Efesios 3
3
Ljiaji Pablo lridejicalre lricaiteca ljiaji yacuti walridalri napeculricu njaji curriperritsa judionaica
1Lrikjaute ljiaji, njua pablo, preso njua lrikjaute ljiaji Cristo Jesús machiacarruatsa sha, curriperritsa judionaica. 2Ima ajadalri yajiwatsa Dios cautsa icada nucananta irsu ljiaji lrimatsiaca macadalri, cayuji lricadacapishu. 3Dios piatsa icada nuaji ljiaji lriwaupiakje lrinaitjanda lridawandapia, upipiena nudana jatjami lrinakjuite ljiaji. 4Ilecadanacuatsa ljiaji nudananda, itaitautsa yajica nuajiica lrinacu ljiaji lridawandapia upitua lrinaitjalri Cristo-nacu, 5curridalripiatsa lricada najica upitua, mitsa panaya Dios icada najini njaji lriniwanaji icaitecaupe lriaco njite njaji inuparrutacape lri-Espíritun shu. 6Ljiaji lridawandapia icatsa ljiaji: Lrikjaute ljiaji yacuti walridalri Dios iwana pjiumi njaji curriperritsa judionaica nafuivitacacarrua, Cristo Jesús-nacu, njaminitsa njaji lriyarruaji matsiaperri lridacariutsa narsu njaji lrienipe, ljiatsa idaquitica njite ljiaminitsa ljaji lricaiterri lricadaca narsu njaji Irsrael nai. 7Njite njua lricada nudejicarru lrinacu ljiaji yacuti lrimatsiaca shu njite kjenacapua Dios icapaca nursu, njite lricañjata nunacu ljiaji ljida macadalri.
8Njua midalrimpjatsa nanakjuite pjiumi njaji shepacaperri; mitsa lricada nursu nucaitecarru ljiaji yacuti walridalri narsu njaji curriperritsa judionaica nanacu njaji lrimatsiaca mawayacacaperri ljiaji Cristo. 9Njite ljiaji Dios, inaitjacada pjiumi njaji pacapalri lricada njua nucadacarru naaji pjiumi ljiaji lrinaitanda lridawandapia lrinitacaulje. 10Panaya lrinaitja ljiaji, lriyarrupe nakjuite, pjiumi njaji jidati njite italricanatinai enolriculjeperri naajiwatsa yajikjeti Dios njitedalri, lricañjatalri teculjepe lriuyawaca. 11Dios inaitja ljiaji cayuji lriwaupiacapishupiena lrinaitjaca uupitsa lrinitacaolje, ljia lricada Waminalri Cristo Jesús inaitjacarrun nacapacawerrico. 12Njite Cristo inakjuite lriventjaca faa watjaitacarru watsumitaca Dios, lrishu ljiaji wacadacapua wacaolreo lrinaco ljiaji lrialri warsu feepacapuani. 13Nini nutatja inai caiwirricutsa wade inunaca sha lrikjautje ljiaji nurrapjitjalri ikjaute, ima matsiadalripjacautsa irsuni.
Pablo itjata tsenakja Dios inai nanacu njaji shepacaperri aperri Éfeso lricu
14Lrikjaute ljiaji nutuda nursipadau lrirsu ljiaji Ljinirri ljiaji Waminalri Jesucristo, 15ljiaji icadacada nepitanau pjiumi njaji inaiki cuamperricatsa nauyawaca. 16Nutatja Njunirri inai lriacarru irsu njaji lrimatsiaca matsiaperri, lrikjaidatarru icaolrerricu ljidashu, Dios Espíritun inakjuite, 17Cristo yufacarru caidalritsa icaolrerricu icadacapua icaolreu, njite ljiacarruatsa lripalri ljiaji ipeyukjeti njite lripucuda ljiaji icafica. 18Njite cayuwatsa itaita yajica pjiumi napiya naji ljienitampe lrirsuwau, macadalrican, macaitecan, jalripadalrican njite tjeewacadalrica ljiaji ipeyukjeti Cristo inakjuitedalri. 19Nutatja Waminalri inai, yajicarru lrinacu ljiaji ipeyukjeti, macadalripjaca pjiumi lriuya ljiaji wajirri, itaitacarruatsa yucaca ipakjantacau pjiumi Dios inacu.
20Njite panaya, matsiadalrica ljiaji Dios, itaitacada inaitjaca jurrepatua liuya ljiaji watatalri o wawaupialri, matsiadalrica ljiaji ljida warsulri wacaolrerricu. 21Faa icadacape icaolreu lrinaco njite apadaperritsa Cristo Jesús naco, ¡wacaite matsia Dios-naco caidalriwetsa! Cayuwatsa (amén).
© 2025 CLAN
© 2025 Seed Company