caiji Dios iniwanacapishu sha iwapacarruena icapa ajadalri ljiaji ljienitanda ipia enolriculje. 5Apadalritsa ljiaji Waminalri, njite apadatsa ljiaji pacadaca pacaolreu, apadadetsa ljiaji pacañjatacashupa pjepaca; 6nini apadalritsa ljiaji Dios Fanirricani pjiumi, ima pjiumidalrinacucani, ima lridejica piumi wanakjuite njite lriajii pjiuminacu.
7Mitsa wacuamitsa Cristo icadenina njaji wadejishupao matsiaperri lrialrina warsu. 8Nini, cai lriacu yacuti upiadalrin:
«Ljirrawa yenunrse njite lrideca lrinaiwa njaji presonai aimadan,
njite lria narsu nadejishupao matsiaperri njaji inaiki»#Sal 68:18 .
9¿Njite cuami shupa ljiaji «ljirracau»? lricaiteshupa lriurrucupiacau lrinita aji jalredaucalricu. 10Nini ljiaji yurrucupialriwa ljiatsa ljiaji jirrapialriu naicaunanrse pjiumi njaji eno, lripakjantacarru pjiumina. 11Nini ljiatsa icada apepena lriniwananpe icaitecaope lriaco njite apaana inuparrutacape ljiaji yacuti, njite apaanapja icaitecaupe ljiaji yacuti machiadalri walridalri njite iwapacaupe Dios inaiquite njite icanantacaupe. 12Nini cayu lrimatsietaca njaji lrinaiquite nadejicarru, nataviñetacarru ljiaji Cristo idada 13waucacarruatsau pjiumi pacuacau wacadacapua wacaolreu lrinaco njite waajicarruatsa lrinacu ljiaji Dios irri, njite waucacarruatsa pekipenaiwa, wacapacacarrua Cristo-shu njite ipeperricarru faa lricaishu. 14Curritsa caicafaji yenpetida shu, mjerrapitinacapetsa pamañetaca caiji caulri jirrandashu akjerrecatsa walridalri icanatakjeti shu njite nacada nacashatana njaji yaajicape inipo mashikjai rricu. 15Mitsadekja waufacapua lrinacu ljiaji ajadalri ipeyukjeti, wataviñautsau njite cayucarruatsa faji Cristo shu pjiuminaco, ljiaji padaki jivida. 16Ima ljiatsa Cristo lrimachieta pjiumi lridaqui narrucarru machia nainaiwaca pjiumi njaji lridaqui iqui; njite machiacada nadejica njaji lridaqui iqui, lritaviñawatsau njite lritaimitacapjawatsau ipeyukjeti nacu.
Walridalri wanaiquica Cristo-nacu
17Nini panaya, icatsa numalrica inai caivirricutsa Waminalri ipitananacu ljiaji: maufenatsao nacayushu njaji curriperri shepa Dios, ima naufacau caiji nawaupiakje yumacapishu midalritsa 18ima cadaucadalrica ljiaji icaolre. Njaji currin catimana lrishu ljiaji shepakjeti inulri Dios njite, ima manjicaperricana lrima ljiaji tarracapua nacaolre. 19Upi nataimitacacau nanaitjacapua ljiaji imashicanati macadadalritsa njite nanaitja mafiucanatsa ljiaji naquemica nawaupiakjerrikjuite nadaqui. 20Mitsa sha currin yajica ljiaji Cristo yufacarruntja cayu, 21mitsa ajadalri jiminina ljiaji yacuti lrinakjuitedalri njite yajinina yufacau caiji lriumacapishu, caiji lricaitecapishu ljiaji yacuti ajadalri Jesús-nacu njite cuanpiaca lriufacau. 22Nini, irsutsa icadaca yuyawa ljiaji inaiquica upidalrin njite ipecu yuyawa pjiumi cuajipiaca yufacau upi, ima pjiumi njaji upi namashicacacau, lrikjaote ljiaji napeyunda nacashatacashupa. 23Irsutsa iwalridalritaca pjiumi ljiaji iwaupiakje Espíritu Santo-shu, 24njite shetacacau lrishu ljiaji inaiquica walridalri, imutucada Dios inakjuite ima pacapjentsa lricapacana paufacapua ajadalrinacu, currin lrinaitja lrimashicanau lriufacapua lrinacu ljiaji yacuti ajadalri.
Cuajica paufacau panaya
25Nini, macashatenatsa, mitsa icaiteca ljiaji ajadalri yapiyawaca, ima pjiumi apadadecatsa ljiaji wadaqui.
26Querruacada sha, mitsa manaitjatsa imashicanawa; nini ljiaji irruati currin lritaita lriufacau padaa jecuapi inacu. 27Macadatsa ñacain icada inaitja imashicanau.
28Ljiaji iñaitocadapia, curriitsa lriñaituca, lrirsutsa lridejica, lrinaitjaca idejikjeti machiadalri lricapishu lrirsucarru lriquichindatashupa apada canacaidalri irsu.
29Macaitetsa yacuti imachicacada, mitsa icaite yacuti machiadalri itaviñetacada njaji apaana njite lrimatsietatsakja njaji jimicapen. 30Ma inunatatsa ljiaji Espíritu Santo Dios iyada, ima lrishu lrikjenanata sha lriajishupa lriyarrupeca sha ljiaji Dios ljiadawatsa lriyapecarruena faa.
31Shenita yuyawa ljiaji imashicalri iwaupiakje apada ikjuete, pjiumi panaitjanda macadadalritsa, pjiumi irruati, mjematjatsa macadatsa, macaitetsa mashi apada yacuna njite pjiumi tsakja njaji mashiperritsa. 32Irsutsa matsiaperrica sha apaana yapiya, kjena icapacacau, imatsietacacawa inaiwaca, caiji Dios imatsietacapishu lrinaiwa sha Cristo nakjuite.
© 2025 CLAN
© 2025 Seed Company